1 Timoti 5 - ULufingwi uLupwa

Insoshi ku vhantu avha shivhanza

¹ Utamupililaje umwanaavuli umugoosi, nkandi umusohaje ngati wu taata waaho. Uvhasohaje avhajaaha ngati vhanine vhaaho na

² vhantanda avhagoosi vhe vhamaayi vhaaho. Vhoope avhalindu uvhasohaje ku mwoyo umugolosu ngati vhanine vhaaho.

Ulwavwo ku vhaziishe

³ Avhaziishe vhe vhatali na vha kuvhaavwa vhe uvhavwaje.

⁴ Ileelo inga umuziishe ali na vhaana, poosye avhazukulu, ivho vhasambililaje kuvhaavwa suuti avhaziishe avha mu nyumba zyavho. Vhwevhulo, vwe kwe vhavhanje ngati vhakugalusya vwe avhapaafi vhaavho vhávhavhombeeye, izyo zye nyinza pilongolela ilya Mulungu.

⁵ Umuziishe wonti we atali na vha kumwavwa, uweene avhiisile ulusuuvhilo lwakwe kwa Mulungu weeka, akulaavha kuuti amwavwaje uvhusiku nu musanya.

⁶ Ileelo umuziishe we akunyonywa izya mu nsi, uweene akuvha afuuye, poosye she mupuuma.

⁷ Zyope izyo uvhavhuzyaje avhiitisi, inga vhatakwinkwinwaje naashimo.

⁸ Ileelo umuntu we atakuvhaavwa avhajenzi avha mu luho lwakwe, inkaani avha mu nyumba yaakwe, uyo akuvha aluhaanile ulwitiho lwakwe, havhili muvhiivhi kuluusya avhantu vhe vhatitisile.

⁹ Umwantanda umuziishe we ahondeeye kusimbwa mwi ikalaata ilya vhaziishe we akwanzilwa kumwavwa. Avhanje afisiizye amaaha 60, havhili mwantanda we áali nu mulume wooka.

¹⁰ Avhanje amanyisile kuuti avhombaga imbombo inyinza, inza kusunga avhaana vhaakwe ahinza nu kuposheela avhajeni nu kuvhaavwa avhafinjile ku vhutonsu nu kuvhaavwa vhe vhali mu mayimba nu kuyifumwa ku mbombo izinji zyonti inyinza.

¹¹ Ileelo avhaziishe avhalindu utavhasimbaje mwi ikalaata ilyo, mwe pe kuli ahavhaliilizyo he vhangaalemwa ni mpapilo izya mu mavhili gaavho, vhanganda kunyonywa kunyatulwa havhili, kuluusya kuyifumwa kwa Chilisiti.

¹² Kuli izyo, vhakuyipelela kulongwa, mwe pe vhakuvha vhaluleha ulufingwi lwavho kwa Chilisiti, ulwa kusyala ishisita kunyatulwa havhili.

¹³ Pooka ni zyo, vhanganda kujendanga mu nyumba zya vhantu kuzya vhuhata. Te ziniizyo zyeka haa, nkandi nu kukwakwasya nu kuyanga zye zitahondeeye na zye te nyinza.

¹⁴ Izyo zye zikumbiiha injanje kuuti avhaziishe vhe vhalindu vhanyatulwaje. Vhapaapaje avhaana nu kusunga inyumba zyavho, inga vhatahinze vhaamupe umulugu idala ilya kutusaamula.

¹⁵ Nkuyanga vhwevhulo, mwe pe kuli avhaziishe vhamo vhateezile nu kumulandata uSeetano.

¹⁶ Inga umwantanda we amwitisile uChilisiti ali na vhaziishe mu nyumba yaakwe, uyo akwanzilwa kuvhaavwa, inga vhatashisuvhalilaje ishivhanza. Pe ishivhanza shivhavwaje avhaziishe vhe vhatali na vha kuvhaavwa.

Zye zikwanzilwa ku vhasongo avha shivhanza

¹⁷ Avhasongo vhe vhakulongozya ishivhanza ahinza, yikwanzilwa kuuti vhashindikwaje nu kupeelwa amalipilo aminza ku mbombo zyavho. Zivhombehaje vhwevhulo, inkaani ku vhaala vhe vhakuyifumwa kuvhalumbiilila nu kuvhasambiilizya avhantu izwi ilya Mulungu.

¹⁸ Yeenya, yisimviilwe mu Vhusimbe uVhufinjile kuuti, “Utayipinyaje ingʼombe kwi ilomu lwe yikuhanyanjila ingana kupantula insanga pa luvhuga.” Havhili yisimviilwe kuuti, “Umuvhomvi akwanzilwa amalipilo gaakwe.”

¹⁹ Inga usongo uwa shivhanza akuyangwa ku nongwa zimo, utazyitihaje she vhashiili kuhomeshezya avhantu vhavhili, poosye vhatatu.

²⁰ Avhasongo vhe vhakuvhomba uvhutalamalandu, uvhapililaje pilongolela ilya vhantu vhonti, inga avhanji vhogopaje kuvhomba.

²¹ Nkukulajizya pilongolela ilya Mulungu na pilongolela ilya Chilisiti uYeesu na vhahavhizya vhaakwe avhasaavhulwa, kuuti uzilandataje izyo ishisita kusavhulanya avhantu.

²² Utahalambanaje kumuvhiishila umuntu inyoovhe kuvha wu songo. Inga umuntu uyo ali nu lujendo uluvhiivhi, pe niiwe ukuvha pooka nawo mu vhutalamalandu vhwakwe. Utayinjizyaje mu vhutalamalandu, pe kwe uvhe we muzelu.

²³ Kwandila ishi, utamwelaje ge minzi vhweleele, umwelaje ni divaayi nyinsi, mwe pe uli nu vhuvhinu uvhwa muhati, na mavhinu aganji gakukugalushila vhwila vhwila.

²⁴ Uvhutalamalandu uvhwa vhantu vhamo vhuli apazelu, vhuliloleha she vhashiili kufiha mwi ilonjelwi, ileelo uvhutalamalandu uvhwa vhamo vhuzyihiime, vhuliloleha pisinda.

²⁵ Vhwevhulo, imbombo inyinza zikuloleha apazelu, zyope zye zizyihiime ziliivha apazelu.