1 Timoti 2 - ULufingwi uLupwa

Zye zihondeeye kuvhomba mu shivhanza

¹ Ululajizyo lwane ulwa kwanda, nkuvhalajizya kuuti mumulaavhaje uMulungu, musalifwaje ku mpuuto na ku ndaavho zyonti ku vhantu vhonti.

² Muvhalavhilaje avhamwene na vhalongozi avhanji vhonti, inga tulandilaje ku vhutehamu, lwe tukuvha nu lujendo ulwinza nu kuvhomba zye zihondeeye pilongolela ilya Mulungu.

³ Izyo zye nyinza, havhili zye zikumuhondezya uMulungu uMuposhi wiitu.

⁴ Uweene akwanza avhantu vhonti vhapokwe nu kuuti vhavhumanye uvhwanalyoli.

⁵ Tumanyile kuuti izyo zye zya nalyoli, mwe pe aliipo uMulungu wooka vhweleele, havhili kuli wooka we akuvhakundanya avhantu nu Mulungu, we muntu uChilisiti uYeesu.

⁶ Uweene áyifumwizye kuuti afwe kuvhatavhula avhantu vhonti. Uvhwo vhwe vhwahoome vhwe uMulungu ahomesheziizye ku havhaliilizyo he hahondeeye.

⁷ Ku vhwahoome uvhwo, mbisiilwe kuvha ne hakumusya havhili ne mutumwa, kuzya kusambiilizya avhantu vhe te Vhayuuda kuuti vhoope vhamwitishe mu vhwanalyoli. Izi zye nkuyanga zya nalyoli, te zya ilenga!

⁸ Ishi, ponti pe muvhungiine kupuuta, nkwanza avhanaavuli vhavhusyaje inyoovhe zyavho zye zizelufile kumulaavha uMulungu ku mwoyo umwinza ishisita umulaha na madali.

⁹ Vhoope avhantanda, nkwanza kuuti vhayikonzyaje, nu kuvha nu mushinzi, kuzwala kwavho amenda, kuvhanje kwi idala lye lihondeeye pilongolela ilya vhantu. Kuyiyemvwa kwavho kutahavhanje kwi idala ilya kutavha insisi, poosye kuzwala amayembo aga sahaabu ge gakunyengʼenyela, poosye amenda aga nsavho.

¹⁰ Ileelo kuyiyemvwa kwavho kuvhanje ku lujendo ulwinza, inza vwe yikwanzilwa ku vhantanda vhe vhakupemula kuuti vhakumunyila uMulungu.

¹¹ Avhantanda vhakwanzilwa vhavhanje ishimwamwa ku mushinzi ahavhaliilizyo he vhakusambiilila.

¹² Ntakwitiha umwantanda kusambiilizya nu kumukonzya umwanaavuli, nkandi avhanje wa kutejeelezya.

¹³ Nkuyanga vhwevhulo, mwe pe uAadamu we átalisile kupelwa, pe uEeva ahalandata.

¹⁴ Havhili, te wu Aadamu we áhopenkiinywe, nkandi uEeva we áhopenkiinywe, ahavha mutalamalandu.

¹⁵ Ileelo avhantanda vhalivhwaga uvhuposhi kwi idala lya kupaapa kwavho, inga vhakujendeelela kuvha nu lwitiho ni shikunzi, nu lujendo nu mwoyo umuzelu nu kuyikonzya.