1 Timoti 6 - ULufingwi uLupwa

Zye zikwanzilwa ku vhazya vhe vhali mu shivhanza

¹ Avhazya vhonti, vhakwanzilwa kuuti vhavhashindihaje avhamwene vhaavho ku mushinzi wonti, inga izina ilya Mulungu litahinze lisaamulwe pooka ni nsambiilizyo zye tukusambiilizya.

² Inga avhamwene vhaavho vhiitisi, avhazya vhatavhasufwaje, mwe pe vhamwavho. Nalyoli vhakwanzilwa kuuti vhonjezyaje kuvhavhombela ahinza, mwe pe ivho vhe vhakulonka mu mbombo yaavho iya vhuzya, vhakuvha vhamwavho, havhili vhe vhankundwa vhaavho. Uvhasambilizyaje avhantu vhonti mu shivhanza amazwi igo nu kuvhasoha.

Insambiilizyo izya ilenga nu vhudumbwe uvhwa nalyoli

³ Kuli avhantu vhe vhakusambiilizya amazwi aga ilenga, ge gatakuvhalilana na mazwi aga vhulanzi aga Mwene wiitu uYeesu Chilisiti, ni nsambiilizyo zye zitakuvhaavwa avhantu kuvha nu lujendo ulwinza pilongolela ilya Mulungu.

⁴ Avhantu ivho vhakuyitumvwa vhweleele, vhatazimanyile naazimo, vhakwanza kudalinkana shaaha ku mazwi aga kuyitumvwa. Uvhwo vhwe vhwandilo uvhwa vhantu kuvha nu mwone ni ivho ni ndigo nu kuvhasivhiilila havhiivhi avhamwavho

⁵ nu kudalinkana na vhamwavho shiima. Avhantu ivho zye vhakusiivha, mbiivhi, vhatali nu vhwanalyoli. Vhakusiivha kuuti kuvha nu lujendo ulwinza pilongolela ilya Mulungu lye lidala ilya kulyaga ilonka.

⁶ Nalyoli, vhonti vhe vhali nu lujendo ulwinza pilongolela ilya Mulungu nu kwitiha mu mooyo gaavho kuuti vwe vhali navwo vikwiliiye, vhalilyaga ilonka ipiti.

⁷ Lwe tukupaapwa mu nsi umu, tutínzile nasho naashimo. Havhili shitaliipo naashimo she tulinyatula, lwe tukwepa mu nsi umu.

⁸ Inga twavha ni vwakulya na menda, twitihaje mu mooyo giitu kuuti vwe tuli navwo vikwiliiye.

⁹ Ileelo avhantu vhe vhakwanza kulonka ivwuma kuvha vhe vhadumbwe, vhakuyinjizya mu ndingo nu kulemwa mwi ilivha na mu mpapilo inyinji izya kuvwalazya. Impapilo izyo zikuvhakwesela mu vhunanjisu, vhakusilila umwo.

¹⁰ Yeenya, kusungwa impiiya, vhwe vhwandilo uvhwa mbiivhi zyonti. Vhaliipo avhantu vhamo vhe vhazisungwilwe nkaani impiiya, zivhapeleeye kuuti vhaluleshe ulwitiho lwavho, vhavwalaziizye amooyo gaavho ku vhuswimiilizu nkaani.

UPaavhuli akumusoha uTiimoti

¹¹ Ileelo iwe we muntu wa Mulungu, uzishimbile izyo zyonti. Ulandate ku mute ingolosu nu lujendo ulwinza pilongolela ilya Mulungu nu lwitiho ni shikunzi nu vhujimbiilizu nu vhutonsu.

¹² Uyikungulaje nkaani ku vhulugu uvhwinza uvhwa kulwila ulwitiho lwitu, inga uhavhwaje uvhulanzi uvhwa shiima shiima. Uvhulanzi uvhwo vhwe uhiitilwa nu Mulungu, lwe wiitiha ulwitiho lwaho kwa Yeesu pilongolela ilya vhahoome avhinji.

¹³ Nkukulajizya pilongolela ilya Mulungu we akuuvipa vwonti uvhulanzi, na pilongolela ilya Chilisiti uYeesu, we áfumwizye uvhwahoome uvhwa nalyoli pilongolela ilya Pontiyo uPilaato ishisita ilyoga kuuti,

¹⁴ uzishindihaje indajizyo izyo ishisita kupuvha, poosye kukwinkwinwa, kufishila pe uMwene wiitu uYeesu Chilisiti aliyinza havhili.

¹⁵ Kwinza kwakwe kuliivha ahavhaliilizyo he uMulungu wuuyo ámuvhishiiye. Uweene wu Mulungu uwa Vhushindamu we akukonzya wuuyo weeka! Havhili wu Mwene uwa vhamwene na vhapiti.

¹⁶ Uweene weeka we atakufwa, akutendama mu vhuzelu vhwe naawumo atangavhupalamila. Ataliipo umuntu we ahamulola, havhili ataliipo we ahondeeye kumulola. Uweene wa mushinzi na maha aga shiima! Amina!

Insoshi izya Paavhuli ku vhadumbwe

¹⁷ Uvhalajizye avhadumbwe mu nsi umu kuuti vhatayitumvwaje, nu kuuti vhatavhiihaje ulusuuvhilo lwavho mu vintu vwe vhali navwo, mwe pe ivwa mu nsi umu vikuvha vwavho ku havhaliilizyo hansi vhweleele. Uvhasohaje kuuti vhavhiihaje ulusuuvhilo lwavho kwa Mulungu, we akuutupa ivintu vwonti ku vhwinji, inga tuvhanje nu luseshelo.

¹⁸ Havhili, uvhavhuzyaje kuuti vhavhombaje inyinza, inga vhavhe vhe vhadumbwe ku nyinza. Vhavhanje nu vhwila uvhwa kuvhaavwa avhanji ni vwuma vwavho ku mwoyo uwa luseshelo.

¹⁹ Vhwevhulo, pe vhaliivha vhayisenguliiye ivwa havhaliilizyo he hakwinza, vwe viliivha lwalo ulwa kuvhagomwa, inga vhahavhwaje uvhulanzi uvhwa nalyoli.

Amazwi aga kulagana

²⁰ Iwe Tiimoti, imbombo iya kuvhasambiilizya avhantu uvhwanalyoli, ye uMulungu akupiiye, uyivhombaje ahinza. Utagitihaje amazwi aga kuyitumvwa ge gatakufuma kwa Mulungu. Yeenya, gakuyangwa kuuti ga vhusambiilile, ileelo te ga nalyoli haa, nkandi ga kunanganya uvhwanalyoli.

²¹ Vhaliipo avhantu vhamo vhe vhakuyitumvwa kuuti vhasambiilile, ileelo vhalulesile ulwitiho ulwa nalyoli. UMulungu avhafwilaje uvhwila imwe mwenti.