Yos. 13 - Ebaibul

Ŋakwapin ŋuna ariŋa nyikamara anakwap a Kanaan

¹ Abu Yosua tomojoŋ nooi. Tolimok nai Ekapolon iŋes tema, “Imojoŋ iyoŋ nooi, nai eriŋa nyikamara ŋakwapin ŋuna alalak nooi.

² Ŋakwapin ŋuna eriŋa nyikamara ikes nu: Akwap daadaŋ ŋina a Ŋipilistin ka akwap daadaŋ ŋina a Ŋigesuri.

³ Ameun aneni enyaritae Sikor alo Kide Ijipit akitodol lokukoru a Ekiron alo Kuju, imaritae nen daadaŋ erae akwap a Kanaan. Eraakasi ŋirwosi a Ŋipilistin ŋikan; epei ŋolo a Gasa, epei ŋolo ka Acidod, epei ŋolo ka Acikelon, epei ŋolo a Gas ka epei ŋolo a Ekiron ta ŋulu ka Apim.

⁴ Alowae a ŋolo alokwap, ariŋa nyikamara akwap daadaŋ ŋina a Ŋikanaani ka ŋina enyaritae Meara alo Sidon, ameun aneni enyaritae Apek tari lokukoru a akwap a Ŋiamori.

⁵ Eriŋa akwap ŋina a Ŋigibili ka akwap a Lebanon daadaŋ alowae a ŋolo alo Kide; ameun alo Baaligad anakeju a emoru Erimon tari Lebo-Amas.

⁶ Tari ŋituŋa daadaŋ ŋulu elomito nakwap ŋina a ŋikamukumukui ameun alo Lebanon akitodol Misirepos-Maim ka ŋituŋa a Sidon daadaŋ, ayoŋ elope iŋes abwaŋi ikes alokiŋaren Ŋisirael. Itemokino iyoŋ tokorak Ŋisirael akwap ŋin toruwor ŋina kec ikwaŋina adaunia ayoŋ akicik iyoŋ.

⁷ Tokona nai, tokorak akwap lokabilae ŋuluce ŋulukanikaomwon ta atutubet apei a ekabila a Manase.”

Tokorakinae akwap ŋina alo Kide Yorodan

⁸ Aris sek keryamut ŋikabilae a Ruben ka Gad ta atutubet apei a ekabila a Manase akwap ŋina atyakakini Moses ŋolo arae eketiyan a Ekapolon ikes alo Kide Yorodan.

⁹ Adolit akwap kec Areor, lokipetot ŋolo ka ayonae Arinon ka lotaun ŋolo alokidiŋ akadipaalat akitodol nadipo daadaŋ ŋina ayai etaun Medeba, kiger Dibon,

¹⁰ tomyaa tari lotaunio daadaŋ ŋulu a Sikon a erwosit a Ŋiamori a ŋolo sek epukat Ecibon kiporo tari lokukoru a Ŋiamoni.

¹¹ Adolit akwap ŋina atyakakinitae ŋikabilae ŋul tari Gilead ka akwap a Ŋigesuri kaapei ka Ŋimaakasi ka emoru Erimon daadaŋ ta Bacan daadaŋ kiger Saleka.

¹² Iŋes atemar Bacan daadaŋ neni epukat erwosit Og ŋolo sek epukat Acitorot ka Edirei. Og bon abu topiyanun emunyaryo Ŋirepaim apaki ŋina etijio Moses ikes kiela.

¹³ Nai apotu Ŋisirael nyielasi Ŋigesuri ka Ŋimaakasi, ŋakiro ŋun iŋes arubakiniata Ŋigesuri ka Ŋimaakasi iboiyete ka Ŋisirael tari tokona.

¹⁴ Ekabila ŋolo a Lepi iŋes bon abu Moses nyekorak adiokwap toruwor ŋina kec, nai ŋainakineta ŋuna epeitoe aŋuna a Ekapolon Akuj a Ŋisirael, ikes erae ainakinet kec ikwapei ecikitor Akuj ikes.

Akwap ŋina ainakinitae Ruben

¹⁵ Aris Moses kekor ŋatubeta lokabila a Ruben a ŋatekerin.

¹⁶ Apotu ikes toryamut akwap Areor ŋina ayai lokipetot ŋolo ka akadipaalat a ŋina ka Arinon ka etaun ŋolo alokidiŋ akadipaalat ŋin ta adipo daadaŋ ŋina ayai etaun a Medeba.

¹⁷ Toryamut nabo Ecibon ka ŋitaunio lu daadaŋ ŋulu aya nadipo: Dibon, Bamos-Baal ka Bes-Baali-Meon,

¹⁸ Yaas, Kedemos, Mepaas,

¹⁹ Kiriasaim, Sibima, Seres-Saar ŋolo ayai nakikiaret akadipaalat,

²⁰ Bes-Peor ka ŋadipoe a Pisiga ta Bes-Yesimos.

²¹ Iŋes atemar ŋitaunio daadaŋ ŋulu aya nadipoe ka neni epukat Sikon erwosit a Ŋiamori ŋolo sek epukat alo Ecibon. Abu Moses toar Sikon kaapei ka ŋikapolok a Midian, Epi, Rekem, Sur, Ur ka Reba ŋulu ariito ka Sikon, kiboiyete anakwapin a ŋun.

²² Epei alokidiŋ ŋulu apotu Ŋisirael toara, iŋes Baalam ekadwaran ŋolo arae lokoku a Beor.

²³ Yorodan ka ŋikipetetyo keŋ ikes egerito ekukoru a Ŋirubeni. Arae nen neni aponi tokorakinae Ŋirubeni a ŋikalya, a ŋitaunio ka a ŋirerya.

Akwap ŋina akorakinitae ekabila a Gad.

²⁴ Keris sek Moses kekoraki akwap ekabila a Gad daŋ a ŋatekerin.

²⁵ Arae ŋakwapin nu akorakinitae ikes: Yaser ka ŋitaunio daadaŋ ŋulu a Gilead ta atutubet ŋina ka akwap a Ŋiamoni, kiger Areor alo Kide Raba.

²⁶ Ŋatubeta ŋace ŋuna akorakinitae ikes arae ŋinapei alo Ecibon akitodol Ramas-Misipe ka Betonim ka ameun alo Makanaim akitodol lokukoru a akwap a ŋina enyaritae Debir.

²⁷ Alowae a ŋolo a akadipaalat a Yorodan apotu toryamut Bes-Aram, Bes-Nimira, Sukos ka Sapon. Akoritae daŋ ikes neni edoŋit neni epukat Sikon ŋolo arae erwosit a Ecibon.Arae ekukoru kec alowae a ŋolo alo To aŋolol Yorodan ka alowae a ŋolo alo Kuju, arae anam Galileya.

²⁸ Arae ŋakwapin ŋun ekiner ŋolo akorakinitae ekabila a Gad a ŋatekerin, a ŋitaunio ka a ŋirerya.

Akwap ŋina akorakinitae atutubet apei a ekabila a Manase alo Kide aŋolol Yorodan

²⁹ Keris sek Moses kekoraki natutubet apei ŋina a ekabila a Manase akwap. Akorakinitae ikes akwap ŋin a ŋatekerin.

³⁰ Egeri ŋolo ka akwap kec arae ŋinapei alo Makanaim kitor Bacan neni epukat Og ŋolo arae erwosit a Bacan ka ŋitaunio daadaŋ ŋulutomonikanikapei ŋulu arae ŋulu a Yair a erwosit a Bacan.

³¹ Ŋakwapin ŋace ŋuna akorakinitae ikes arae atutubet a Gilead, Acitorot, Edirei ka ŋitaunio ŋulu epukat sek Og alo Bacan. Akorakinitae ŋakwapin ŋun natutubet apei ŋina a ŋituŋa a Makir alokoku a Manase.

³² Arae ŋun ŋakwapin ŋuna abu Moses tokorak lokabilae a Ŋisirael anadipoe a Moab alokekwaye Yorodan alo Kide Yeriko.

³³ Nai abu Moses nyekorak adiokwap lokabila a Lepi. Abu tolimok ikes atemar ainakinet kus iŋes atutubet adio anainakineta a ŋuna einakinio Ekapolon Akuj a Ŋisirael.