Yos. 18 - Ebaibul

Tokorakinae akwap ŋina edoŋit lokabilae ŋuluce.

¹ Kedaut Ŋisirael akikamar akwap ŋin daadaŋ, apotu totukokinos Silo, kigurokis nen Eema ŋolokilipet.

² Edoŋito ŋikabilae a Isirael ŋikanikaarei ŋulu ariŋa nyekorakina ŋakwapin ŋuna eruwor ŋuna kec.

³ Kiŋit Yosua Ŋisirael tema, “Tari ori irubakinito iyes ijamakinito alosit akikamari akwap ŋina adau Ekapolon ŋolo arae Akuj atapapaa kus ainakin iyes?

⁴ Tolemutu a ŋolokabila ŋikilyok ŋiuni eyakiya ayoŋ. Enyounete ikes pena kimanimana akwap ka kigyero daŋ akwap ŋina emaikina toruwor ŋina a ŋulutuŋa, ido nai toboŋut neni kaŋ.

⁵ Itemokino ikes totyakatyakata akwap ŋatubeta ŋakanikaarei. Kidoŋ ekabila a Yuda nakwap keŋ, lowae ŋolo alo Kwap, kidoŋ ekabila a Yosepu nakwap keŋ, lowae ŋolo alo Kuju.

⁶ Nai itemokino iyes kigyero ŋakwapin ŋakanikaarei yaut neni kaŋ. Abuni nai ayoŋ akilamilam aŋuna kus a ne alokiŋaren Ekapolon ŋolo erae Akuj yok.

⁷ Emame akwap eryamunete ŋituŋa a Lepi aneni kus, anerae ainakinet kec iŋes asacaradotonu ŋina a Ekapolon. Adaut sek Gad ka Ruben ta atutubet apei ŋina a Manase aryamun ŋakwapin kec alo Kide Yorodan. Moses ŋolo erae eketiyan a Ekapolon abu tokorak ikes.”

⁸ Ani ketena ŋikilyok ŋulu acamitae akiyakiyar akigyer akwap, abu Yosua kicik ikes tema, “Toloto, kirimokisi akwap daadaŋ kigyerut, ido toboŋut ne neni kaŋ elamilam ayoŋ aŋuna kus a ne alo Silo alokiŋaren Ekapolon.”

⁹ Toloto nai ŋikilyok ŋul kirimo ka kigyero akwap, kigira lokitaabo ŋakiro a ŋakwapin a ŋakanikaarei, a ŋolotaun ŋakiro keŋ. Toboŋut nai Silo neni a Yosua.

¹⁰ Kilamilam nai Yosua aŋuna kec alokiŋaren Ekapolon alo Silo. Arae Silo akorya Yosua akwap neni a Ŋisirael a ŋikabilae kec.

Tokorakinae ekabila a Benjamin akwap

¹¹ Abu ekiro a ekabila a Benjamin a ŋatekerin kec kiŋarenu anakilamilam, ido apotu ikes toryamut akwap ŋina eyai kidiŋ ekabila a Yuda ka ekabila a ŋituŋa a Yosepu.

¹² Alowae a ŋolo alo Kuju esyakinit ekukoru kec alo Yorodan totiyaar nadipo ŋina a Yeriko ŋina alo Kuju, kilugok kidir To toloma nakwap ŋina a ŋikamukumukui kiropo a nen toloma naloŋisat Bes-Aben.

¹³ Tomyaa a nen kidir lowae ŋolo alo Kwap, kinapakin emoru Lus, (iŋes Basel), totiyaar Kwap neni anyaritae Ataros-Adar ŋolo ayai lomukura ŋolo eyai Kwap neni atiyaaror Bes-Oron.

¹⁴ Ameun alokamukumukut a ŋolo iteosi ka Bes-Oron alowae a ŋolo alo Kwap, elugokinit ekukoru kinapakin ekamukumukut alowae a ŋolo alo To, kiropo Kirias-Baal (iŋes Kirias-Yearim) etaun a ŋituŋa a Yuda. Arae ŋol ekukoru ŋolo alo To.

¹⁵ Alowae a ŋolo alo Kwap, esyakinit ekukoru a nen anasalunet Kirias-Yearim alowae a ŋolo alo To, kiropo alolelyan a ŋulu enyaritae Napetoa.

¹⁶ Totiyaar ekukoru a nen nakeju a emukura a ŋolo iteosi ka akadipaalat ŋina Ben-Inom, emukura ŋolo eyai Kuju akadipaalat a Rapaim. Kiropo a nen emyat akadipaalat a Inom inapakina alowae a ŋolo alo Kwap emukura ŋolo eyai etaun a Ŋiyebusi, toloma En-Rogel;

¹⁷ Kiluguyo a nen lowae ŋolo alo Kuju, tomyaa En-Semes, kiporo Gelilos neni eteosi ka edoket ŋolo ka Adumim, totiyaar a nen kidir namoru a Boan alokoku a Ruben.

¹⁸ Kiporo a nen lowae ŋolo alo Kuju, kinapakin ŋikamukumukui ŋulu erounito Bes-Araba, totiyaar toloma Araba.

¹⁹ Kiropo a nen Kuju kidir nakeju a emukura Bes-Ogila, kiropo alocileta a Anam a ŋina Atwan, alowae a ŋolo elomarya Yorodan nanam ŋin. Arae ŋol ekukoru ŋolo alo Kwap.

²⁰ Alowae a ŋolo alo Kide, arae aŋolol Yorodan egyerit ekukoru kec. Arae ŋol ekukoru ŋolo egyerit alowaetin a daadaŋ akwap ŋina akorakinitae ŋituŋa a Benjamin a ŋatekerin kec.

²¹ Ŋitaunio ŋulu akorakinitae ŋituŋa a Benjamin a ŋatekerin kec ikes lu: Yeriko, Bes-Ogila, Emek-Kesis,

²² Bes-Araba, Semaraim, Besel,

²³ Apim, Para, Opura,

²⁴ Kepar-Amoni, Opini ka Geba. Arae ŋul ŋitaunio ŋitomon ka ŋiarei ka ŋirerya kec.

²⁵ Gibeon, Rama, Beeros,

²⁶ Misipe, Kepira, Mosa,

²⁷ Rekem, Iripeel, Tarala,

²⁸ Sela, Aelep etaun a Ŋiyebusi (iŋes Yerusalem), Gibea ka Kirias-Yearim. Arae ŋul ŋitaunio ŋitomon ka ŋiomwon ka ŋirerya kec. Arae ŋin akwap a ŋituŋa a Benjamin a ŋatekerin kec.