1 Timoti 1 - ULufingwi uLupwa

UPaavhuli akumulamuha uTiimoti

¹ Ukalaata uno nsimvile neene ne Paavhuli. Ine ne mutumwa uwa Chilisiti uYeesu, kufumiilana ni ndajizyo izya Mulungu uMuposhi wiitu, nu Chilisiti uYeesu we lusuuvhilo lwitu.

² Ine nkukusimbila iwe Tiimoti, we mwana waane nalyoli mu lwitiho. UTaata uMulungu nu Mwene wiitu uChilisiti uYeesu, vhakufwilaje uvhwila nu kuukupa ulupepeelezyo nu vhutehamu.

Insoshi ku vhe vhakusambiilizya izya ilenga

³ Nkwanza kuuti usyale kunuukwo mu nkaaya iya Hefeeso, inza vwe nákuhomeleziizye ahavhaliilizyo he násogooye ku shigavho isha nsi isha Makedooniya. Nátili uvhalajizye avhantu kuuti vhatasambilizyaje insambiilizyo izya ilenga.

⁴ Havhili uvhavhuuzye kuuti vhaleshe ivwili vwe vitahondeeye nu kutaha amazina aga wooka wooka aga vhataata, vhe vhahafwa. Izyo zye zikuleeta amadali, zitakuvhagomwa avhantu mu mbombo iya Mulungu ye yikufumililana nu lwitiho.

⁵ Naafumwa indajizyo izyo, inga avhantu vhavhe ni shikunzi. Ishikunzi isho shili mu vhantu vhe amooyo gaavho mazelu, havhili minza, na vhe vhali nu lwitiho lwe lutali ni shifumbo.

⁶ Avhantu vhamo vhapuvile kuli izyo, nu kugalandata amazwi ge gatahondeeye.

⁷ Vhakwanza kuvha vhasambiilizi avha ndajizyo izya Moose, ileelo inongwa zye vhakuyanga nu kuhomeelezya, vhatazimanyile.

⁸ Tumanyile kuuti indajizyo nyinza, inga avhantu vhakuzilandata kwi idala lye lihondeeye pilongolela ilya Mulungu.

⁹ Havhili tumanyile kuuti indajizyo zitavhisiilwe ku vhantu avhagolosu, nkandi ku vhapuvi vhe vhatakusaajila na ku vhe vhatakumushindiha uMulungu, na vhe vhakuvhomba uvhutalamalandu. Havhili zivhisiilwe ku vhe vhakuviitilwa imbombo iya Mulungu nu kusungwa imbombo izya mu nsi, na ku vhe vhakugoga avhayise na vhanyina, na vhagozi avhanji vhonti.

¹⁰ Indajizyo izyo zya vhalugusu, na vhe vhakuvhomba uvhuvhembu avhanaavuli ku vhanaavuli, vhe vhakuvhakazya avhazya, avha ilenga na vhe vhakulapa izya ilenga. Havhili zya vhanji vhonti vhe vhakuvhomba lyonti lye likusugaana ni nsambiilizyo izya nalyoli.

¹¹ Insambiilizyo izyo zikufuma mwi Izwi iLyinza lye likulolesya uvhupiti uvhwa Mulungu uwa Vhushindamu. Uweene we ampiiye Izwi ilyo kuuti ndilumbililaje.

UMulungu akumufwila uPaavhuli uvhwila

¹² Nkumusalifwa uMwene wiitu uChilisiti uYeesu we ampiiye amaha, mwe pe ambwenyi kuuti ne mutungamu, nu kunsevha ku mbombo yaakwe.

¹³ Pooka nu kuuti kwisinda ukwo nkamuligaga nu kuvhayimvwa avhantu vhaakwe nu kuvhasaamula, ileelo ámfwiliiye uvhwila. Nkavhombaga izyo ishisita kumanya, lwe nshiili kuvha nu lwitiho.

¹⁴ UMwene wiitu uChilisiti uYeesu ámfwiliiye uvhwila nkaani, ahampa ulwitiho ni shikunzi kufuma ku kwakwe.

¹⁵ Kuli izwi ilya nalyoli lye likwanzilwa kulyitiha ku mwoyo wonti, kuuti, “UChilisiti uYeesu áyinzile mu nsi umu kuvhapoha avhatalamalandu.” Niine ne mutalamalandu kuluusya avhanji vhonti.

¹⁶ Ileelo uMulungu ámfwiliiye uvhwila, inga uYeesu Chilisiti avhalolesye uvhujimbiilizu vhwakwe vhwonti ku kwane, kuuti mbe ne shiholanyo ku vhaala vhonti vhe vhalimwitiha, inga vhahavhwaje uvhulanzi uvhwa shiima.

¹⁷ UMulungu wu Mwene uwa shiima, ataliifwa naalumo. Ataliipo umuntu we angamulola uMulungu, havhili ataliipo uMulungu uwunji naawumo. Uweene weeka vhweleele we ahondeeye kuposheela umushinzi, havhili ashindikwaje shiima shiima! Amina.

UPaavhuli akuumupa amasunde uTiimoti

¹⁸ Mwana waane Tiimoti, nkuukupa indajizyo izi zye zikufuma mu mazwi aga vhakuvhwi ge gáyanziilwe ku kwaho. Ugalandate amazwi igo gavhe shilwilo shaaho kulwa uvhulugu uvhwinza.

¹⁹ Ululemaje ulwitiho lwaho, nu kuvha nu mwoyo umwinza. Izyo, vhamo vhatázisajiiye, pe zihaazya ulwitiho lwavho kuuti lunanjishe lwonti.

²⁰ Muli ivho aliipo uHimenaayo nu Alekizanda, avhenevho imulesheeye uSeetano, inga vhasambiilile, vhaleshe kumusaamula uMulungu.