1 Timoti 4 - ULufingwi uLupwa

Insambiilizyo izya ilenga

¹ UMupepo uMufinjile akutuvhuuzya ishisita kuzyiha kuuti amanda iga aga kumpeleela, avhantu vhamo kwe vhagaleshe amazwi aga lwitiho. Vhalizitejelezyaga impepo imbiivhi zye zikuhopela, nu kuzilandata insambiilizyo zyavho.

² Insambiilizyo izyo zikwinza na vhe vhakuyanga izya ilenga ku shifumbo. Amooyo gaavho amavhiivhi gatangalonga imbiivhi zyavho.

³ Vhakuvhahaana avhanaavuli kuuti vhatimalaje, na vhantanda kuuti vhatimalwaje. Vhakuvhalajizya avhantu kuuti vhatalyanje ivwakulya vimo. Ileelo uMulungu ávipezile, inga avhantu vhe vhakumwitiha vhaviposheelaje nu kusalifwa, mwe pe avheene vhavhumanyile uvhwanalyoli.

⁴ Vwonti vwe uMulungu ávipezile vwinza, vitaliipo ivwa kuvihaana inga vwaposheelwa ku mpuuto izya kusalifwa.

⁵ Nkuti vwinza, mwe pe uMulungu avizelufwizye kwi izwi lyakwe na ku mpuuto zyitu.

Umuvhomvi umwinza uwa Yeesu Chilisiti

⁶ Uvhavhuzyaje avhamwitu izyo, pe kwe uvhe we muvhomvi umwinza uwa Chilisiti uYeesu, havhili we usunjiliilwe ahinza mu vhwanalyoli uvhwa lwitiho ni nsambiilizyo inyinza izyo zye ukuzilandata.

⁷ Uvihaanaje ivwili ivwa vhasongo vwe vitali ni ilonka, nkandi uyiluvhizyaje weneewe kuvha nu lujendo ulwinza pilongolela ilya Mulungu.

⁸ “Inga umuntu akuyiluvhizya umuvhili waakwe nkaani kuuti wuvhe na maha, akuvha ni ilonka linsi vhweleele. Ileelo inga akuvha nu lujendo ulwinza pilongolela ilya Mulungu, akulyaga ilonka mu zyonti, mu vhulanzi uvhwa pa nsi ipa nu vhwa havhaliilizyo he hakwinza.”

⁹ Ili lizwi lya nalyoli lye tukwanzilwa tulyitihaje ku mwoyo wonti.

¹⁰ Inongwa izyo zye zikutuvhiiha kuuti tuyifumwaje kuvhomba imbombo, mwe pe iswe tuvhiisile ulusuuvhilo lwitu kwa Mulungu we mulanzi, havhili we Muposhi uwa vhantu vhonti vhe vhamwitisile.

¹¹ Izyo zye nakuvhuuzya, uvhalajizye avhantu nu kuvhasambiilizya kuuti vhazilandataje.

¹² Atahaavhe umuntu uwa kukusuufwa, mwe pe we mujaaha, nkandi uvhe we shiholanyo ishinza ku vhiitisi, mu hayanjile haaho na mu lujendo lwaho na mu shikunzi shaaho na mu lwitiho lwaho na ku mwoyo waaho umugolosu.

¹³ Uvhe nu mute kuvhavhaazizya avhantu uVhusimbe uVhufinjile, havhili uvhagomwaje amooyo nu kuvhasambiilizya. Uvhombaje izyo shiima kufishila ahavhaliilizyo he ndiyinza.

¹⁴ Utahaaleshe kushivhombela ishikunjilwa she uMulungu akupiiye, ku mazwi aga vhakuvhwi, ahavhaliilizyo he avhasongo vhákuvhishiiye inyoovhe zyavho.

¹⁵ Uvhombaje izyo ku mute waaho wonti, shiima ulujendo lwaho luvhanje apazelu ku vhantu vhonti.

¹⁶ Uyenyaaje vwe ukulandila na mazwi ge ukusambiilizya. Inga ukuvhomba izyo, pe kwe uyiposhe nu kuvhapoha vhe vhakukutejeelezya.