1 Peteli 3 - ULufingwi uLupwa

¹ Imwe mwe vhantanda mwe mwimaliilwe muvhashindihaje avhalume vhiinyu. Kwi idala ilyo, poosye inga avhalume vhiinyu vhatakwitiha izwi ilya Mulungu, kwe vhiitishe ishisita kulumbiililwa,

² lwe vhakulola ulujendo lwinyu ulwinza, havhili ulwa kumunyila uMulungu.

³ Kuyiyemvwa kwinyu kutavhanje ku mavhili kunzi, inza kutavha insisi, kuzwala ivintu ivwa sahaabu na menda aga nsavho,

⁴ nkandi kuvhanje mu mooyo giinyu mwe mutakuloleha. Havhili kuvhanje ku vintu ivwa kuyiyemvwa vwe vitakunanjiha, inza uvhutonsu nu vhutehamu. Ivwo vwe vili ni nsavho impiti pilongolela ilya Mulungu.

⁵ Nkuyanga vhwevhulo, mwe pe isho vwe avhantanda avhafinjile vhe vhahamusuvhilaga uMulungu vhahayiyemvwaga, kwi idala ilya kuvhashindiha avhalume vhaavho.

⁶ Umwantanda wooka we ahavhombaga isho wu Saala umushi uwa Aabulahamu. Uweene ahamushindihaga umulume waakwe nu kumwita kuuti, “Mwene.” Niimwe kwe muvhe mwe vhaana vha Saala, inga mukuvhomba inyinza ishisita kwogopa.

⁷ Niimwe mwe vhanaavuli mwe mwimaaye, mukwanzilwa mutendamaje ku njeele na vhashi vhiinyu, mwe pe mumanyile kuuti vhatali na maha inza imwe. Havhili muvhasunjililaje ku mushinzi, mwe pe uMulungu akuuvhapa mwenti uvhulanzi uvhwa shiima. Muvhombaje vhwevhulo, inga impuuto zyinyu zitadindilwaje.

Kuyimba kuzya kuvhomba inyinza

⁸ Izwi ilya vhusililishilo kuli izi, nkuti muvhanje nu mwoyo wooka nu kufwilana uvhwila, havhili mukundanaje inza avhanine vwe vhakukundana nu kuvha nu mwoyo umwinza nu vhwahayiisye.

⁹ Mutalanduzyaje imbiivhi kwa muntu we avhavhombela imbiivhi. Lwe vhakuvhaliga mutalanduzyaje indigo, nkandi muvhalavhilaje uvhuloote, mwe pe uMulungu ávhiisite kuvhomba izyo, inga muposheele uvhuloote vhwakwe.

¹⁰ Izyo zili inza vwe yisimviilwe mu Vhusimbe uVhufinjile kuuti, “Wonti we akusungwa kulandila ahinza, nu kuvha nu luseshelo insiku zyonti, aleshe kuyanga amazwi amavhiivhi, havhili atalumaje ilenga.

¹¹ Yikwanzilwa aleshe kuvhomba imbiivhi, avhombaje inyinza. Havhili alondolaje kuvha nu vhutehamu na vhanji nu kuvhulandata,

¹² mwe pe uMWENE uMulungu akuvheenya avhantu avhagolosu ku vhwila, havhili akutejeelezya impuuto zyavho. Ileelo vhe vhakuvhomba imbiivhi akuvhagunjila.”

¹³ Wu naanu we angavhavhombela imbiivhi, inga muli nu mute kuvhomba inyinza?

¹⁴ Ileelo poosye inga mukuyimba kuzya kuvhomba ingolosu, uMulungu akuvhaloota. Kuli izyo, mutogopaje, poosye kusagaanya kufumiilana nu kwogofwa kwavho.

¹⁵ Ileelo mumushindihaje uChilisiti mu mooyo giinyu, mwe pe uweene wu Mwene. Muyisenganyaaje ahavhaliilizyo honti kumwamula wonti we akuvhavhuziilizya izya lusuuvhilo lwinyu. Ileelo muvhombaje vhwevhulo ku vhutonsu nu mushinzi.

¹⁶ Muvhanje na mooyo aminza, pe inga lwe avhantu vhakuvhayanjila izya ilenga nu kuvhaliga kuzya lujendo lwinyu ulwinza ulwa kumulandata uChilisiti, vhalolaje insoni.

¹⁷ Nkuyanga vhwevhulo, mwe pe kwashi kuyimvilwa kuzya kuvhomba inyinza inga lwe lukasamo ulwa Mulungu, kuluusya kuyimvilwa kuzya kuvhomba imbiivhi.

^18-19 Yeenya, woope uChilisiti áyimviliilwe nu kufwa lwoka vhweleele, kuzya vhutalamalandu vhwitu. Uweene áali mugolosu, ahafwa kuzya vhe te vhagolosu, inga atukundanye nu Mulungu. Vhámugozile lwe ali nu muvhili uwa vhuntu. Ku maha aga Mupepo uMufinjile, ahasogola kukumusya Izwi iLyinza ku vhafwe vhe vhákunziilwe. Pe uMupepo uwa Mulungu ahamuzyusya.

²⁰ Avhafwe ivho vhe hali lwe uNoowa ahagombaga imbogooso, vháhaanile kumushindiha uMulungu. UMulungu ájimbiliiye kuzya vhutalamalandu vhwavho kufishila ahavhaliilizyo he imbogooso yagombwa. Mu mbogooso umwo vhínjiiye avhantu vhansi vhweleele, vháamile 8. Ivho vhe uMulungu ávhaposile na minzi.

²¹ Aminzi igo sháamile shiholanyo isha lwozyo ulwa havhaliilizyo iha, ulwa kuvhapoha imwe kwi idala ilya kuzyuha uYeesu Chilisiti. Kwozelwa te kwe kugeeza, inga uyeefwe intavu mu muvhili, nkandi lufingwi kwa Mulungu lwe lukuvhombeha ku mwoyo umwinza.

²² UYeesu uyo ásogooye ku mwanya, niishi atendiime uluvhazu ulwa nyoovhe iya kundiilo iya Mulungu, pa vhushindamu uvhupiti nkaani. Akuvhakonzya avhahavhizya pooka ni vipelwa vwonti vwe vili na maha.