Yoel 2 - Ebaibul

¹ Tokutakisi arupepe alo Sion; toramakisi eli alomukura kaŋ a ŋolo asegan a ŋolo ke Ekapolon. Kimyekisi ŋituŋa daadaŋ ŋulu iboiyete anakwap a Yudaya tomarana, anerae ebunit akoloŋit ŋina ke Ekapolon, aapuu nooi,

² akoloŋit ŋina ka akiryonut ka akilurur, akoloŋit ŋina elalaata ŋidouwon ka ŋina elalaa akiryonut cuc. Ikiburusiyari asuisui a emaase ŋin ŋina alalan ka adedeŋan ŋina ebunio; lopite ŋolo eburusiyarya akiryonut ŋimoru; Nyetakanuna sek ekiŋaren emaase ŋolo etya ŋol nakwap ŋin; mam daŋ nyetakanuni nabo jik nanyameta ŋuna eponito.

³ Irikarete ikes ŋikito ikwa irikarya akim. Ikwaanikin akwap ŋina eyai kiŋaren keŋ ka emanikor ŋolo ke Eden, nai kaku keŋ, eruwor aloŋisat ŋina eonit deu, ido mam ibore imyekini iŋes.

⁴ Etakani emaase ŋol ikwaan ka esipan a ŋaŋolei, epori emaase ŋol ikwa ŋaŋolei ŋuna ke ejie.

⁵ Ecela iŋes ikwa ŋagaari ŋuna iritae a ŋaŋolei eporete alokidiama ŋimukura, ireta iŋes ikwa arira enomi ŋinya ŋulu aonok ibaki iŋes elal nooi ikwa ajore ŋina etenit aŋuna ke ejie.

⁶ Ebuli ŋakwapin iŋolikinete iŋes; esecasi ŋireetin a ŋituŋa a ŋul a daadaŋ.

⁷ Icodokini iŋes akwap ikwa ŋikajiok; edokakini iŋes ŋarwatatain ikwa ŋisigarya. Elosi iŋes daadaŋ kiŋaren jik, nyeriyenene iŋes,

⁸ nyijuka iŋes alorot elosi; elosi daadaŋ kiŋaren ibakiyarit. Mam ibore epedori akiretakin iŋes, mam ŋini epedori akitowo iŋes.

⁹ Eemanar iŋes tooma etaun, ekeri alokidiama ŋarwatatain. Edokanari tooma ŋakais; edokanari alodirisae ikwa ŋikokolak.

¹⁰ Iryaŋiryaŋakin akwap eapuuni iŋes, emaranikini kidiama, iryokiata akoloŋ ke elap, nyecaunete nabo ŋikacer.

¹¹ Eceluni Ekapolon alokiŋaren ŋasigarya keŋ; elalak ŋasigarya keŋ ŋuna iwuapito ŋakiciketa, nyimarun; kire jik, epol nooi akoloŋit ŋina ke Ekapolon, erae ŋina a ŋinyas jik. Ŋae epedori akidaŋidaŋ akoloŋit ŋin?

¹² Ebala Ekapolon ebe, “Tari tokona kikote neni daŋ, toboŋutu neni kaŋ a ŋikusitai a daadaŋ, kiredanakisi akiron, kigworos ka kiyaloloŋete.

¹³ Tokodosi ŋitai kus, nyicila ŋilowi kus. Toboŋutu neni ke Ekapolon Akuj kus, anerae ejok iŋes ka isyoniono, nyeŋoyenene atipei, epol nooi amina keŋ ŋina nyiryaŋiryaŋa, etenit iŋes jwi jwi akisyon akilo akisican.”

¹⁴ Ŋae eyeni? Acepaki epedori Ekapolon Akuj kus akilocokin ŋatameta keŋ, ikiterereŋ iyes nooi ikiinak ŋikinyom ka ŋimaten; topedosi nai iyes ainakin iŋes ŋikinyom ka ŋimaten.

¹⁵ Tokutakisi arupepe alo Sion, tolimosi akiredakin akiron kus erae ŋina asegan, tonyarautu atukot ŋina italeuno.

¹⁶ Tocunakisi ŋituŋa, kitaleutu atukot a ŋituŋa; yautu ŋikasikou iwapei, tocunakisi ŋidwe, tocunakisi tari ŋiŋwea. Emaikina eteran kimyek agule keŋ ka ateran kimyek agule keŋ ŋina iterania.

¹⁷ Emaikina ŋisacaradotin ŋulu itiyaete alokiŋaren Ekapolon, kigworo alokidiŋ ebarasan ŋolo ka Akai ka Akuj ka Namuroet. Emaikina ikes temasi, “Kisyoni ŋituŋa kon, okoe Ekapolon. Nyituruwo ŋituŋa kon ke elope ŋulu ejamuwaritae, ŋulu irworore anakwapin. Kaanukiro emaikina ŋakwapin iŋitasi ebe, ‘Ai mono eyai Akuj kec?’ ”

Aboŋokinet ka akiikinet ŋina ka Akuj

¹⁸ Abu nai Ekapolon kitoodiu amina keŋ neni a ŋituŋa keŋ, ido abu kisyoni ŋituŋa keŋ.

¹⁹ Abu Ekapolon toboŋok ŋituŋa keŋ tema, “Ekeyakikini ayoŋ iyes ŋikinyom, epiini ka akimyet, ido imwokete iyes; nyeketuruwori nabo ayoŋ iyes ŋulu ikijamuwarito ŋakwapin.

²⁰ Alemari ayoŋ emaase ŋolo abuni alo Kuju eteeka aneni kus, eritari ayoŋ iŋes nakalukae ŋuna erae ŋacaryo anakwap, eritari ayoŋ asepic keŋ ŋina iŋareni nanam ŋina alo Kide, ido abusya keŋ nanam ŋina alo To; ebosuni iŋes a nen tul, eremi abosis keŋ kidiama.” Amunyari ayoŋ iŋes a ŋuna a daadaŋ eitiya iŋes neni kus.

²¹ Iyes ŋimanikorin, Nyikuryaketa, tolelyana ka tolakaros, anerae etiya Ekapolon ŋuna apolok nooi.

²² Iyes ŋityaŋ ŋulu ka ariet, Nyikuryaketa, anerae alibut ŋinya ŋulu ka ariet; ara ŋikito ŋaraito; edodoto ŋiboboryo ka ŋikito ke epiini ŋaraito kec.

²³ Iyes ŋituŋa a Sion, tolelyana neni ke Ekapolon ka Akuj kus, anerae ikiinak iŋes iyes eketataman ŋolo ka akiyookino. Ikiyakiyanakini iŋes iyes akiru ŋina alalan lopite ŋolo pei sek anapakio aŋuna, ieteuni ka iceere, lopite ŋolopei sek ieteunio ka ŋuna iceereo.

²⁴ Ilelebun ŋikinyom nalosin kus ŋuna iramyata iyes; elelebun epiini ŋolokitete ka akimyet anamoti kus kilapanar.

²⁵ “Akatacakini ayoŋ iyes ibore ŋini a ŋikaru a ŋulu abu emaase tonyam, ibore ŋini abu emaase ŋolo apori, ŋolo enyasan ka ŋolo atubutubon tonyam, ibore ŋini abu asigar kaŋ ŋina alalan nooi ŋin yonyam, arae ayoŋ eyakuunit iŋes neni kus akibel iyes.

²⁶ Iryamunete iyes akimuj ŋina alalan ŋina imujete kimwoko, ido ipurete iyes ekiro ŋolo ke Ekapolon ka Akuj kus, a ŋina etiya ŋuna ka aumokin aŋuna kus; mam nabo nyirumete ŋileec ŋituŋa kaŋ.

²⁷ Nen nai iyenuniata iyes atemar ayai ayoŋ Isirael, arae ayoŋ Ekapolon Akuj kus, mam Akuj ace; mam nabo nyirumete ŋileec ŋituŋa kaŋ.”

Akoloŋit ŋina ke Ekapolon

²⁸ “Ekaku, eyakikini ayoŋ Etau kaŋ lotuŋa daadaŋ. Edwarete ŋikusidwe ŋulusapa ka ŋulupesur, irujaete ŋikasikou kus, ka eanyunete ŋikusisorok ŋatakanikineta.

²⁹ Kire, tari ŋiketiyak kaŋ, ŋikilyok ka ŋaberu, eyakikini Etau kaŋ ŋirwa ŋul.

³⁰ “Etiyakini ayoŋ ŋakujuwuanisya alokidiama ka ŋaumonokineta alokwap, eyakaun ŋaokot ka akim ta apuru ŋina alalan nooi;

³¹ isiryonio akoloŋ cuc, itereŋio elap puu, kikok ŋaokot, eriŋa nyedolo Akoloŋit ŋina apolon nooi ŋina ke Ekapolon.

³² Nai ituŋanan daadaŋ ŋini enyarit ekiro ŋolo ke Ekapolon, eiunio; anerae eyakaun lomukura Sion ka Yerusalem ŋulu esiyete anakiro a ŋun, ikwapei alimunio Ekapolon, ido ŋice alokidiŋ ŋulu ideun, eruworosi ŋulu erae Ekapolon enyarae.”