1 VaKolinti 13 - ULufingwi uLupwa

Ishikunzi

¹ Poosye inga indi ni shikunjilwa isha kuyanga injango zyonti izya vhantu ni zya vhahavhizya, ileelo inga ntali ni shikunzi, injango izyo zitangaavwa naashimo, nkuvha inza ibegeeti, poosye inza ipenga lye likuzuma ahalanga.

² Havhili poosye inga indi ni shikunjilwa isha vhukuvhwi nu kumanyinsanya zyonti zye zili kukwilu nu vhumanyi vhwonti, poosye inga indi nu lwitiho ulupiti ulwa kusaamwa amagamba, ileelo inga ntali ni shikunzi, ntakuvha ni ilonka naalimo.

³ Poosye inga nkufumwa ivwuma vwane vwonti kuuvhapa avhapiina, havhili poosye inga nkuyifumwa umuvhili waane kuuti wupwe pa mwoto, inga ntali ni shikunzi, ntakuvha ni ilonka naalimo.

⁴ Ishikunzi shikumupela umuntu kuvha nu vhujimbiilizu nu kuvha nu lwavwo nu kuuti atavhanje nu mwone na mabaado nu kuuti atayitumvwaje.

⁵ Ishikunzi shikumupela umuntu kuvha nu mushinzi ku vhantu avhanji. Havhili shikumupela umuntu kuuti atasiivhaje zye zyakwe vhweleele, nu kuuti atavitwaje naluvhiilo, nu kuuti atavhanje na hamfwishi mu mwoyo.

⁶ Ishikunzi shikumupela umuntu kuuti ataseshelelaje uvhuvhiivhi, nkandi aseshelaje uvhwanalyoli.

⁷ Ishikunzi shikumupela umuntu kuvha nu vhujimbiilizu mu zyonti, nu kuvha nu lwitiho ahavhaliilizyo honti, nu kuvha nu lusuuvhilo mu zyonti, nu kuuti asimpaje mu zyonti.

⁸ Ishikunzi shitali nu vhusililishilo. Ileelo ivikunjilwa ivinji, poosye ivwa vhukuvhwi nu kuyanga injango injeni nu kuvha nu vhumanyi, vili nu vhusililishilo vhwakwe.

⁹ Nkuyanga vhwevhulo, mwe pe zye tuzimanyile nyinsi, havhili zye tukukuvhwa zyope nyinsi.

¹⁰ Ileelo lwe vhwinza uvhulunjisu, inyinsi izyo ziliisila.

¹¹ Lwe náali ne mwana, nkayangaga ngati ne mwana, nu kumanya ngati ne mwana, nu kusiivha ngati ne mwana. Ileelo lwe navha ne songo, nkazileha izya shaana.

¹² Ishi ahavhaliilizyo iha, tukulola ivintu ngati pa minso pali ahamvuuvhi, ileelo pisinda tulivilola vwonti apazelu. Ahavhaliilizyo iha nkumanya hansi, ileelo ahavhaliilizyo he hakwinza ndiimanya nkaani inza vwe uMulungu amanyile ine.

¹³ Ivintu ivi vitatu, ulwitiho nu lusuuvhilo ni shikunzi te vihaasile naalumo. Ileelo she shipiti muli ivwo, shikunzi.