1 Peteli 2 - ULufingwi uLupwa

¹ Pe ishi, muleshe uvhuvhiivhi vhwonti ni ilenga ni shifumbo nu mwone ni ndigo zyonti.

² Inza avhaana avhacheeche vwe vhakusungwa kwonka, niimwe musungwaje nkaani kumwela izivha ilyinza lye lizwi lya Mulungu, inga mukule mu vhuposhi.

³ Mukwanzilwa kuvhomba vhwevhulo, mwe pe mulinzile nu kumanya kuuti uMwene uYeesu mwinza.

Avhasaavhulwa avha Mulungu

⁴ UYeesu we livhwe ilanzi ilya kuzenjela. Ivhwe ilyo avhantu vhálihaanile, ileelo uMulungu álisavhuuye, havhili lya nsavho pilongolela lyakwe. Ishi mupalamilaje kwa Yeesu.

⁵ Niimwe vhweleele muli ngati mavhwe amalanzi. Muzengwilwe kuvha nyumba imfinjile ye yitakuloleha pa minso amazelu. Umwo niimwe mwe vhapuuti avhafinjile vhe vhakufumwa impuutile zye zitakuloleha pa minso amazelu. Impuutile izyo zikwitishilwa nu Mulungu kwi idala ilya Yeesu Chilisiti.

⁶ Izyo zili inza vwe yisimviilwe mu Vhusimbe uVhufinjile kuuti, “Yeenya, mu nkaaya iya Sayuuni mbiisile ivhwe ipiti ilya pa shipembe isha nyumba, ivhwe lye ndisavhuuye lya nsavho nkaani. Umuntu wonti we akumwitiha we livhwe ilyo, te ahasuupile naalumo!”

⁷ Ivhwe ilyo lya nsavho kuli imwe mwe mukwitiha, ileelo ku vhaala vhe vhatakwitiha, “Ivhwe lye avhazenzi vhálihaanile lye lyavha livhwe ipiti ilya pa shipembe isha nyumba.”

⁸ Havhili yisimviilwe kuuti, “Ivhwe ilyo livhwe ilya kupunuzya, liyalaawe ilya kuvhagwisya avhantu.” Avhantu vhakupunula, mwe pe vhatalyitisile izwi ilya Mulungu. Ilyo lye uMulungu ávhavhatishiiye kufuma hali.

⁹ Ileelo uMulungu ávhasavhuuye imwe kuvha mwe vhantu vhaakwe. Imwe mwe vhapuuti mu vhumwene vhwakwe, havhili mwe vhantu avhafinjile. UMulungu ávhasavhuuye imwe, inga mukumusyaje imbombo zyakwe impiti. Uweene ávhiisite kufuma mu shiisi nu kuvhinjizya mu vhuzelu vhwakwe uvhupiti.

¹⁰ Hali mutáamile mwe vhantu vha Mulungu, ileelo ishi mwavha mwe vhantu vhaakwe. Havhili mutáposheleeye uvhwila uvhwa Mulungu, ileelo ishi muposheleeye.

Kuvhashindiha avhalongozi

¹¹ Vhankundwa, nkuvhalambiilizya, mwe pe muli ngati mwe vhajeni mu nsi umu, havhili mukutuuha, muzileshe impapilo izya vhuntu uvhwa vhutalamalandu zye zikulwana na mooyo giinyu.

¹² Muvhanje nu lujendo ulwinza pilongolela ilya vhantu vhe vhatamwitisile uMulungu. Pe inga vhakuvhayanga kuuti mwe vhavhomba mbiivhi, vhazilolaje imbombo zyinyu inyinza, inga vhahamutiime uMulungu ku zyinyu, isiku ilya kwinza kuvhalonga avhantu vhonti.

¹³ Ishi, mwe pe muli mwa Mwene uYeesu, muzishindihaje indajizyo izya nsi. Mumushindihaje umwene wiinyu uwa nsi, mwe pe uweene we mulongozi umupiti uwa nsi yiinyu.

¹⁴ Havhili muvhashindihaje avhalongozi vhe vhasavhuliilwe nu mupiti uyo. Muvhombaje vhwevhulo, mwe pe ivho vhali na maha aga kuuvhapa isunde vhe vhakuvhomba imbiivhi nu kuvhatiima vhe vhakuvhomba inyinza.

¹⁵ Nkuyanga vhwevhulo, mwe pe uMulungu akwanza muvhombaje inyinza, inga avhapukupuuku vhe vhatamumanyile uweene, vhatavhanje ni lya kuvhakwinkwina.

¹⁶ Imwe mwe vhasatushe, ileelo mutavhuvhombelaje uvhusatushe uvhwo kuvhomba imbiivhi, nkandi mulandilaje inza vwe avhavhomvi avha Mulungu vhakwanzilwa kulandila.

¹⁷ Muvhashindihaje avhantu vhonti, nu kuvhakunda avhamwinyu. Mumunyilaje uMulungu nu kuumupa umushinzi umwene.

Uvhujimbiilizu mu mayimba

¹⁸ Imwe mwe vhavhomvi avha mu nyumba, muvhashindihaje nu kuvhanyila nkaani avhapiti vhiinyu. Mutavhombaje vhwevhulo ku vhapiti vhe vhe vhinza havhili vhatonsu, nkandi poosye na ku vhapiti vhe vhahali.

¹⁹ UMulungu akuvhaloota inga mukujimbiilila amayimba ge mukuyimvilwa kwi idala ilya kuvhonelwa, kuzya kumulandata uweene.

²⁰ Ishi kuli lilonka vhuli inga mukujimbiilila, lwe mukuhomwa kuzya vhutalamalandu vhwe mukuvhomba? Ileelo inga mukujimbiilila amayimba kuzya vhwinza vhwe mukuvhomba, pe mukumuhondezya uMulungu.

²¹ UMulungu ávhiisite inga mujimbiilile vhwevhulo, mwe pe uChilisiti woope ájimbiliiye kuyimvilwa ku zyinyu. Uweene we shiholanyo, inga tulandate idala lye átuusile.

²² Uweene atávhomvile uvhutalamalandu naavhumo, poosye kuluma ilenga.

²³ Uweene lwe akuligwa, atávhagalusiziizye izwi inga lyoka ilya kuvhaliga. Lwe vhakumuyimvwa atáyanzile naashimo isha kuvhoogofwa, ileelo ámulesheeye uMulungu zyonti we akulonga avhantu ku vhugolosu.

²⁴ UYeesu wuuyo ányatuuye uvhutalamalandu vhwitu kwi idala ilya kufwa pa shihovhenkanyo. Ávhomvile ilyo, inga tuleshe kulongolwa nu vhutalamalandu, nkandi tulongolwaje nu vhugolosu. Uweene vhámuvwalaziizye, inga imwe mupone.

²⁵ Mwáteezile inza ingʼonzi zye ziteezile idala, ileelo ishi mumugalushiiye uMudiimi nu Mwimiilizi uwa mooyo giinyu.