Yos. 1 - Ebaibul

Tolimok Akuj Yosua akikamar Kanaan

¹ Ekaku ketwana Moses eketiyan ŋolo ke Ekapolon, kirwor Ekapolon neni a Yosua a lokoku a Nun, a ŋolo sek eŋarakinit Moses tema,

² “Atwana eketiyan kaŋ Moses. Aŋun, tonyoutu tokona ka Ŋisirael todoka aŋolol Yorodan, tolomasi nakwap ŋina ainakinit ayoŋ Ŋisirael.

³ Neni daadaŋ iciakete ŋakejen kus, akainakini ayoŋ iyes, ikwaŋinapei abunio eik Moses.

⁴ Ameun analoŋisat alowae a ŋolo alo Kwap, akitodol lomoru Lebanon alowae a ŋolo alo Kuju, tari Kide naŋolol ŋina apolon ŋina enyaritae Eupurate, akwap a Ŋiitaiti daadaŋ, kigyer anam ŋina apolon Mediteranian alowae a ŋolo alo To.

⁵ Emam ituŋanan ŋini epedori akiloun iyoŋ eriŋa iyari. Ikiruki ayoŋ ka iyoŋ lopite ŋolopei sek ikirukitor ka Moses. Nyatyakar jik ayoŋ aneni kon, kori nyakaŋeri jik ayoŋ iyoŋ.

⁶ Togogoŋior, nabo totitinyor, anerae iyoŋ isikamari ŋituŋa lu akwap ŋina abu ayoŋ ekoŋ ainakin atapapaa kec.

⁷ Togogoŋior iyoŋ erae agogoŋior ka totitinyor nooi, kimukekinite akiwuapit Ŋikisila daadaŋ ŋulu abu eketiyan kaŋ Moses ikicikak iyoŋ. Nyijamak tari epei a Ŋikisila a ŋul, ikotere ani neni ilosi daadaŋ, topedo akitiya ŋuna ilosikinit.

⁸ Kiricakinite asyomenen apaki ŋina ilipyata iyes ŋuna igiritae lokitaabo ŋolo a Ŋikisila, toruwor ikes itami iyoŋ apaaran ka akuwar, ikotere imukekini akiwuapit ŋuna daadaŋ igiritae lokitaabo ŋol. Alopite a ŋol, erereŋior erot kon, topedo akitiya ŋuna ilosikinit.

⁹ Tokona nai, ekeciki ayoŋ iyoŋ; togogoŋ ka totitiny. kiurya nyikikadanak, anerae ayoŋ Ekapolon Akuj kon, ikirukit ayoŋ ka iyoŋ aneni ilosi daadaŋ.”

Kiserak Yosua ŋituŋa ŋakiro

¹⁰ Kiserak nai Yosua ŋikarikok a ŋituŋa ŋakiro tema,

¹¹ “Kirimokisi alomar, tolimokisi ŋituŋa ŋakiro nu, ‘Kitemonokisi akimuj, anerae kelunyarosi ŋirwa ŋiuni ilosete iyes akidok aŋolol Yorodan, ido kikamasi akwap ŋina ikiinit iyes Ekapolon Akuj kus.’ ”

¹² Tolimok Yosua ateker a Ruben ka ŋina a Gad ta atutubet apei a ateker a Manase tema,

¹³ “Totamunito ŋakiro ŋuna abu Moses eketiyan a Ekapolon ikicik iyes ebala, ‘Ikiinakini Akuj ŋina erae Ekapolon kus iyes akieŋun ka ituruwori iŋes akwap na ŋina kus.’

¹⁴ Ŋaberu kus, ŋidwe kus ka ŋibaren kus, emaikina kidoŋo nakwap ŋina alo Kide aŋolol Yorodan, nakwap ŋina abu Moses ikiik iyes, nai ŋikilyok kus ŋulu ke ejie, emaikina todokasi ekekwaye, kiŋarenikis ka kiŋarakis ŋituŋa kus,

¹⁵ akitodol ŋina isieŋunia Ekapolon ŋituŋa kus kaapei ka iyes, kitolom ikes daŋ nakwap ŋina einakinit Akuj Ekapolon kus ikes. Ani isiboikini Akuj ŋatekerin a Isirael daadaŋ, toboŋut nai iyes kiboikinos nalup kus ŋuna abu Moses eketiyan ŋolo ke Ekapolon itotyakak iyes alo Kide aŋolol Yorodan.”

¹⁶ Toboŋokis ikes Yosua temasi, “Ikitiyae isua ŋuna ilimu iyoŋ daadaŋ, nabo ikilosi neni daadaŋ ikiyaki iyoŋ isua.

¹⁷ Ikiwuapi isua ŋakiro kon lopite ŋolo ikiponia ewuapyata ŋuna a Moses. Ŋuna bon ikigasi isua iŋes atemar bu Ekapolon ŋolo erae Akuj kon toruko ka iyoŋ lopite ŋolo arukitotor ka Moses.

¹⁸ Ituŋanan daadaŋ ŋini eŋeri ŋakiro kon, kori nyiwuapi ŋuna ilimu iyoŋ, earyo, nai togogoŋior iyoŋ ka totitinyor.”