Yos. 9 - Ebaibul

Tomodikis Ŋigibeoni Yosua.

¹ Apotu ŋirwosi daadaŋ ŋulu alo To Yorodan kiirasi ŋakiro ŋun. Arae ŋirwosi ŋul ŋulu anakwap a ŋina a ŋikamukumukui, ŋulu anadipo a ŋina alo To ka ŋulu alodiyete anam Mediteranian akitodol Lebanon. Arae ŋirwosi ŋul ŋulu a Ŋiitaiti, a Ŋiamori, a Ŋikanaani, a Ŋiperisi, a Ŋiipi ta ŋulu a Ŋiyebusi.

² Apotu ikes tocamunos akimorikin kaapei akitijiore Yosua ka Ŋisirael.

³ Nai ani iirarete ŋituŋa ŋulu ke etaun a Gibeon, ŋuna keris Yosua kitiyak lotaunio a Yeriko ka Ai,

⁴ apotu ikes daŋ kirumut aosou, kiyakiyasi ŋikilyok ŋidi, kisiwoko ŋisigirya ŋiguniyae ŋulu ayai akimuj, ŋulu anyamuna, kisiwoko daŋ ŋisigirya ŋicweei ŋulu adapadapatae ŋulu eturitae epiini.

⁵ Tonapa ikes ŋilowi ŋulurocom ka ŋamuk ŋuna adapadapatae. Aokito ŋamugati ŋuna atiŋito ikes ka nabo edoidookinit.

⁶ Toloto ikes Gilgal neni a Yosua, tolimokis ikes iŋes kaapei ka Ŋisirael temasi, “Ikiponit isua anakwap a ŋina alwanan. Ikicamit isua iyes aruwor ka isua ŋipei.”

⁷ Nai apotu Ŋisirael temasi neni a Ŋiipi, “Acepaki irae iyes ŋulu anepei a ne. Ikiruwor nai iwon ŋipei ikwaani?”

⁸ Tolimokis ikes Yosua temasi, “Ikirae isua ŋiketiyak kon.” Kiŋit Yosua ikes tema, “Ataŋae iyes? Ai iponitotor iyes?”

⁹ Toboŋokis ikes temasi, “Ikiponit isua anakwap a ŋina alwanan nooi ekapolon, anerae ikipotu eirasi ŋakiro ŋuna a Ekapolon a ŋolo erae Akuj kus. Ikipotu eirasi ŋakiro daadaŋ ŋuna etiyae iŋes alo Ijipit

¹⁰ ka epite ŋolo atiŋia Akuj ŋirwosi a Ŋiamori ŋuluarei, Sikon ŋolo a Ecibon ka Og ŋolo a Bacan, ŋulu alomito Acitorot.

¹¹ Apotu Ŋikasikou kosi kaapei ka ŋituŋa ŋulu ka akwap kosi daadaŋ ikilimokis isua alemun akimuj, poni akisiryam iyes. Ikicikitae isua alimokin iyes atemar ikirae isua ŋiketiyak kus ka ikicamit isua iyes aruwor ka isua ŋipei.

¹² Kiŋolik mono iyoŋ ŋamugati kosi, apaki ŋina ikirotokinio isua anakwap kosi, ariŋa emwaka; nai kiŋolik iyoŋ tokona eokito ka idoidookinit.

¹³ Apaki ŋina ikilelebia isua ŋicweei lu, ariŋa ekitetyaka, nai kiŋolik iyoŋ tokona anyamunosi. Tari ŋilowi kosi kaapei ka ŋamuk, arocomiata aŋuna ka aoyau ke erot.”

¹⁴ Apotu ŋikarikok a Ŋisirael tocamut akijaun akimuj ŋin, nai pa a eŋisito ikes Ekapolon ŋakiro ŋadi aŋuna ka akimuj a ŋin.

¹⁵ Tocamu Yosua aruwor ka ikes ŋipei, kimyekinae ikes nyeari tari ipei. Apotu ŋikarikok a Ŋisirael kikoŋo atemar ikiricakini acamunet ŋin.

¹⁶ Ani elunyarosi ŋirwa ŋiuni kedaut ikes acamun, apotu Ŋisirael toyenut atemar kerae ŋituŋa ŋul ŋulupei alodiyete nen.

¹⁷ Tosodo Ŋisirael tonyout, torotokis lotaunio a ŋituŋa a ŋul. Ani elunyarosi ŋirwa ŋiuni, todolo ikes lotaunio lu: Gibeon, Kepira ka Beerot ta Kirias-Yearim.

¹⁸ Nai apotu Ŋisirael nyitijikis ikes, anerae ekoŋito sek ŋikarikok a Ŋisirael alokiro a Ekapolon a ŋolo erae Akuj a Ŋisirael aruwor ka ikes ŋipei. Kisiburata Ŋisirael daadaŋ ŋikarikok kec aŋuna a ŋakiro a ŋun.

¹⁹ Nai tolimut ŋikarikok a Ŋisirael temasi, “Ikipotu isua ekoŋo aŋuna kec alokiŋaren Ekapolon ŋolo erae Akuj a Ŋisirael. Aŋun, nyitiyao iwon ŋadi neni kec.

²⁰ Etiyata nu, itemokino iwon kimyekinae ikes, ikotere nyikinyunyurik Akuj iwon aŋuna ekoŋitere aŋuna kec.”

²¹ Tolimut ŋikarikok a Ŋisirael temasi, “Kimyekisi ikes, nai emaikina ikes toruworos ŋikayepak ŋakito ka ŋikaokok ŋakipi aŋuna a Ŋisirael.”

²² Abu Yosua tonyarau Ŋigibeoni kisirwor tema, “Kaanukiro ikimodikiniata iyes isua ibaakatar iponito aneni alwanan, toraakas bo ŋulu anepei a ne?

²³ Aŋuna itiyaata iyes ikoŋina, ilamam iyes. Eruworosi ŋituŋa kus ŋiketiyak jik, eyepete ŋakito ka eokete ŋakipi ŋuna ka akibois a ŋina ilipere Akuj kaŋ.”

²⁴ Toboŋokis ikes Yosua temasi, “Aponi isua kitiyae ŋun ekapolon, anerae ikipotu kire eirasi atemar eciki koloŋ Ekapolon ŋolo erae Akuj kus Moses eketiyan keŋ ainakin iyes akwap daadaŋ, tosodo toara ŋituŋa daadaŋ ŋulu elomito nen. Ikipotu isua etiyata ŋun aŋuna abunio itobulyo nooi, tocamunae aiun akiyar kosi.

²⁵ Ikiya tokona isua nakan kus. Kitiyata neni kosi ŋuna ikijoikinito iyes.”

²⁶ Tosodi nai Yosua toik ikes, kiretak Ŋisirael nyear ikes.

²⁷ Akoloŋit ŋinapei, kituruwo Yosua ikes ŋikayepak ŋakito ka ŋikaokok ŋakipi aŋuna a Ŋisirael ka Namuroet ŋina ke Ekapolon. Tari tokona eriŋa ikes itiyaete etic ŋol anakibois a ŋina aseu Ekapolon kilipyata ŋituŋa keŋ iŋes.