1 VaKolinti 11 - ULufingwi uLupwa

¹ Mundandataje ine, inza vwe niine nkumulandata uChilisiti.

Uluvhaatiho ulwa kupuuta

² Nkuvhatiima, mwe pe mukunkumbuha ku zyonti, nu kulema insambiilizyo zye náposheleeye nu kuvhasambiilizya.

³ Ileelo ishi, nkwanza mumanye kuuti itwe ilya mwanaavuli wonti wu Chilisiti, itwe ilya mwantanda mulume, lyope itwe ilya Chilisiti wu Mulungu.

⁴ Umwanaavuli wonti we akwuvhala lwe akulaavha, poosye lwe akukuvhwa, uyo akumupezya insoni uChilisiti, we litwe lyakwe.

⁵ Woope umwantanda we atakwuvhala kwi itwe lwe akulaavha, poosye lwe akukuvhwa, uyo akumupezya insoni umulume, we litwe lyakwe, mwe pe akuvha inza umwantanda we avheguuye insisi.

⁶ Inga umwantanda atakwuvhala kwi itwe, pe yikwanzilwa avhegule insisi zyakwe. Ileelo, mwe pe zya nsoni kwa mwantanda kuvhegula insisi, kwashi ayuuvhale kwi itwe lyakwe.

⁷ Yitakwanzilwa umwanaavuli kwuvhala kwi itwe, mwe pe uweene shiholanyo isha Mulungu, havhili akulolesya uvhushindamu uvhwa Mulungu. Ileelo umwantanda akulolesya uvhushindamu uvhwa mwanaavuli.

⁸ Nkuyanga vhwevhulo, mwe pe uMulungu atámupezile umwanaavuli kufuma kwa mwantanda, nkandi ámupezile umwantanda kufuma kwa mwanaavuli.

⁹ Havhili uMulungu atámupezile umwanaavuli kuzya mwantanda, nkandi umwantanda kuzya mwanaavuli.

¹⁰ Kuli izyo, havhili na kuzya vhahavhizya, umwantanda akwanzilwa kwuvhala kulolesya amaha.

¹¹ Ileelo kwa Mwene uYeesu, umwantanda akumusuuvhila umwanaavuli, woope umwanaavuli akumusuuvhila umwantanda.

¹² Inza vwe umwantanda ápeziilwe kufuma kwa mwanaavuli, vhwevhulo, woope umwanaavuli ápafwilwe kufuma kwa mwantanda, ileelo uMulungu we ápezile ivintu vwonti.

¹³ Ishi sivhiliili mweneemwe, vhuli, yihondeeye umwantanda kumulaavha uMulungu ishisita kwuvhala kwi itwe?

¹⁴ Yeenya, poosye amavhili giinyu gakulolesya kuuti umwanaavuli inga ali ni nsisi intali zya nsoni ku kwakwe,

¹⁵ ileelo umwantanda kuvha ni nsisi intali, vhushindamu ku kwakwe. Nkuyanga vhwevhulo, mwe pe uMulungu ámupiiye insisi intali, inga zivhe ngati shuuvhalo kwi itwe.

¹⁶ Ileelo inga umuntu wonti akwanza kudalisya, amanye kuuti iswe tutali na maata aganji, nkandi ganaago, poosye ivivhanza ivwa Mulungu vili na ganaago.

Indajizyo kuzya shaakulya isha Mwene

¹⁷ Ishi ku nongwa izyamwavho zye nkwanza kuvhalajizya, ntakuvhatiima, mwe pe lwe mukuvhungaana mutakuvhomba zye zili ni ilonka, ileelo mukuvhomba zye zitali ni ilonka.

¹⁸ Nivuuye kuuti lwe mukuhomaana mu shivhanza mutakwivwana. Muli izyo zye nivuuye, zimo zya nalyoli.

¹⁹ Vhuli, mukusiivha kuuti mukwanzilwa musugaane? Vhuli, mukwanza vhamanyishe vhe vhakuyilola kuuti vhitishiliilwe pilongolela ilya Mulungu?

²⁰ Yeenya, lwe mukuhomaana pooka, mukulya ishaakulya isha Mwene inza vwe yitakwanzilwa,

²¹ mwe pe lwe mukulya, avhantu vhonti vhakulya ishaakulya shaavho ishisita kugulililana. Kuli izyo, vhamo vhakusyala ni nzala na vhamwavho vhakuholwa.

²² Vhuli, mutali ni nyumba zyinyu zye mungatendama kulya nu kumwela? Shooni she mukushisuufwa ishivhanza isha Mulungu nu kuvhasuupizya vhe vhatali ni shintu naashimo? Vhuli, imbavhuuzye ishooni? Vhuli, imbatiime? Ndaali! Kuli izyo, ntakuvhatiima.

²³ Nkuyanga vhwevhulo, mwe pe insambiilizyo zye náposheleeye kwa Mwene uYeesu, zye návhapiiye imwe. Návhavhuziizye kuuti uvhusiku vhuula vhwe vhámwaniliiye uMwene uYeesu, ányatuuye ikaati,

²⁴ ahamusalifwa uMulungu, ahalimensula, ahayanga ahati, “Nyatuuli mulye, uno we muvhili waane we nkuwufumwa ku zyinyu. Muvhombaje vhwevhulo, kunkumbuha ine.”

²⁵ Lwe vhaalya, ahavhomba havhili sheshiila, ahanyatula ulupindi lwe lwáli ni divaayi, ahati, “Ulupindi ulu lufingwi ulupwa lwe lukuvhombeha ku mavhanda gaane, ahavhaliilizyo honti lwe mukumwela, muvhombaje vhwevhulo kunkumbuha.”

²⁶ Yeenya, lwe mukulya ikaati ili nu kumwelela ulupindi ulu, mukupela mukukumusya uvhufwe uvhwa Mwene uYeesu kufishila lwe aliyinza.

²⁷ Umuntu wonti we akulya ikaati ili, nu kumwela idivaayi ino, kwi idala lye litakwanzilwa pilongolela ilya Mwene uYeesu, akupela avhomba uvhutalamalandu, mwe pe akupela awusuufwa umuvhili na mavhanda aga Mwene.

²⁸ Avhantu vhonti vhayivhuzilizyaje vhuuvho mu mooyo gaavho, pe vhalyanje ikaati nu kumwelela ulupindi.

²⁹ Inga umuntu akulya ikaati nu kumwelela ulupindi ishisita kushindiha kuuti muvhili uwa Mwene, uyo akuyitupula wuuyo mu vhulonzi uvhwa Mulungu.

³⁰ Ye nongwa pahati yiinyu vhaliipo avhantu avhinji avhavhinu na vhayeyevhazu, havhili vhamo vhafuuye.

³¹ Ileelo inga tuyivhuzilizyaje sweneeswe lwe tushiili kulya, uMulungu nkandi atatulonzile.

³² Ileelo lwe uMwene akutulonga, akuutupa isunde, inga tutahinze tupeelwe isunde pooka na vhantu avha mu nsi umu.

³³ Kuli izyo vhamwitu, lwe muvhungiine kulya, mugulililanaje.

³⁴ Inga umuntu ali ni nzala, alyanje ku kwakwe, inga kuvhungaana kwinyu kutahinze kuvhapelele kulongwa. Lwe ninza kuli imwe, ndiyinza inziyaayanie zye zyasyala.