1 VaKolinti 1 - ULufingwi uLupwa

Umulaamu

¹ Ukalaata uno nsimvile neene ne Paavhuli, ne uMulungu aniisite kuuti mbe ne mutumwa uwa Chilisiti uYeesu ku lukasamo lwakwe. Ine nu wamwitu uSositeeni,

² tukuvhalamuha imwe, mwe vha mu shivhanza isha Mulungu, she shili mu nkaaya iya Kolinto, imwe mwe uMulungu avhasavhuuye kuvha nu vhuliilani nu Chilisiti uYeesu. Mwisiitwe kuvha mwe vhafinjile pooka na vhantu vhonti avha mu mbazu zyonti vhe vhakumulaavha uYeesu Chilisiti, uweene we wu Mwene waavho havhili wiitu niiswe.

³ UTaata wiitu uMulungu, nu Mwene uYeesu Chilisiti, vhavhafwilaje uvhwila nu kuuvhapa uvhutehamu.

UPaavhuli akumusalifwa uMulungu

⁴ Nkumusalifwa uMulungu waane insiku zyonti ku zyinyu, mwe pe avhafwiliiye uvhwila mwa Chilisiti uYeesu.

⁵ Yeenya, kwi idala ilya Chilisiti mupeliilwe uvhudumbwe uvhwa vikunjilwa vwonti, mu hayanjile hiinyu na mu vhumanyi vhwinyu.

⁶ Uvhudumbwe vhwinyu uvhwo, vhukuhomeshezya kuuti, Izwi iLyinza ilya Chilisiti lye twálumbiliiye kuli imwe lya nalyoli.

⁷ Poosye ishi mutasovheliilwe ishikunjilwa inga shooka isha Mupepo uMufinjile, lwe mukuguliilila kugaluha ukwa Mwene wiitu uYeesu Chilisiti.

⁸ UMulungu kwe avhagomwe kufishila kumpeleela, inga mutahinze mulongwe kuuti te mwe vhagolosu isiku liila lye uMwene wiitu uYeesu Chilisiti aliyinza kuvhalonga avhantu.

⁹ UMulungu alivhomba izi, mwe pe uweene mutungamu. Uweene we ahavhiita imwe, kuuti muvhe nu vhuliilani nu Mwana waakwe uYeesu Chilisiti uMwene wiitu.

Uvhuliilani mu mpuga iya vhiitisi

¹⁰ Ishi vhamwitu, nkuvhalambiilizya kwi izina ilya Mwene wiitu uYeesu Chilisiti kuuti muvhe mwe vhantu mwe mukwivwana, ipo pe kwe muvhe nu vhuliilani. Mutapagulanaje, nkandi muvhanje ishintu shooka ku zye mukusiivha havhili nu kuvha nu mwoyo wooka.

¹¹ Vhamwitu, avhantu vhamo avha mu nyumba iya Kuloowe vhambuziizye kuuti kuli imwe kuli ivho.

¹² Ishi zye nkwanza kuyanga zye zino: Vhonti muli imwe vhakuyanga izyavho, vhamo vhakuti, “Iswe swe vha Paavhuli.” Avhamwavho vhakuti, “Iswe swe vha Apoolo.” Avhamwavho vhakuti, “Iswe swe vha Keefa.” Avhamwavho vhakuti, “Iswe swe vha Chilisiti.”

¹³ Vhuli, mukuvhomba ahinza kuyipagulanya impuga iya Chilisiti inza vhwevhulo? Vhuli, uPaavhuli we áfuuye pa shihovhenkanyo ku zyinyu? Vhuli, mwózeliilwe kwi izina ilya Paavhuli?

¹⁴ Nkumusalifwa uMulungu, mwe pe ntámwoziizye umuntu uwunji kuli imwe, nkandi we Chiliisipo nu Gaayo.

¹⁵ Kuli izyo, ataliipo umuntu we angayanga kuuti ayozeliilwe kwi izina lyane.

¹⁶ Havhili nakumbuha kuuti návhoziizye avhantu avha mu nyumba iya Siteefani. Ivho vhe návhoziizye, ntakukumbuha inga námwoziizye umuntu uwamwavho uwunji.

¹⁷ UChilisiti atánsonteleziizye kwozya avhantu. Ánsoteleziizye kulumbiilila Izwi iLyinza, ishisita kusuuvhila uvhushindamu vhwane uvhwa njeele uvhwa kuyanga ahinza. Inga navhomba ilyo, yiliivha ngati uvhufwe uvhwa Chilisiti pa shihovhenkanyo vhutali na maha.

Uvhushindamu uvhwa njeele uvhwa Mulungu na maha gaakwe

¹⁸ Inongwa izya kufwa uChilisiti pa shihovhenkanyo, vhe vhakuteega vhakulola vhwalangani, ileelo iswe twe tukupokwa, maha ga Mulungu.

¹⁹ Yeenya, yisimviilwe mu Vhusimbe uVhufinjile kuuti, “Avhantu vhe vhali nu vhushindamu uvhwa njeele ndinanganya uvhushindamu vhwavho uvhwa njeele, vhoope avha njeele ndizihaana injeele zyavho.”

²⁰ Ishi vhali kwoshi avhashindamu avha njeele? Vhali kwoshi avhasambiilizi avha ndajizyo izya Moose? Vhali kwoshi vhe vhali nu vhumanyi uvhwa kuyanga ahinza ahavhaliilizyo iha? UMulungu alolesiizye apazelu kuuti uvhushindamu uvhwa njeele uvhwa mu nsi umu, vhwalangani.

²¹ Yeenya, kulandatana na vwe vhuli uvhushindamu uvhwa njeele uvhwa Mulungu, avhantu avha mu nsi umu vhatangamumanya uMulungu ku vhushindamu vhwavho uvhwa njeele. Ileelo uMulungu asungwilwe kuvhapoha vhe vhakumwitiha uYeesu we iswe tukukumusya intumi yaakwe. Avhantu vhe vhatakumwitiha uYeesu vhakulola intumi iyo ya vhwalangani.

²² Nkuyanga vhwevhulo, mwe pe aVhayuuda vhakwanza ishilolesyo, inga vhiitishe, vhoope aVhayunaani vhakwanza uvhushindamu uvhwa njeele.

²³ Ileelo iswe tukumukumusya uChilisiti we áfuuye pa shihovhenkanyo. Intumi iyo aVhayuuda yikuvhapunuzya, havhili ku vhe te Vhayuuda vhwalangani.

²⁴ Ileelo ku vhaala vhe uMulungu avhiisite kuvha vhantu vhaakwe, vhavhe Vhayuuda, poosye vhe te Vhayuuda, uChilisiti maha aga Mulungu, havhili vhushindamu uvhwa njeele uvhwa Mulungu.

²⁵ Yeenya, zye avhantu vhakulola kuuti vhwalangani uvhwa Mulungu, zipoosite uvhushindamu uvhwa njeele uvhwa vhantu. Havhili zye vhakulola kuuti vhuyeyevhazu uvhwa Mulungu, zili na maha kuluusya amaha aga vhantu.

²⁶ Ishi vhamwitu, mukumbushe vwe mwáli lwe uMulungu ahavhiitaga. Avhinji muli imwe vhahalolehaga ngati vhatali nu vhushindamu uvhwa njeele pilongolela ilya vhantu. Havhili avhinji muli imwe, vhatáali vhamwamu, vhatápafwilwe mu nyumba izya vhashindamu.

²⁷ Ileelo uMulungu ávhasavhuuye avhantu vhe mu nsi vhakuloleha vhalangani, inga avhasuupizye vhe vhakuloleha vhali nu vhushindamu uvhwa njeele. Havhili uMulungu ávhasavhuuye avhantu vhe mu nsi vhakuloleha vhayeyevhazu, inga avhasuupizye vhe vhakuloleha vhali na maha.

²⁸ UMulungu ávhasavhuuye avhantu avha pa nsi vhe avhantu vhahavhasuufwa, vhe vhakuloleha ngati te vhantu, inga alolesye kuuti avhantu vhe vhakuloleha kuuti vhasuuvhilwa nkaani, vhatali ni ilonka naalimo ku kwakwe.

²⁹ Ávhomvile vhwevhulo, inga atahaavhe umuntu wonti uwa kuyitumvwa pilongolela ilya Mulungu.

³⁰ UMulungu wuuyo we avhavhiisile imwe kuvha nu vhuliilani nu Chilisiti uYeesu. Uweene amuvhiisile uChilisiti kuvha vhushindamu vhwitu uvhwa njeele. Havhili kwi idala ilya Yeesu, iswe tuvhaziliilwe kuuti twe vhagolosu pilongolela ilya Mulungu, twe vhafinjile, havhili tutavhuliilwe.

³¹ Izi zili inza vwe yisimviilwe mu Vhusimbe uVhufinjile kuuti, “Umuntu wonti we akuyitumvwa ayitumvwaje kuzya MWENE uMulungu.”