Yos. 15 - Ebaibul

Akwap ŋina akorakinio Yuda

¹ Akwap ŋina akorakinio ekabila a Yuda a ŋikalya, adolit ekukoru Edom alowae a ŋolo alo Kwap ka adolit naloŋisat Sin ŋina eyai lowae ŋolo alo Kwap jik.

² Alowae a ŋolo alo Kwap pei, etorit ekukoru a akwap kec nakisalet a Anam a ŋina Atwan alowae a ŋolo alo To, tomyaa Kwap;

³ toman alo Kwap neni enyaritae Akirabim tolunyar Sin, tosodi kitor Kwap Kadec-Barinea. Kidir neni enyaritae Esiron, kipor todoka neni enyaritae Adar kilugok aina kidir Karika.

⁴ Ani enyouni a nen, kidir neni enyaritae Asimon, tomek ayonae ŋina enyaritae ŋina a Ijipit, toremokin nanam Mediteranian. Ekukoru alowae a ŋolo alo Kwap ŋol.

⁵ Alowae a ŋolo alo Kide, egyerit anam ŋina Atwan tomyaa jik tari neni elomarya Yorodan nanam ŋina Atwan. Alowae a ŋolo alo Kuju esyakinit anagule ka anam aneni esalunia aŋolol Yorodan.

⁶ Adokarit ekukoru tari Bes-Ogila, kirop toman alo Kuju neni enyaritae Bes-Araba, kiropo a nen kitor namoru ŋina enyaritae ŋina a Boan alokoku a Ruben;

⁷ totiyaar a nen kidir Debir lowae ŋolo ka akadipaalat a ŋina enyaritae Akor, kilugok Kuju lowae ŋolo a Giligal neni iteosi ka edoket ŋolo ka Adumim alo Kwap akadipaalat, kiporo kitor lolelyan ŋulu a En-Semes kisal alo En-Rogel;

⁸ tomyaa kidiama akadipaalat ŋina Ben-Inom, toremor nakeju ke ekamukumukut a Ŋiyebusi (iŋes Yerusalem), alowae a ŋolo alo Kwap, todoka a nen lokamukumukut ŋolo alo To akadipaalat Ben-Inom, toman alo Kuju akadipaalat a Rapaim.

⁹ Kiporo alokidiama ekamukumukut ŋol, kitor lolelya a Nepetoa, tomyaa lotaunio ŋulu alomoru Epuron; kilugok a nen kitor Baala (iŋes Kirias-Yearim);

¹⁰ kilugok alo To Baala, kidir lomoru Seir, tomek akeju a emoru Yearim (iŋes Cesalon) alo Kuju, totiyaar Bes-Semes kitor diyete Timina;

¹¹ kiporo a nen kitor nakeju a ekamukumukut a ŋolo alo Kuju Ekiron, kilugok kidir Cikeron, kinapakin emoru Baala, kiporo Yabaneel; toremokin nai nanam Mediteranian.

¹² Alowae a ŋolo alo To, anam Mediteranian iŋes egyerit ekukoru. Arae ŋol ekukoru a ŋituŋa a ekabila a Yuda a ŋatekerin kec.

Torem Kaleb ŋitaunio Eburon ka Debir

¹³ Aponi Kaleb lokoku a Yepune inakinae ŋalup aneni a ŋituŋa a Yuda, ŋalup ŋuna alo Kirias-Ariba, iŋes Eburon, lopite ŋolo kicikitor Ekapolon Yosua. (Arae Ariba papa ka Anak).

¹⁴ Abu Kaleb kirit a nen Ŋianakim ŋiuni ŋulu araakasi ŋiletok ka Anak; ŋirorwa kec arae Cecai, Aiman ka Talimai.

¹⁵ Abu Kaleb kicodo a nen torem ŋituŋa a Debir; ekiŋaren sek arae ekiro a Debir Kirias-Seper.

¹⁶ Abu Kaleb kirworik tema, “Ituŋanan ŋini eremi Kirias-Seper kikama, ainakini ayoŋ iŋes nakoku kaŋ Acisa toruwor aberu keŋ.”

¹⁷ Abu Osiniel lokoku a Kenas alokaato keŋ a Kaleb kikama etaun ŋol. Tosodi nai Kaleb inak Osiniel nakoku keŋ Acisa toruwor aberu keŋ.

¹⁸ Ani edoluni Acisa neni ka Osiniel, abu tolimok Osiniel akilipun aneni a Kaleb ŋalup. Ani edokuni Acisa alosigirya keŋ, kiŋit Kaleb iŋes tema, “Nyo icamit iyoŋ?”

¹⁹ Toboŋok iŋes tema, “Inakinae ayoŋ akinyonyoet. Ikikorak iyoŋ ayoŋ ŋalup alo Negeb, inakinae ŋakare a ŋakipi daŋ.” Abu nai Kaleb inak iŋes ŋakare ŋuna abokitae neni amukur ka neni adipal alodiyete Eburon.

Ŋitaunio a ŋituŋa a Yuda

²⁰ Arae na akwap ŋina apotu ŋituŋa a Yuda toryamut a ŋatekerin kec.

²¹ Ŋitaunio a ŋituŋa a Yuda alowae a ŋolo alo Kwap jik ŋulu ekukorotor Edom arae ikes lu: Kabiseel, Eder, Yagur,

²² Kina, Dimona, Adada,

²³ Kedec, Asor, Itinan,

²⁴ Sip, Telem, Bealos,

²⁵ Asor-Adata, Kerios-Esiron, (iŋes Asor),

²⁶ Amam, Sema, Molada,

²⁷ Asar-Gada, Esimon, Bes-Pelet,

²⁸ Asar-Sual, Beeriseba, Bisiosia,

²⁹ Baala, Iim, Esem,

³⁰ Elitolad, Cesil, Orima,

³¹ Sikilag, Madimana, Sanisana,

³² Lebaos, Cilim, Ain ka Rimon. Arae ŋul a nen ŋitaunio ŋatomoniarei ka ŋikanikaomwon ka ŋirerya kec.

³³ Anadipo arae ŋitaunio kec lu: Esitaol, Sora, Acina,

³⁴ Sanoa, En-Ganim, Tapua, Enam,

³⁵ Yarimus, Adulam, Soko, Aseka,

³⁶ Saaraim, Adisaim, Gedera, Gederosaim. Arae ŋul a nen ŋitaunio ŋitomon ka ŋiomwon ka ŋirerya kec

³⁷ Senan, Adaca, Migidal-Gad,

³⁸ Dilean, Misipe, Yokiseel,

³⁹ Lakis, Bosikas, Egilon.

⁴⁰ Kabon, Lamam, Citilic,

⁴¹ Gederos, Bes-Dagon, Naama ka Makeda. Arae ŋul a nen ŋitaunio ŋitomon ka ŋikanikapei ka ŋirerya kec.

⁴² Libina, Eser, Acan,

⁴³ Ipita, Asina, Nesib,

⁴⁴ Keila, Acisib ka Mareca. Arae ŋul a nen ŋitaunio ŋikanikaomwon ka ŋirerya kec.

⁴⁵ Ekiron ka ŋitaunio keŋ ta ŋirerya keŋ;

⁴⁶ ameun alo Ekiron akitodol nanam Mediteranian ka diyete Acidod daadaŋ ka ŋirerya keŋ.

⁴⁷ Acidod ka ŋitaunio keŋ ta ŋirerya keŋ, Gasa ka ŋitaunio ta ŋirerya keŋ; akitodol nayonae ŋina enyaritae ŋina a Ijipit tari nanam Mediteranian.

⁴⁸ Alowae a ŋolo a ŋikamukumukui, arae ŋitaunio kec lu: Camir, Yatir, Soko,

⁴⁹ Dana, Kirias-Sana, (iŋes Debir),

⁵⁰ Anab, Ecitemo, Anim,

⁵¹ Gocen, Olon ka Gilo. Arae ŋul a nen ŋitaunio ŋitomon ka epei ka ŋirerya kec.

⁵² Arab, Duma, Ecan,

⁵³ Yanim, Bes-Tapua, Apek,

⁵⁴ Umita, Kirias-Ariba (iŋes Eburon) ka Sior. Arae ŋul a nen ŋitaunio ŋikanikaomwon ka ŋirerya kec.

⁵⁵ Maon, Karimel, Sip, Yuta,

⁵⁶ Yesireel, Yokodeam, Sanoa,

⁵⁷ Kain, Gibea ka Timina. Arae ŋul a nen ŋitaunio ŋitomon ka ŋirerya kec.

⁵⁸ Alul, Besisur, Gedor,

⁵⁹ Maaras, Bes-Anos ka Elitekon. Arae ŋul a nen ŋitaunio ŋikanikapei ka ŋirerya kec.

⁶⁰ Kirias-Baal, (iŋes Kirias-Yearim) ka Raba. Arae ŋul a nen ŋitaunio ŋiarei ka ŋirerya kec.

⁶¹ Alowae a ŋolo ka aloŋisat arae ŋitaunio kec lu: Bes-Araba, Midin, Sekaka,

⁶² Nibican, etaun ŋolo ka Acumbi ka En-Gedi. Arae ŋul a nen ŋitaunio ŋikanikapei ka ŋirerya kec.

⁶³ Nai apotu ŋituŋa a Yuda nyiritasi Ŋiyebusi ŋulu alomito Yerusalem ka arubakis Ŋiyebusi eyakasi Yerusalem erukito ka ŋituŋa a Yuda tari tokona.