Yona 1 - Ebaibul

Toŋer Yona ŋuna abala Ekapolon

¹ Acekoloŋit, tolimok Ekapolon Yona lokoku ka Amitai tema,

² “Tonyou atipei, tolot Ninepe, lotaun ŋol ŋolo apolon nooi, kisera itoroniyarit ŋituŋa keŋ, anerae eŋolik ayoŋ aronis kec.”

³ Nai abu Yona tonyou tolot Tarisis erae ŋolo eŋerit ŋuna abala Ekapolon. Aŋun, abu totiyaiyar Yopa, toryamu ameeli ŋina alosi Tarisis, totac ŋisiliŋa ŋuludoket, toloma tooma keŋ, ikotere erukorete Tarisis ka ŋituŋa ŋulu alosete inaa, anerae aŋerit iŋes akiwuap acamit ke Ekapolon.

⁴ Nai ananam, kitukut Ekapolon ekuwuam ŋolo ti alalan nooi, toryenyaniar ekuwuam nooi todikino ameeli ebilibiliyar.

⁵ Tobul ŋikametok ameeli, kiworou ŋolokile neni ka akuj keŋ. Kimasasi ikes ŋiboro anameeli nanam ikotere towowoku ameeli. Nai keberakin sek Yona alomar neni esibit akai anameeli neni ajotoo iŋes nooi.

⁶ Bu ekapolon ameeli neni a Yona kiŋit iŋes tema, “Nyo ijotoo iyoŋ kona? Tonyou, tonyara akuj kon! Ŋarukwa ikiŋarakini iŋes iwon, nyikitwaka.”

⁷ Kirworiut ŋikametok ameeli make temasi, “Ocunakin elamilama ikotere ikiyanyuni ŋini ebunitor aronis na neni yok.” Kilamilama ikes toryamut erae Yona kebunitor aronis ŋin neni kec.

⁸ Kiŋita ikes Yona temasi, “Tolimokinae isua, erae aŋuna a ŋae abunio aronis na neni kosi? Alitic itiyae iyoŋ? Ai ibunitor iyoŋ? Ŋae ekiro ka akwap kon ka eka alutuŋa iyoŋ?”

⁹ Toboŋok Yona tema, “Arae ayoŋ Eburaniyat, etopoloorit ayoŋ Ekapolon Akuj ŋina eyai nakuj, ŋina abu tosub anam ka akwap.”

¹⁰ Kitubulo ŋun ŋikilyok nooi kiŋita Yona temasi, “Anukiro nu ŋuna itiya iyoŋ?” Eŋisete ikes ŋun kedaut ayenun atemar eemit Yona aneni ke Ekapolon. Anerae aris sek iŋes kelimoki ikes ŋun.

¹¹ Kiŋita ikes Yona temasi, “Nyo emaikina isua kitiyae neni kon, ikotere edipakin anam aŋuna kosi?” Anerae arubakinit ekuwuam ekusi kimorokokoete ŋakipi ananam.

¹² Tolimok Yona ikes tema, “Kimasakinae ayoŋ nanam, ikotere edipakin anam aŋuna kus; anerae ayeni ayoŋ atemar erae aŋuna kaŋ iŋes abunio ekuwuam lo ŋolo apolon nooi neni kus.”

¹³ Nai kikatakis ŋikilyok ka agogoŋu amyar ameeli ka agogoŋu ecamito amyar lokipetot; nai nyepedosi, anerae arubakinito ŋakipi imorokokoete, nabo tokutunite ekuwuam alowae a ŋolo alosete ikes.

¹⁴ Kiworout ikes neni ke Ekapolon temasi, “Ikilipit iyoŋ okoe Ekapolon, ikilipit iyoŋ nyikimyek isua ikitwaki aŋuna ka akiyar a ekile alo; nabo nyikimarak isua natwanare a ekile a lo a ŋolo nyesecit aneni kosi. Anerae acamit kon etiyakinotor nu.”

¹⁵ Tosodo ikes kimasakis Yona nanam; todipakin nai akimorokok a ŋakipi ananam.

¹⁶ Kitopoloosi ŋikilyok ŋul Ekapolon akilo, inakis iŋes amuronot, ido kikoŋo daŋ neni keŋ.

¹⁷ Nai keris Ekapolon kitemok ekolya ŋolo ti apolon nooi akilikor Yona. Kiriya Yona anakook a ekolya ŋapaarasya ŋauni ka ŋakuwarisya ŋauni.