Yona 4 - Ebaibul

Aŋoit a Yona

¹ Nai pa alakara Yona a ŋakiro a ŋun, aŋun, abu toŋo nooi.

² Kilip Yona neni ka Akuj tema, “Okoe Ekapolon, meere mono ŋakiro nu alimunit ayoŋ eriŋa ayai nakwap kaŋ a? Meere mono ikes apotu eketodokis ayoŋ Tarisis ekiŋaren a? Anerae ayeni ayoŋ atemar irae iyoŋ Akuj ŋina ka ajokis, ŋina esyonon, ŋina nyiŋoi atipei, ŋina epol arimao ka ŋina epatana akimyekin akisican.

³ Aŋun, Ekapolon, tolema akiyar kaŋ, anerae ejok ayoŋ otwan akilo akiyar.”

⁴ Kiŋit Ekapolon Yona tema, “Iyookino kire iyoŋ iŋoit a?”

⁵ Toloma Yona alotaun, kiboikin Kide etaun. Todukok aŋuna keŋ nen etolim, kiboikin nen idarit akiŋolikin ŋuna itiyakin lotaun.

⁶ Kitemok Ekapolon Akuj elogilog, kimuko Yona, ikotere nyekadanak iŋes. Tolakar Yona nooi aŋuna a elogilog a ŋol.

⁷ Nai ani taparacu ipiripiriuni akoloŋ, kitemok Akuj ekurut ŋolo abu toar elogilog toono deu.

⁸ Ani ikeun akoloŋ, kitukut Akuj ekuwuam ŋolo amwanan alo Kide, ŋolo sek kitemokinit iŋes, tonom akoloŋ Yona akou kisiraka iŋes. Tolimok Yona Akuj alemar akiyar keŋ tema, “Ejok ayoŋ otwan akilo akiyar.”

Kirwor Akuj neni a Yona

⁹ Nai abu Akuj kiŋit Yona tema, “Iyookino kire iyoŋ aŋoit aŋuna a elogilog a?” Toboŋok Yona tema, “Ee, aŋoit ayoŋ jik, acamit otwan.”

¹⁰ Tolimok Akuj iŋes tema, “Imitakinit iyoŋ ŋuna a elogilog a ŋolo nyibukoritor iyoŋ ŋakinyinyir ka ŋolo nyedupakina iyoŋ; abu elogilog ŋol tolomu nakwaare, ido totwan akoloŋit ŋinace nakwaare.

¹¹ Nyemaikina nai ayoŋ esyoni Ninepe, etaun ŋolo apolon ŋolo eyakar ŋidwe ŋulu edeparito ŋalipyo amiat ka ŋatomoniarei ŋulu nyeyenete ŋuna iyookino ka ŋuna nyiyookino a? Nabo toya ŋityaŋ ŋulu alalak a daŋ a?”