Yos. 20 - Ebaibul

Ŋitaunio ŋulu atyakaritae aŋuna a ŋituŋa a ŋulu adoonokinete

¹ Tolimok nai Ekapolon Yosua tema,

² “Tolimok Ŋisirael totyakasi ŋitaunio ŋulu edoonokinete ŋituŋa ikwaŋina alimokinitor ayoŋ Moses,

³ ikotere edokini ituŋanan ŋini ebucakin akiar ŋinice, nyeari iŋes kinyaŋere ŋini abu iŋes toar.

⁴ Ekaaran ŋolo edokini neni a epei a ŋitaunio a ŋulu ityakarete iyes, emaikina ani edoli lokek a etaun, towo, tolimok ŋakiro keŋ lokasikou ŋulu ke etaun a ŋolo edokini iŋes. Emaikina nai ŋituŋa a etaun a ŋol yaasi iŋes tooma etaun, kitoodikis neni iboikin, ido kiboiyoto ka ikes.

⁵ Ani kiwuapu ekenyaŋan ituŋanan ŋini keari ŋinice, nyemaikina ŋikasikou ŋulu a etaun a ŋol kipotosi ituŋanan ŋin, anerae pa eredakini iŋes akiar ŋinice, ido pa sek emanan ikes.

⁶ Emaikina ekaaran ŋol kiboi alotaun a ŋol akitodol ŋina itowoere aloikiiko ka akitodol ŋina etwania esacaradoti ŋolo Apolon nooi alotaun a ŋol ŋirwa ŋul, apaki ŋin nai eboŋorya ekaaran ŋol lotaun ŋolo sek eboiyoto ka ŋituŋa keŋ, tojoŋo akiboi alotaun a ŋolo abu iŋes todoki.”

⁷ Aponi nai totyakarae ŋitaunio lu: Kedec alo Galileya, anakwap a ŋina a ŋikamukumukui a ŋina a Naputali ka Sekem anakwap a ŋina ŋikamukumukui a ŋina a Epuraim ta Eburon anakwap a ŋina a ŋikamukumukui a ŋina a Yuda.

⁸ Alokekwaye Yorodan, alo Kide Yeriko aponi totyakarae Beser etaun ŋolo ayai naloŋisat nenilapat anakwap a ŋina a Ruben, anakwap a ŋina a Gad aponi totyakarae Ramos etaun ŋolo ayai Gilead, anakwap a ŋina ka atutubet ka apei a Manase, aponi totyakarae Golan etaun ŋolo ayai Bacan.

⁹ Arae ŋul ŋitaunio ŋulu atyakaritae aŋuna a Ŋisirael daadaŋ kaapei ka ŋituŋa ŋulugelae ŋulu eboiyete ka ikes. Atyakaritae ikes aŋuna a idiotuŋanan a ŋini ebucakin akiar ŋinice, ikotere todoki nen nyear ŋini iwuapit akinyaŋia ŋini abu iŋes toar eriŋa nyitowua aloikiiko totubokinae.