Yos. 14 - Ebaibul

Tokorakinae akwap ŋina alo To Yorodan

¹ Ŋakiro ŋuna etupakinito, erae ŋuna elimorito epite ŋolo aponiata Ŋisirael tokora akwap a Kanaan alowae a ŋolo alo To aŋolol Yorodan. Ŋituŋa ŋulu akorete ŋalup lotuŋa ikes lu: Eleasar esacaradoti ka Yosua lokoku a Nun ta ŋikapolokinitok ŋikalya ŋulu a ŋikabilae a Isirael.

² Aponi ŋikabilae ŋulu apiyanuna ŋulu arae ŋikanikaomwon ka atutubet tokorakinae ŋalup anakilamilam ikwaŋina kicikitor Ekapolon Moses.

³ Aris sek Moses kekoraki ŋikabilae ŋiarei ka atutubet apei a ŋikabilae a Ŋisirael ŋakwapin kec alo Kide alokekwaye aŋolol Yorodan. Nai abu nyekorak ekabila a Lepi adiokwap toruwor ŋina kec,

⁴ anerae atyakitae ŋiletok a Yosepu arae ŋikabilae ŋiarei, ekabila a Manase ka ekabila a Epuraim. Nai ŋituŋa a Lepi aponi nyekorakin adiokwap, mati ŋitaunio bon neni eboiyoto ikes ka neni adakasi ŋibaren kec.

⁵ Anakikor kec ŋalup, apotu Ŋisirael kitiyata ikwaŋina abunio Ekapolon kicikia Moses.

Tokorakinae Eburon neni a Kaleb

⁶ Apotu nai ŋituŋa ŋulu a Yuda potu Giligal neni a Yosua. Tosodi Kaleb lokoku a Yepune a ŋolo alo Kenisi tolimok iŋes tema, “Iyeni iyoŋ ŋuna abu Ekapolon tolimok Moses eketiyan ka Akuj alo Kadec-Barinea, ŋakiro ŋuna ikikamunito iyoŋ ka ayoŋ.

⁷ Arae ekimar a ŋikaru kaŋ ŋatomoniomwon apaki ŋina ekeyakiya Moses eketiyan a Ekapolon ayoŋ alo Kadec-Barinea akireb akwap a Kanaan. Abu ayoŋ oya neni keŋ ŋakiro ŋuna iyookino.

⁸ Apotu ŋirototin ŋulu ikirukorit ka ayoŋ akireb Kanaan kitubuliyosi ŋituŋa. Nai abu ayoŋ orubak ekinyomit jik Ekapolon Akuj kaŋ.

⁹ Abu nai Moses kikoŋ akoloŋit ŋin tema, ‘Kire jik eruwor akwap ŋina adaut ŋakejen kon akicak ŋina kon ka ŋidwe kon ŋikaru ka ŋikaru, anerae ibu iyoŋ torubak jik ikinyomit Ekapolon Akuj kaŋ.’

¹⁰ Nai kiira tokona, ekeyok ayoŋ Ekapolon Akuj lopite ŋolo eikinitor. Adol tokona ŋikaru ŋatomoniomwon ka ŋikan ameun ŋina alimokinia Ekapolon Akuj ŋakiro nu neni a Moses apaki ŋina awosyata Ŋisirael analoŋisat. Ayoŋ tokona lo, adolo ŋikaru kaŋ ŋatomonikanikauni ka ŋikan.

¹¹ Eriŋa akuwan kaŋ egogoŋ lopite ŋolopei agogoŋio apaki ŋina ekeyakiyaritor Moses ayoŋ. Eriŋa ayoŋ ayakar agogoŋu ŋinajiet ka ŋinakitiyaet etic daadaŋ.

¹² Aŋun, inakinae ayoŋ akwap ŋina a ŋikamukumukui na, ŋina abu Ekapolon ekeik ayoŋ akoloŋit ŋina ikiboŋunio ayoŋ ka ŋirukitos kaŋ, itolimokin iyes ŋakiro a akwap a Kanaan. Iyoŋ daŋ elope ibu kiira apaki ŋin atemar edukito ŋimoe ŋulu anyaritae Ŋianakim ŋitaunio ŋulu ewuatae a ŋarwatatain a ŋuna egogoŋ. Nai ani kekeŋarak Ekapolon ayoŋ, apedori akibwaŋ ikes erita ikwaŋinapei alimunitor Ekapolon.”

¹³ Abu nai Yosua kiterereŋ Kaleb lokoku a Yepune, ido inak etaun Eburon neni keŋ, toruwor ŋolo keŋ.

¹⁴ Aŋun, arubaki Eburon erae etaun a ŋiletok a Kaleb a lokoku a Yepune a ŋolo alo Kenisi tari tokona, anerae abu Kaleb kikinyom nooi Ekapolon Akuj a Ŋisirael.

¹⁵ Ekiŋaren sek, arae ekiro ŋolo anyaritere Eburon Kirias-Ariba. Arae Ariba ekile ŋolo aoi tobutur nooi aneni Ŋianakim a daadaŋ. Abu nai akwap kieŋu jik ejie.