Yos. 7 - Ebaibul

Asecit ŋina ka Akan ka akisicanet keŋ

¹ Nai apotu Ŋisirael nyiwuapa ŋuna ecikit Ekapolon ikes ebala nyelemasi alo Yeriko idiobore. Abu ekile ŋolo anyaritae Akan tolemu ŋiboro ŋulu sek abookoi nyilemut, ido abu Ekapolon toŋoik Ŋisirael nooi. (Arae Akan lokoku a Karami a ŋolo arae Lokoku a Sabadi, a ŋolo arae lokoku a Sera a ŋolo alokabila a Yuda.)

² Kiyakiya Yosua alo Yeriko ŋirototin tema, “Toloto torebo akwap ŋina eyai etaun ŋolo anyaritae Ai, ŋolo edunyasi ka neni anyaritae Besapen alo Kide etaun Besel.” Toloto nai ikes torebo Ai.

³ Ani kedaut ikes akireb, toboŋut neni ayai Yosua temasi, “Nyitemokino ŋituŋa daadaŋ elosete akirem Ai. Kiyakiya ŋituŋa ŋalipyo ŋaarei, kori ŋauni make. Nyiumia ŋituŋa daadaŋ aina, anerae ekudyoko ŋituŋa ŋulu eyakasi Ai.”

⁴ Apotu nai Ŋisirael ŋalipyo ŋauni toloto toremo Ai, nai apotu ŋituŋa ŋulu ka Ai tobwaŋa ikes;

⁵ toarae ŋulu adolit ekimar ŋatomoniuni ka ŋikanikapei. Kirita ŋituŋa ka Ai ikes ŋinapei alokek a etaun akitodol naboket ŋina a Sebarim. natiyaaret alomukura a ŋolo aponi toarakinae Ŋisirael. Tokuryaketa Ŋisirael, kibwaliyaros ŋitai kec.

⁶ Apotu Yosua kaapei ka ŋikarikok a Ŋisirael tocilicileta ŋilowi kec anakiyaloloŋ, tobuburiyaros kilipa alokiŋaren Asaduku ŋina ka Acamunet a ŋina ke Ekapolon. Topero ikes aneni akitodol eboŋ, ipuripurito apuwa nakyes kec akitoodiunia akiyaloloŋ kec.

⁷ Tolimu Yosua tema, “Okoe Ekapolon Akuj! Kaanukiro bo ibunio iyoŋ kitodokunia ŋituŋa lu lokekwat lo alo Yorodan? Arae mono akipotor isua ikimunyasi Ŋiamori a? Okoe, kerae bo oyenunito daŋ, kikidoŋit ekekwaye Yorodan!

⁸ Nyaanu ŋuna alimuni ayoŋ Ekapolon ŋina tokona abwaŋatar Ŋisirael alomoe kec?

⁹ Ŋina tokona edolyoto ŋakiro nu neni a Ŋikanaani ka ŋituŋa ŋulu ka akwap kec daadaŋ, ikirimokinete ikes isua kidiŋ kitiyata ŋuna nyiirarere nabo jik ekiro kosi anakwap. Nyaanu tokona ŋakiro ŋuna itiyae iyoŋ torubakinia ekiro kon itopolooritae?”

¹⁰ Tolimok nai Ekapolon Yosua tema, “Tonyou! Kaanukiro ibuburar iyoŋ alokwap?

¹¹ Aseca Ŋisirael! Abila ikes ŋuna abu ayoŋ ecik ikes atemar, kirica. Alemasi ikes ŋiboro ŋice ŋulu amaikina kinyasunae. Akokoiyasi ikes ŋiboro ŋul, nabo emunoniasi emorikis ka ŋiboro kec.

¹² Ŋakiro ŋun ikes nyewoikiniata Ŋisirael ŋimoe kec. Emanakis ikes ŋakausinei lomoe kec, anerae aruworosi ikes ŋulu ilamitae. Nyikiruki nabo ayoŋ ka iyes mati jik kilemasi iyes aneni kus ŋiboro ŋulu aponi ikiciki iyes atemar nyilemasi.

¹³ Tonyou, kitaleu ŋituŋa. Tolimok ikes ebe, ‘Kitesegunos aŋuna a moi taparacu, anerae ebala Ekapolon ŋolo erae Akuj a Ŋisirael ebe, eyakasi ŋiboro ŋulu icenen neni kus Ŋisirael, nyiwoikinete iyes ŋimoe kus mati jik kilemasi iyes aneni kus ŋiboro ŋulu ikicikitae iyes atemar nyilemasi.’

¹⁴ Moi taparacu, ipote iyes neni kaŋ a ŋikabilae. Ani ekabila ŋolo eseuni Ekapolon, bu ŋolo kiŋaren a ŋatekerin. Tosodi ateker ŋina eseuni Ekapolon bu kiŋaren a ŋikalya. Bu ekal ŋolo eseunio yau ŋituŋa keŋ kiŋaren a ŋipeipei.

¹⁵ Ani nai ŋini eseunio toryamunae eyakar ŋiboro ŋulu icenen, eponio akicunyakin iŋes ka ŋiboro keŋ daadaŋ kaapei ka ŋituŋa keŋ, anerae abil iŋes Acamunet ŋina ke Ekapolon ka nabo etiya ŋuna a ŋileec nooi alo Isirael.”

¹⁶ Ani taparacu iwalari akwap, abu Yosua tonyou kisibak Ŋisirael aponare kiŋaren a ŋikabilae. Aponi tosearae ekabila a Yuda.

¹⁷ Tonyara iŋes ŋatekerin a Yuda aponare kiŋaren, tosearae a nen ateker a Ŋiserai, tonyara iŋes ŋikilyok anateker a Ŋiserai aponare kiŋaren a ŋipeipei, tosearae Sabadi.

¹⁸ Tonyara iŋes ŋituŋa a ekal a Sabadi aponare kiŋaren a ŋipeipei, tosearae Akan lokoku a Karami a ŋolo arae lokoku a Sabadi a ŋolo arae lokoku a Sera a ŋolo alokabila a Yuda.

¹⁹ Tema Yosua neni ka Akan, “Lokoku, kitopoloo Ekapolon ŋolo erae Akuj a Ŋisirael, tolimok iŋes asecit kon. Tolimokinae ayoŋ ŋakiro ŋuna itiyat iyoŋ. Nyiwua ŋakiro ŋun aneni kaŋ.”

²⁰ Toboŋok Akan Yosua tema, “Kire jik, ayoŋ asecit aneni ke Ekapolon a ŋolo erae Akuj a Ŋisirael, anerae etiyat ŋakiro nu:

²¹ Alotooma ŋiboro ŋulu aremunio, abu ayoŋ eŋolik elou ŋolo ajokan ŋolo aoyan, ŋolo itiyaunitae alo Babilon ka ŋakiloi ŋaarei ŋuna a esilipa ta egolid ŋolo adolit apotis atutubet apei ŋina ka akilo. Apotu ŋiboro ŋul okonirasi ayoŋ nooi, olemu ayoŋ ikes. Anukakinit ayoŋ ikes nalup tooma eema kaŋ ka eyai esilipa alokwap.”

²² Kiyakiya nai Yosua ŋituŋa toema loeema, toryamunae kire ŋiboro ŋul enukakina kwap ka eyai esilipa alokwap.

²³ Kipudut ŋulu sek eyakiyo ŋiboro kiŋa aloeema, yaut neni a Yosua ka Ŋisirael daadaŋ, kiwuakinae ŋiboro ŋul kiŋaren Ekapolon.

²⁴ Abu nai Yosua kaapei ka Ŋisirael daadaŋ tocunasi Akan lokoku a Sera ka esilipa, elou ŋolo aoyan ŋol, egolid ŋidwe keŋ ŋulusapa ka ŋulupesur, ŋimoŋin, ŋisigirya, ŋamesekin, eema ka ibore daadaŋ ŋini ayakar iŋes. Yaarae daadaŋ nakadipaalat ŋina enyaritae Akor.

²⁵ Abu Yosua tema, “Kaanukiro ikiinakinia iyoŋ isua ŋican? Ikisicani Ekapolon Akuj iyoŋ nakoloŋit na.” Kiruwakis Ŋisirael daadaŋ Akan ka ŋituŋa keŋ a ŋamoru, tocakae ikes ka ŋibaren kec, tosodi kicunyakinae.

²⁶ Totukokinae kidiama Akan ŋamoru ŋuna alalak ŋuna eya tari tokona. Tojoŋo nai Ekapolon aŋoikinit Ŋisirael. Ŋakiro ŋun iŋes enyaritere akibois ŋin akadipaalat ŋina ka Akor tari tokona.