Biblia Todo Logo
Bìoball air-loidhne

- Sanasan -

1 VaKolinti 14 - ULufingwi uLupwa


Ishikunjilwa isha kukuvhwa ni sha kuyanga injango injeni

1 Mulondolaje kuvha ni shikunzi, havhili mulondolaje kuvha ni vikunjilwa ivwa Mupepo uMufinjile, inkaani ishikunjilwa isha kukuvhwa.

2 Umuntu we akuyanga injango injeni, atakuyanga na vhantu, akuyanga nu Mulungu, mwe pe zye akuyanga naawumo we akuzimanya. Uweene akuyanga izya vhuzigizigi ku maha aga Mupepo uMufinjile.

3 Ileelo umuntu we akukuvhwa, akuyanga na vhantu amazwi aga kuvhazenga mu lwitiho nu kuvhasuvhaalizya nu kuvhagomwa amooyo.

4 We akuyanga injango injeni, akuyizenga wuuyo weeka mu lwitiho, ileelo we akukuvhwa akushizenga ishivhanza isha Mulungu.

5 Ine nkwanza kuuti imwe mwenti muyangaje injango injeni, ileelo inkaani nkwanza kuuti mukuvhwaje. Nkuyanga vhwevhulo, mwe pe kukuvhwa shikunjilwa ishipiti kuluusya kuyanga injango injeni. Inga aliipo umuntu we akuyanga injango injeni, atantulaje, inga ashizengaje ishivhanza mu lwitiho.

6 Ishi vhamwitu, inga ninza kuli imwe, nanda kuyanga injango injeni, vhuli, mungalyaga lilonka vhuli? Mutangalyaga ilonka naalimo, nkandi inga navhavhuuzya zye uMulungu andolesiizye, poosye inga nayanga izya vhumanyi, poosye inga naakuvhwa, poosye inga nasambiilizya, ipo pe mungalyaga ilonka.

7 Vwe zili, poosye ivintu vwe vitali nu vhulanzi, lwe vikukuuta, livhe lilonji, poosye lipango, inga vikukuuta ishisita uluvhaatiho, umuntu angaamanya vhuli ulwimbo?

8 Poosye isaji inga litakuuta ahinza, ni izwi lyakwe litamanyiha ku vhantu, wu naanu we angayisengaanya kusogola kulwa uvhulugu?

9 Vwe zili kuli imwe, inga mukuyanga amazwi ge gatakumanyiha ku vhantu, wu naanu we angazimanya zye mukuyanga? Ipo zye mukuyanga zikuvha zyasogola ni nkungu.

10 Mu nsi umu muli injango izya mavhiila mu mavhiila, ileelo yitaliipo inga yooka ye yitakumanyiha ku vhantu vhe vhayimanyile injango iyo.

11 Ishi inga ntakumanya injango ye umuntu wumo akuyanga, nkuvha ngati ne mujeni kwa ula we akuyanga. Woope we akuyanga, akuvha ngati mujeni kuli ine.

12 Poosye kuli imwe vwe zili. Mwe pe mukusungwa nkaani kuvha ni vikunjilwa ivwa Mupepo uMufinjile, mukanyilaje nkaani kulondola ivikunjilwa vwe vikushizenga ishivhanza.

13 Kuli izyo, umuntu we ali ni shikunjilwa isha kuyanga injango injeni, amulaavhe uMulungu, inga aamupe uvhumanyi uvhwa kutantula.

14 Inga nkulaavha ku njango injeni, umwoyo waane we wukulaavha, ileelo injeele zyane zitakuvha ni ilonka naalimo ku vhanji.

15 Ishi nkwanzilwa kuvhomba ishooni? Kwe ndaavhaje mu njango injeni mwa Mupepo uMufinjile, havhili kwe ndaavhaje na ku njeele zyane. Havhili kwe nimbaje ku njango injeni mwa Mupepo uMufinjile, havhili kwe nimbaje na ku njeele zyane.

16 Inga ukumutiima uMulungu ku njango injeni, vhuli, umuntu uwunji we atagomile mu lwitiho angitishila vhuli kuuti, “Amina,” she atazimanyile zye ukuyanga?

17 Kuli iwe nalyoli ukuvha wamusalifwa uMulungu, ileelo avhanji zitakuvhazenga naashimo mu lwitiho.

18 Nkumusalifwa uMulungu, mwe pe nkuyanga injango injeni kuluusya imwe mwenti,

19 ileelo mu shivhanza nkusungwa nkaani kuyanga amazwi gasaano ge gakumanyiha ku njeele, inga mbasambiilizye avhanji. Ilyo lye lyinza kuluusya kuyanga amazwi 10,000 mu njango injeni.

20 Vhamwitu, mutasiivhaje ngati mwe vhaana, nkandi ngati mwe vhantu avhasongo. Ileelo ku mbiivhi, muvhanje inza avhaana avhansi vwe vhali.

21 Mu Vhusimbe uVhufinjile yisimviilwe kuuti, “UMWENE uMulungu akuyanga akuti, ‘Ndiyanga na vhantu ivha kutuushila ku vhajeni avha kutali, vhe vhakuyanga injango injeni, ileelo poosye vhwevhulo, te vhahantejeelezye.’”

22 Kuyanga injango injeni te shilolesyo isha maha aga Mulungu ku vhiitisi, nkandi ku vhe te vhiitisi. Ileelo kukuvhwa te shilolesyo sha maha aga Mulungu ku vhe te vhiitisi, nkandi ku vhiitisi.

23 Ishi inga ishivhanza shonti shivhungiine kupuuta, vhonti vhanda kuyanga injango injeni, ahavhaliilizyo hanaaho vhinjila avhantu vhe vhatamanyile, poosye vhe te vhiitisi, vhuli vhatangati muli ni shipena?

24 Ileelo inga avhiitisi vhonti vhakukuvhwa, ahavhaliilizyo hanaaho ayinza umuntu we atamanyile, poosye we te mwitisi, zyonti zye vhakukuvhwa zikumulolesya umuntu uyo kuuti mutalamalandu, na zye azyivwa zikumulonga mu mwoyo waakwe.

25 Zye zili mu mwoyo waakwe, zikuvha apazelu, pe akusugamila nu kumupuuta uMulungu kuuti, “Nalyoli uMulungu ali pahati yiinyu!”


Uluvhaatiho ulwa vhiitisi lwe vhakupuuta

26 Ishi vhamwitu tuti vhuli? Lwe muvhungiine kupuuta, inga wumo ali nu lwimbo nu wamwavho ali ni nsambiilizyo, wumo akwanza kuyanga zye uMulungu amulolesiizye nu wamwavho akuyanga injango injeni nu wamwavho akutantula injango injeni, izi zyonti zivhombehaje mu nsiivho izya kushizenga ishivhanza.

27 Inga vhaliipo vhe vhakuyanga injango injeni, vhayangaje vhavhili, poosye vhatatu, vhatonjelaje kuluusya ipo, vhayangaje wooka wooka, havhili pavhanje umuntu uwa kutantula zye vhakuyanga.

28 Inga ataliipo uwa kutantula, uyo we akuyanga injango injeni, atayangaje mu shivhanza, nkandi ayangaje nu Mulungu mu mwoyo waakwe.

29 Vhoope avhakuvhwi vhakuvhwaje vhavhili, poosye vhatatu, ileelo avhanji vhagalingaje amazwi igo.

30 Inga wooka mu vhe vhakutejeelezya aloleshelwa izya kuyanga kufuma kwa Mulungu, we akuvhwaga akwanzilwa apuume, inga uwamwavho uyo ayanje zye uMulungu amulolesya.

31 Vhonti vhe vhali nu vhukuvhwi vhavhanje na havhaliilizyo aha kukuvhwa, ileelo wooka wooka, inga avhanji vhasambililaje nu kusuvhaalila.

32 Nkuyanga vhwevhulo, mwe pe ishikunjilwa isha kukuvhwa, shikulongolwa na we akukuvhwa.

33 UMulungu wiitu te wa vhuvwalanganu, nkandi wu Mulungu uwa vhutehamu. Inza vwe zili mu vivhanza vwonti ivwa vhafinjile,

34 lwe muvhungiine pooka, avhantanda vhavhanje mwaa, mwe pe vhatakwitishilwa kuyanga, vhavhanje nu mushinzi inza vwe indajizyo izya Moose zikuyanga.

35 Inga vhakwanza kumanya inongwa zimo, vhavhavhuzilizyaje avhalume vhaavho kuhaaya, mwe pe zya nsoni umwantanda kuyanga pa shivhanza.

36 Izwi ilya Mulungu litánzite kuli imwe, havhili litínzile kuli imwe mweka!

37 Inga umuntu akuyilola kuuti mukuvhwi, poosye ali ni shikunjilwa ishamwavho, amanye kuuti, izi zye nkuvhasimbila, ndajizyo kufuma kwa Mwene uYeesu.

38 Inga umuntu akusuufwa izi, woope mumusufwaje.

39 Pe ishi vhamwitu, mukanyilaje kulondola ishikunjilwa isha kukuvhwa, ileelo mutavhadindaje avhantu kuyanga injango injeni.

40 Ileelo zyonti izi zivhombehaje ahinza, havhili ku mbaatiho.

© 2021 Wycliffe Bible Translators, Inc.

Wycliffe Bible Translators, Inc.
Lean sinn:



Sanasan