1 Timoti 3 - ULufingwi uLupwa

Zye zikwanzilwa ku vhimiilizi avha shivhanza

¹ Kuli izwi ilya nalyoli lye likuti, “Inga umuntu akunyonywa imbombo iya kuvha mwimiilizi uwa shivhanza, akunyonywa imbombo inyinza.”

² Ileelo umwimiilizi akwanzilwa avhe muntu we atakukwinkwinwa. Avhe nu mushi wooka vhweleele. Avhe muntu we akuyikonzya nu kuvha nu vhutimvu, havhili we avhantu vhakumushindiha. Avhe muntu we mutesi ku vhajeni na we amanyile kusambiilizya.

³ Atahaavhe wu shimwela, poosye kuvha wa ivho, nkandi avhe muntu we mutonsu. Havhili atahaavhe mupapizi uwa mpiiya.

⁴ Akwanzilwa ayimilililaje inyumba yaakwe ahinza, nu kuvhasambiilizya avhaana vhaakwe ulujendo ulwinza nu kuuti vhavhanje nu mushinzi.

⁵ Inga umuntu akupootwa kuyimililila inyumba yaakwe, angashimililila vhuli ishivhanza isha Mulungu?

⁶ Atahaavhe muntu we ayinjiiye shiniishi mu lwitiho, inga atahinze ayitumvwe nu kugwila mu vhutalamalandu. Pe alongwe inza vwe uMukwalanzi woope álonziilwe.

⁷ Havhili, yikwanzilwa vhe te vhiitisi vhamuyanjilaje inyinza, inga atahakwinkwinwe nu kugwila mwi ilivha ilya Mukwalanzi.

Zye zikwanzilwa ku vhatuuli avha shivhanza

⁸ Vhwevhulo, avhatuuli avha shivhanza vhakwanzilwa kuuti avhantu vhavhashindihaje. Vhatavhanje ni ilenga, havhili vhatavhanje vhe vhashimwela, poosye kuvha vhapapizi avha mpiiya.

⁹ Vhavhanje vhantu vhe vhakulema uvhwanalyoli uvhwa lwitiho lwitu ku mwoyo umuzelu.

¹⁰ Yikwanzilwa kuvhenyeelezya mu mbombo, inga vhaloleha kuuti vhahondeeye, pe vhitishilwaje mu mbombo iyo iya vhutuuli.

¹¹ Vhwevhulo, avhashi vhaavho, vhoope vhakwanzilwa kuuti avhantu vhavhashindihaje. Vhatavhanje vhakwakwa, nkandi vhayikonzyaje nu kuvha vhatungamu ku zyonti.

¹² Umutuuli wonti uwa shivhanza avhanje nu mushi wooka vhweleele. Havhili akwanzilwa avhimilililaje avhaana vhaakwe ahinza, pooka na vhanji vhonti avha mu nyumba yaakwe.

¹³ Vhaala vhe vhakuvhomba ahinza imbombo iya vhutuuli, avhantu vhakuvhashindiha, havhili vhakuvha nu vhudandamazu kuyanga zye vhitisile mwa Chilisiti uYeesu.

UMulungu atwiguliiye imbombo impiti izya Yeesu

¹⁴ Nkukusimbila ukalaata uno, she ndi nu lusuuvhilo ulwa kwinza ku kwaho shiniishi.

¹⁵ Inga nahaavha, nkwanza kuuti umanye ahinza zyonti zye zikwanzilwa ku vhantu avha Mulungu. Ivho vhe shivhanza isha Mulungu uMulanzi, uweene we lupanda nu lwalo ulwa nalyoli.

¹⁶ Nalyoli, zye uMulungu atulolesiizye, iswe tukwitinkana kuuti zya kusukumizya, havhili zye zino: UChilisiti álolesile nu muvhili uwa vhuntu, uMupepo uMufinjile ahahomeshezya kuuti mugolosu. Avhahavhizya vhahamulola. Amazwi gaakwe gahakumuha ku vhantu avha mu nsi zyonti, vhoope vhahamwitiha. UMulungu ahamunyatula kusogola ku mwanya ku vhushindamu vhwakwe.