Yos. 17 - Ebaibul

Atutubet a ŋituŋa a Manase alo To aŋolol Yorodan

¹ Aponi nai tokorakinae ekabila a Manase akwap, anerae arae Manase lokoku a Yosepu ŋolokiyae. Keris sek kekorakin Gilead ka Bacan neni a Makir a ŋolo erae ekiyae a Manase aŋuna araakar iŋes arwonit ŋina ajion. Anyaritae ekiro a papa a Makir Gilead.

² Aponi tokorakinae akwap ŋina alo To Yorodan neni a ŋidwe a Manase a ŋuluce a lu: Abieser, Elek, Asiriel, Sekem, Eper ka Semida. Arae ŋul ŋiletok a Manase a Lokoku a Yosepu ŋulusapa a ŋatekerin kec.

³ Nai Selopead Lokoku a Eper a ŋolo arae lokoku a Gilead a ŋolo arae lokoku a Makir a ŋolo arae lokoku a Manase, amamukar iŋes ŋidwe ŋulusapa, arae ŋidwe ŋulupesur bon ayakar iŋes. Ŋirorwa kec ikes lu: Mala, Noa, Ogila, Milika ka Tirisa.

⁴ Apotu ikes toloto neni a Eleasar a esacaradoti ka neni a Yosua a lokoku a Nun ta neni a ŋikarikok a Ŋisirael temasi, “Abu Ekapolon kicik Moses akorakin isua akwap ŋina eruwor ŋina kosi lopite ŋolo ekorakinitere ŋikaipapae kosi.” Aŋun, ikwaŋinapei ecikitor Ekapolon Moses, abu Yosua inak ikes aloyeneta a papa kec akwap ŋina abu toruwor ŋina kec.

⁵ Ŋakiro ŋun ikes aryamunia Manase ŋatutubeta ŋace ŋatomon, kimorikinos neni a ŋunaarei a nu: Gilead ka Basan alo Kide Yorodan.

⁶ Eyatakina akwap kec, anerae apotu ŋidwe a Manase ŋulupesur toryamut akwap kaapei ka ŋikaipapae kec, nai arae akwap a Gilead ŋina a ŋiletok a Manase a ŋuluce.

⁷ Esyakinit ekukoru a Manase alo Aser tari Mikimesas neni iteosi ka Sekem. A nen kidir lowae ŋolo alo Kwap, nakwap ŋina a En-Tapua.

⁸ Arae akwap a Tapua ŋina a Manase, nai nenilope erae etaun Tapua ŋolo ayai lokukoru a Manase, arae ŋolo a Epuraim.

⁹ Totiyaar nai ekukoru kec a nen tomyaa lowae ŋolo alo Kwap ayonae Kana. Ŋitaunio ŋulu aya lowae ŋolo alo Kwap ayonae, arae ŋulu a Epuraim tari daŋ ŋina ayakatar ŋitaunio ŋul nakwap a Manase. A nen, kinapakin ekukoru a Manase ayonae alowae a ŋolo alo Kuju, toremokin nanam Mediteranian.

¹⁰ Ayai akwap a Epuraim Kwap ŋina a Manase toyai ŋina a Manase Kuju ŋina a Epuraim. Arae ekukoru keŋ alowae a ŋolo alo To anam Mediteranian, alo Kuju arae ekukoru keŋ Aser ka alowae a ŋolo alo Kide arae Isakar.

¹¹ Ayakasi Isakar ka Aser ŋitaunio ŋulu arae ŋulu a Manase; ikes lu: Bes-Can ka ŋirerya keŋ, Ibileam ka ŋirerya keŋ, Dor ka ŋirerya keŋ, En-Dor ka ŋirerya keŋ, Taanak ka ŋirerya keŋ, Megido ka ŋirerya keŋ.

¹² Pa apedorito ŋituŋa a Manase akikamar ŋitaunio ŋul, anerae ariŋa Ŋikanaani imukekinito akiboi anakwap a ŋin.

¹³ Nai apaki ŋina agogoŋiorotor Ŋisirael, apotu toreikis Ŋikanaani kituruwosi ŋiketiyak kec, nai apotu nyiritasi ikes jik.

Kiŋitakis ŋituŋa ŋulu ke ekabila a Epuraim ka Manase akiyatakino akwap kec.

¹⁴ Apotu ŋituŋa a ekabila a Epuraim ka Manase kiŋita Yosua temasi, “Kaanukiro ikiinakinia iyoŋ isua akwap epei bon tolalakatei bo isua ikwapei adaunia Ekapolon akiterereŋ?”

¹⁵ Toboŋok Yosua ikes tema, “Ani kilalak iyes, toloto namoni kidimut akwap aŋuna kus anakwap a Ŋiperisi ka a Ŋirepaim, anerae edidiŋ aŋuna kus akwap ŋina a ŋikamukumukui ŋina a Epuraim.”

¹⁶ Tolimut ŋituŋa a Yosepu temasi, “Edidiŋ aŋuna kosi akwap ŋina a ŋikamukumukui ŋin ka nabo Ŋikanaani daadaŋ ŋulu elomito nadipoe, eyakatar ŋagaari ŋuna a ŋasuwa ŋuna ke ejie; tari ŋulu alo Bes-Can ka ŋirerya keŋ kaapei ka ŋulu anakadipaalat Yesireel ikote nenipei.”

¹⁷ Abu nai Yosua tolimok ŋituŋa a ekabila a Epuraim ka ŋolo a Manase ŋolo alo To tema, “Ilalak iyes nooi ka igogoŋ nooi. Nyiryamunete iyes akwap apei bon,

¹⁸ nai eruwor akwap ŋina a ŋikamukumukui daŋ ŋina kus. Erae akwap ŋin amoni, kidimutu iŋes. Eruwor iŋes daadaŋ ŋina kus. Kire, iritarete iyes Ŋikanaani tari daŋ kegogoŋ nooi ka keyakatar ŋagaari ŋuna a ŋasuwa.”