1 Peteli 5 - ULufingwi uLupwa

Kuyidiima impuga iya Mulungu

¹ Ishi nkuvhasimbila imwe mwe vhasongo avha vivhanza. Ine ne songo uwamwinyu, havhili ne hoome uwa mayimba aga Chilisiti. Ine ndiposheela uvhushindamu pooka nawo, ahavhaliilizyo he hakwinza. Nkuvhalambiilizya kuuti

² muyidiimaje ahinza impuga iya Mulungu ye yili kuli imwe. Mutavhombaje vhwevhulo fwe wumo akuvhavijiilizya, nkandi muvhombaje ku mwoyo uwa kuyifumwa mweneemwe, inza vwe uMulungu akwanza. Havhili mutavhombaje imbombo iyo kuzya kulonshela impiiya izya nsoni, nkandi ku mwoyo uwa luseshelo.

³ Mutavhakonzyaje avhiitisi vhe mukuvhalongozya ku maha, nkandi uvhulanzi vhwinyu vhuvhanje shiholanyo ishinza ku kwavho.

⁴ UYeesu we Mudiimi uMupiti uwa vhantu vhaakwe. Lwe uweene aloleha, muliposheela ishipambwi isha vhushindamu she shitakunanjiha.

⁵ Niimwe mwe vhajaaha muvhashindihaje avhasongo. Mwavwanaje mwenti ku vhwahayiisye, mwe pe yisimviilwe mu Vhusimbe uVhufinjile kuuti, “UMulungu akuvhahaana avha mabaado, ileelo akuvhafwila uvhwila vhe vhali nu vhwahayiisye.”

⁶ Ishi muyisyaje ku maha aga Mulungu, inga ahavhazuvwe lwe ahavhaliilizyo haakwe haafiha.

⁷ Mumuleshele uMulungu intamwo zyinyu zyonti, mwe pe uweene akuvhasaajila.

⁸ Muyikonzyaje nu kuvha minso ahavhaliilizyo honti, mwe pe umulugu wiinyu uMukwalanzi akuzyunguula uku nuukwo inza insama ye yikulondola umuntu, inga yiimulye.

⁹ Ishi mumudindaje uweene kwi idala ilya kusimpa mu lwitiho. Havhili mumanye kuuti avhamwinyu avha mu nsi zyonti, vhakuyimvilwa inza imwe vwe mukuyimvilwa.

¹⁰ Ileelo lwe mwayimba ku havhaliilizyo hansi, uMulungu alivhasengaanya nu kuvhasuvhaalizya nu kuuvhapa amaha nu kuvhaavwa kuvha nu lwalo ulwa maha mu lwitiho lwinyu. Uweene wu Mulungu uwa vhwila mu zyonti, ávhiisite kutuushila kwa Chilisiti uYeesu, kuuti mwinjile mu vhushindamu vhwakwe uvhwa shiima.

¹¹ Amaha gavhe nu weene shiima. Amina!

Umulaamu uwa vhusililishilo

¹² Mbasimbiiye ukalaata uno kutuushila kwa Silwano we imumanyile kuuti mwitisi umutungamu. Mbasimbiiye ku mazwi amansi iga, inga mbasuvhaalizye nu kuhomeshezya kuuti uvhu vhwe vhwila uvhwa nalyoli uvhwa Mulungu. Kuli izyo, nkuvhavhuuzya kuuti, musimpaje mu vhwila uvhwo.

¹³ Ishivhanza isha ku Babeeli she shisavhuliilwe nu Mulungu, shikuvhalamuha. Havhili umwana waane mu lwitiho uMaaliko, akuvhalamuha.

¹⁴ Mulamunkane ku lwofwanyo ulwa shikunzi. UMulungu avhapanje uvhutehamu imwe mwenti mwe muli mwa Chilisiti.