1 VaKolinti 12 - ULufingwi uLupwa

Ivikunjilwa ivwa Mupepo uMufinjile

¹ Ishi vhamwitu, ntakwanza musyale ishisita kumanya izya vikunjilwa ivwa Mupepo uMufinjile.

² Mumanyile kuuti lwe mwáli te mwe vhiitisi, mwáhopeliilwe nu kulongolwa kupuuta iviholanyo vwe vitakuyanga.

³ Ishi nkuvhavhuuzya kuuti, umuntu wonti we akulongolwa nu Mupepo uwa Mulungu atangayanga kuuti, “UYeesu atifiilwe.” Havhili umuntu wonti we atakulongolwa nu Mupepo uMufinjile atangayanga kuuti, “UYeesu wu Mwene.”

⁴ Viliipo ivikunjilwa ivwa mavhiila mu mavhiila, ileelo uMupepo we akugavha ivikunjilwa ivwo we wewuula.

⁵ Havhili kumuvhombela uMwene kuli ukwa mavhiila mu mavhiila, ileelo uMwene we akuvhombelwa we wewuula.

⁶ Havhili kuvhomba imbombo kuli ukwa mavhiila mu mavhiila, ileelo uMulungu we wewuula we akuuvhapa avhantu vhonti amaha aga kuvhomba imbombo izyo.

⁷ UMupepo uwa Mulungu akuuvhapa avhiitisi vhonti amaha gaakwe, inga vhatulanaje.

⁸ UMupepo uyo akuumupa umuntu wumo ishikunjilwa isha kuyanga amazwi aga vhushindamu uvhwa njeele, uwamwavho akuumupa amazwi aga vhumanyi inza vwe akasiime wuuyo.

⁹ Havhili uMupepo wunuuyo akuumupa wumo ishikunjilwa isha kuvha nu lwitiho nu wamwaho akuumupa ishikunjilwa isha kuponia.

¹⁰ Uwamwavho akuumupa ishikunjilwa isha kuvhomba amafindango nu wamwavho ishikunjilwa isha vhukuvhwi. UMupepo wunuuyo akuumupa umuntu ishikunjilwa isha kumanya zye zikufuma kwa Mupepo uMufinjile na zye zikufuma ku mpepo inkandamanu. Havhili akuumupa uwamwavho ishikunjilwa isha kuyanga injango injeni nu wamwavho kutantula injango izyo.

¹¹ Imbombo zyonti izyo akuzivhomba uMupepo wunuuyo, akuumupa umuntu ishikunjilwa shaakwe inza vwe akasiime wuuyo.

Ivipelwa ivwa muvhili

¹² Inza vwe wuli umuvhili uwa muntu, vwe wuli nu muvhili uwa Chilisiti. Umuvhili wuli wooka, ileelo wuli ni vipelwa ivwinji. Poosye inga ivipelwa ivwo vwinji, vwa muvhili wooka.

¹³ Niiswe swenti, tuvhe twe Vhayuuda, poosye te twe Vhayuuda, tuvhe twe vhazya, poosye twe vhasatushe, twózeliilwe nu kumuposheela uMupepo wooka, inga tuvhe umuvhili wooka.

¹⁴ Nkuyanga vhwevhulo, mwe pe umuvhili wutali ni shipelwa shooka vhweleele, wuli ni vipelwa ivwinji.

¹⁵ Inga ishinama shikuti, “Mwe pe ine te ne nyoovhe, pe te ne shipelwa isha muvhili,” vhuli, shitakuvha shipelwa isha muvhili kuli izyo?

¹⁶ Lyope ikutwi inga likuti, “Mwe pe ine te ne lyinso, te ne shipelwa isha muvhili,” vhuli, litakuvha shipelwa isha muvhili kuli izyo?

¹⁷ Inga umuvhili wonti wuvhanje lyinso, umuntu nkandi akwivwa inza vhuli? Poosye inga umuvhili wonti wuvhanje likutwi, umuntu nkandi akununsya inza vhuli?

¹⁸ Ileelo uMulungu avivhiisile ivipelwa vwonti ivwa muvhili inza vwe akasiime wuuyo.

¹⁹ Inga ivipelwa vwonti vivhanje shipelwa shooka, vhuli, umuvhili nkandi wuli inza vhuli?

²⁰ Ishi, ivipelwa vwinji, ileelo umuvhili wuli wooka.

²¹ Ilyinso litangayivhuuzya inyoovhe kuuti, “Iwe ntakukwanza, mwe pe utanganaavwa naashimo.” Poosye itwe litangavivhuuzya ivinama kuuti, “Imwe ntakuvhanza, mwe pe mutanganaavwa naashimo.”

²² Ileelo ivipelwa ivwa muvhili vwe vikuloleha kuuti viyeyevhazu, vwe vili nu vhumwamu nkaani.

²³ Havhili ivipelwa ivwa muvhili vwe vikuloleha vitali nu vhumwamu, vwe tukuvimwamiha nkaani. Vwope ivipelwa ivwa muvhili vwe vitakwanzilwa kuloleha apazelu, tukuvizyiha nkaani.

²⁴ Havhili ivipelwa vwe vikuloleha kuuti vwinza, tutakuvizyiha inza ivwamwavho. Ileelo uMulungu awuvhatisile umuvhili ahinza, ivipelwa vwe vitakumwamikwa, uweene akuvimwamiha nkaani,

²⁵ inga kutahaavhe kulehaana mu muvhili, ileelo ivipelwa vwonti vwavwanaje.

²⁶ Inga ishipelwa shooka shavwalala, vwonti vikuvwalala pooka nasho. Havhili inga ishipelwa shooka shatiimwa, vwonti vikuvha nu luseshelo pooka nasho.

²⁷ Vhwevhulo, niimwe mwe muvhili uwa Chilisiti, mwenti mwe vipelwa ivwa muvhili uwo.

²⁸ Mu shivhanza, uMulungu ávhavhiisile avhatumwa na vhakuvhwi na vhasambiilizi. Havhili ávhavhiisile vhe vhakuvhomba amafindango na vha shikunjilwa isha kuponia avhavhinu na vha shikunjilwa isha kuvhaavwa avhanji na vha shikunjilwa isha kulongozya na vha shikunjilwa isha kuyanga injango injeni.

²⁹ Vhuli, avhantu vhonti vhatumwa? Avhantu vhonti vhakuvhwi? Avhantu vhonti vhasambiilizi? Avhantu vhonti vhakuvhomba amafindango?

³⁰ Vhuli, avhantu vhonti vhali ni shikunjilwa isha kuponia? Avhantu vhonti vhakuyanga injango injeni? Avhantu vhonti vhakutantula injango izyo?

³¹ Ishi mukanyilaje nkaani kulondola ivikunjilwa vwe vipiti. Ileelo ishi nkwanza imbalolesye idala ilyinza nkaani.