Yos. 4 - Ebaibul

Ŋamoru ŋuna atamunitere ŋakiro ŋuna etiyae Akuj

¹ Kedaut Ŋisirael daadaŋ adokar ekekwaye aŋolol Yorodan, tolimok Ekapolon Akuj Yosua tema,

² “Toseu ŋikilyok ŋitomon ka ŋiarei alotuŋa, a ŋolokabila epeikile.

³ Kisirwor ikes tema, ‘Kideputu ŋamoru ŋatomon ka ŋaarei aneni awuatar ŋisacaradotin alokidiŋ aŋolol Yorodan, tosodo yaasi kiwuakis neni iperiyorete iyes lolo.’ ”

⁴ Tosodi nai Yosua tonyarau ŋikilyok ŋitomon ka ŋiarei ŋulu keris iŋes keseu, a ŋolokabila epeikile.

⁵ Tolimok iŋes ikes tema, “Toloto tooma aŋolol Yorodan neni eyai Asaduku ŋina ka Acamunet a ŋina ke Ekapolon Akuj kus. Itemokino ŋinituŋanan toryoŋu amoru apei, ikotere eriyan ekimar a ŋamoru ka ekimar a ŋikabilae a Ŋisirael.

⁶ Isiitunete ŋamoru ŋun Ŋisirael ŋakiro ŋuna adau Ekapolon akitiya. Ani moi ikiŋisete iyes ŋidwe kus apolou ŋina a ŋamoru a ŋun,

⁷ itemokino tolimokis ikes atemar apotu ŋakipi ŋuna ka aŋolol Yorodan totubos towua aiwapei, totyeikis Asaduku ŋina ka Acamunet a ŋina ke Ekapolon. Aŋun, erae ŋamoru ŋun ŋuna etamunitotor Ŋisirael ŋakiro ŋun ŋikaru ka ŋikaru.”

⁸ Kitiyata Ŋisirael ikwapei ecikitor Yosua ikes, apotu kideput alokidiŋ aŋolol Yorodan ŋamoru ŋatomon ka ŋaarei ekimar ŋolo a ŋikabilae a Ŋisirael, lopite ŋolo kelimokinitor Ekapolon Akuj Yosua. Apotu ikes yaasi ŋamoru tari neni alomete ikes kiwuakis nen.

⁹ Abu daŋ Yosua tolimok ŋikilyok ŋul asipokin ŋamoru ŋatomon ka ŋaarei kidiŋ aŋolol Yorodan neni sek awuatar ŋisacaradotin ŋulu adakito Asaduku ŋina ka Acamunet. Eriŋa ŋamoru ŋun eya nen tari tokona.

¹⁰ Apaki ŋina adokaryata Ŋisirael ekekwaye aŋolol Yorodan, arubakinito ŋisacaradotin ŋulu adakito Asaduku ŋina ka Acamunet ewuasi alokidiŋ aŋolol, akitodol ŋina erikakinotor ŋakiro daadaŋ ŋuna ecikit Ekapolon Akuj Yosua alimokin ŋituŋa kitiyata, lopite ŋolo keris Moses kicikia Yosua. Apotu ŋituŋa kiburuburakis akidok aŋolol ekekwaye.

¹¹ Ŋinapei erikakiniata ŋituŋa daadaŋ adokar ekekwaye, apotu ŋisacaradotin todokaryata Asaduku ŋina ka Acamunet a Ekapolon ekekwaye kiteete ŋituŋa.

¹² Apotu ekabila a Ruben ka ŋolo a Gad ta atutubet apei ŋina ke ekabila a Manase kipopooros etiŋito ŋiboro ŋulujiet, kiŋarenikis Ŋisirael lopite ŋolo kelimokinitor Moses ikes.

¹³ Arae ekimar kec edokarete anaŋolol Yorodan ŋalipyo ŋatomoniomwon. Atenito ikes ejie etubete aŋolol alokiŋaren Ekapolon Akuj, toloto ejie nadipo ŋina alo Yeriko.

¹⁴ Akoloŋit ŋin, abu Ekapolon Akuj kituruwo Yosua ekarwon alokiŋaren Ŋisirael daadaŋ, tokera ikes iŋes ŋirwa daadaŋ ŋulu ayarya Yosua, tokera lopite ŋolopei sek kekeritotor Moses.

¹⁵ Tolimok Ekapolon Yosua tema,

¹⁶ “Tolimok ŋisacaradotin ŋulu edakito Asaduku ŋina ka Acamunet todokut kiŋa aŋalol Yorodan.”

¹⁷ Tonyara nai Yosua ŋisacaradotin tema, “Todokutu kiŋa anaŋolol.”

¹⁸ Ani edokunete ŋisacaradotin ŋulu adakito Asaduku ŋina ka Acamunet a ŋina ke Ekapolon alokidiŋ aŋolol Yorodan, apotu ŋakipi apaki ŋinapei ecakyata ŋakejen kec neni aonit alokiŋa toboŋokis alelere, kipumas kilapa nabo ŋikipetetyo ikwapei sek.

¹⁹ Adokete Ŋisirael aŋolol Yorodan ŋirwa ke elap ŋitomon, elap ŋolo ke epei alopite a ŋolo imaryata ikes ŋilapyo. Toloma ikes neni enyaritae Giligal alo Kide Yeriko.

²⁰ Abu nai Yosua tosipok Giligal ŋamoru ŋun ŋatomon ka ŋaarei ŋuna ayaunete ikes anaŋolol Yorodan.

²¹ Tolimok iŋes Ŋisirael tema, “Ani moi ikiŋisete iyes ŋidwe kus apolou ŋina a ŋamoru a ŋun,

²² itemokino iyes tolimokis ikes atemar apotu Ŋisirael todokut laalo aŋolol Yorodan etyaikinito ŋakipi ikes kitoro ikes neni aonit;

²³ anerae abu Ekapolon Akuj kus kitoon aŋolol Yorodan akitodol ŋina idokaryata iyes ekekwaye, lopite ŋolopei etiyator Ekapolon Akuj kus ananam a ŋina enyaritae Anam ŋina Areŋan, ŋina abu iŋes kitoon aŋuna yok akitodol ŋina adokunere iwon daadaŋ ekekwalo.

²⁴ Erae ŋun ikotere akiteyenunia ŋituŋa daadaŋ anakwap atemar egogoŋ Ekapolon Akuj ka erae ikotere iyes itopoloorete Ekapolon Akuj kus ŋikaru ka ŋikaru.”