Yos. 6 - Ebaibul

Kikamarae Yeriko ka tomunaarae

¹ Apaki ŋin, agolitoe ŋikekya a Yeriko, ikotere nyelomut Ŋisirael. Pa apedori idiotuŋanan alomar kiŋa, kori tooma.

² Tolimok nai Ekapolon Yosua tema, “Kiira, adau ayoŋ akipotokin Yeriko nakan kon, kaapei ka erwosit keŋ ta ŋasigarya keŋ.

³ Kirimokisi ka ŋajorei kon daadaŋ kilodakis etaun kiryama. Toboŋonokisi akilodanakin etaun akitodol ŋirwa ŋikanikapei.

⁴ Ecamitae ŋisacaradotin ŋikanikaarei kiŋarenikis Asaduku ŋina ka Acamunet etiŋito ŋamomwar a ŋimeesekin ŋakanikaarei. Ani edoli akoloŋit ŋina a ŋakanikaarei, itemokino iyoŋ kirimokis ka ŋasigarya kon etaun ŋakirimokinet ŋakanikaarei, tokusete ŋisacaradotin ŋamomwar a ŋimeesekin.

⁵ Ani iirarete iyes ŋisacaradotin ekusete ŋamomwar ekaoyan, itemokino ŋituŋa daadaŋ tocelut nooi kiworout, ikotere ebwaŋa arwatata ŋina ke etaun toukor, tosodi toemaros ŋituŋa daadaŋ tooma etaun.”

⁶ Tonyarau nai Yosua ŋolo arae lokoku a Nun ŋisacaradotin tolimok tema, “Todaka Asaduku ŋina ka Acamunet, totiŋa ŋisacaradotin ŋikanikaarei ŋamomwar a ŋimeesekin ŋakanikaarei, kiŋarenikis Asaduku ŋina ka Acamunet a Ekapolon.”

⁷ Tolimok nai iŋes ŋituŋa tema, “Kicodosi, kimyekisi ŋikilyok ŋulu ajiok ikiŋarenikis iyes, toloto ikes kiŋaren Asaduku ŋina ka Acamunet, kicodosi kilukakis etaun kidiŋ.”

⁸ Ŋinapei erikakinia Yosua akisirwor ŋituŋa kiŋarenik Ekapolon ŋisacaradotin ŋikanikaarei ŋulu atiŋito ŋamomwar a ŋimeesekin ŋakanikaarei, akusete ŋisacaradotin daadaŋ ŋamomwar a ŋimeesekin, kiwuapite ikes Asaduku ŋina ka Acamunet a Ekapolon.

⁹ Kiŋarenikis ŋikajiok ŋisacaradotin ŋulu akusete ŋamomwar a ŋimeesekin, kiwuapite abusya alokaku Asaduku ŋina ka Acamunet, torwos ŋamomwar a ŋimeesekin esaa daadaŋ.

¹⁰ Nai ecikit Yosua ŋituŋa ebe, “Nyicelut, kori nyirworik idiotuŋanan akitodol akoloŋit ŋina atemarya ayoŋ iyes, ‘Tocelutu!’ Tosodo nai tocelutu.”

¹¹ Kisirimok nai Yosua Asaduku ŋina ka Acamunet a Ekapolon etaun akirimokinet apei. Toboŋosi nai ka ŋasigarya keŋ nalomari kec topero inaa nakwaare.

¹² Ani taparacu iwalari, kisyokak Yosua akyenyun, tosodo ŋisacaradotin todaka Asaduku ŋina ka Acamunet a Ekapolon.

¹³ Kiŋaren ekicodi a ŋikajiok, totupakis ŋisacaradotin ŋulukanikaarei ŋulu atiŋito ŋamomwar a ŋimeesekin ŋakanikaarei kiŋarenikis Asaduku ŋina ka Acamunet a Ekapolon ekusete ŋamomwar a ŋimeesekin. Kiwuapakis ŋasigarya ŋuna anabusya alokaku Asaduku ŋina ka Acamunet a Ekapolon, torwos jik ŋamomwar a ŋimeesekin.

¹⁴ Akoloŋit ŋina atupakini ŋina eŋarenon, kirimokis ikes etaun akirimokinet apei, ido toboŋosi nalomari kec. Toboŋonokis ikes ikwaŋinapei todol ŋirwa ŋikanikapei

¹⁵ Akoloŋit ŋina a ŋakanikaarei, tonyout ikes iwalari akwap, kirimokis etaun ŋakirimokinet ŋakanikaarei ekusete jik ŋamomwar a ŋimeesekin, akoloŋit ŋin bon erimokinitotor ikes etaun ŋakirimokinet ŋakanikaarei.

¹⁶ Ani edoli akirimokinet ŋina a ŋakanikaarei, ituruunete ŋisacaradotin ŋamomwar a ŋimeesekin, tolimok Yosua ŋituŋa tema, “Tocelutu, anerae adau Ekapolon ainakin iyes etaun.

¹⁷ Emunyaryo iwon etaun lo kaapei ka ibore daadaŋ ŋini eyai tooma keŋ aŋuna ke Ekapolon. Raab bon amalaat kaapei ka ŋituŋa keŋ ikes eesikinio aŋuna abunio iŋes kiwua ŋirototin yok ŋulu eyakitae iwon ne.

¹⁸ Nai iyes, kiuryasi, nyetapa idiotuŋanan ŋiboro ŋulu ilamitae ŋul, ikotere apaki ŋina imunyaryata iyes ikes, nyikodut ŋiboro ŋulu ilamam, yaut nalomari ŋina a Ŋisirael, ido kituruwosi ŋina ilamam, ŋina akodakin ŋican.

¹⁹ Kimyekisi esilipa daadaŋ kaapei ka egolid, ŋiboro ŋulu itiyaunitae a eburonis ka a ŋasuwa, toruworos ŋulu asegak aŋuna a Ekapolon, kiwuakinae ikes neni idyasitae ŋiboro aŋuna a Ekapolon.”

²⁰ Tokutakis nai ŋisacaradotin ŋamomwar a ŋimeesekin. Ŋinapei eiraryata ŋituŋa eruye a ŋamomwar a ŋimeesekin, tocelut kiworout nooi, tosodi arwatata toritakin kwap. Toemaros ŋituŋa tooma etaun aneni daadaŋ aya ikes, kikamasi etaun daadaŋ.

²¹ Apotu ikes tolemut ŋileŋia kec toaryata ŋituŋa daadaŋ alotaun, ŋikilyok ka ŋaberu, ŋisorok ka ŋimojoŋi. Toara daŋ ŋaatuk ka ŋamesekin ta ŋisigirya.

²² Tolimok Yosua ŋikilyok ŋuluarei ŋulu alosito arot etaun ŋol tema, “Toloto kai ŋina a Raab a amalaat, yaut iŋes ka ŋituŋa keŋ daadaŋ kiŋa lopite ŋolopei aris iyes kikoŋioto neni keŋ.”

²³ Apotu ŋikilyok ŋul toloto yaut Raab kiŋa, erukito ka papa keŋ, toto keŋ ka ŋikaitotoi keŋ kaapei ka ŋituŋa keŋ daadaŋ. Yaarae ikes daadaŋ neni alomito Ŋisirael, kitogwaŋakinae ikes kiŋa alomar a Ŋisirael.

²⁴ Kicunyakis ikes etaun ka ibore daadaŋ ŋini keyai tooma, mati bon ŋiboro lu: Esilipa ka egolid ta Ŋiboro ŋulu etiyaunitae a eburonis ka a ŋasuwa. Aponi ŋul yaarae kiŋadakinae nakibois ŋina elipyata Ŋisirael Ekapolon.

²⁵ Nai abu Yosua nyear Raab ka ŋituŋa keŋ daadaŋ. Eriŋa tari tokona erukito ŋituŋa keŋ ka Ŋisirael aŋuna abunio iŋes kiwua ŋirototin ŋulu eakiyari Yosua akireb etaun Yeriko.

²⁶ Apaki ŋin, abu Yosua kikoŋ tema, “Icenen alokiŋaren Akuj ituŋanan ŋini ikatakini akiduk etaun lo ŋolo a Yeriko. Ani kedukoki akisyakinet, etaci a ikiyae keŋ; ani kedukoki ŋikekya, etaci a iŋoorit keŋ.”

²⁷ Aŋun, arukito Ekapolon ka Yosua ka abu arwonu keŋ kielakin akwap ŋin daadaŋ.