Yoel 1 - Ebaibul

¹ Ŋakiro ŋuna abu Ekapolon kirwor neni a Yoel alokoku a Pesuel ikes nu:

Kikalout ŋituŋa aŋuna erikarya emaase ŋikinyom kec

² Ŋikasikou, kiirasi ŋakiro nu, kiirasi iyes ŋituŋa daadaŋ ŋulu iboiyete anakwap a na. Atakanunito mono ŋakiro nu neni kus ŋinapei a? Kori alorwa atapapaa kus a?

³ Tolimokisi ŋakiro nu neni a ŋidwe kus, ido emaikina ŋidwe kus tolimokis ŋidwe kec ka ŋidwe a ŋul tolimokis anyamet ŋina etupakini ikes.

⁴ Ibore daadaŋ ŋini abu emaase ŋolo etubutubui kimyek, abu asuisui ŋina a emaase kirika. Ibore daadaŋ ŋini abu asuisui a emaase kimyek, abu emaase ŋolo eporonori iwadio kirika, ibore daadaŋ ŋini abu emaase ŋolo eporonori iwadio kimyek, abu emaase ŋolo enyasan kirika.

⁵ Tonyoutu iyes ŋikamerak, ido kigworo; kiwololoto iyes daadaŋ ŋikamatak epiini, anerae alemar epiini anakituka kus.

⁶ Arem asuisui a emaase akwap yok, erae asuisui ŋin ŋina adedeŋan ka ŋina nyimarun; eitaaka ŋikyal keŋ ikote ŋulu ke eŋatuny ka ikote ŋitiroŋ keŋ ŋulu ka aŋatuny.

⁷ Emasak iŋes ŋikito yok ŋulu ke epiini kwap, eturuwo ŋicaryo, ido enyasu ŋiboboryo yok, abuto ŋakaabuk, emasak kwap; akwaŋiata ŋaten a ŋiboboryo kya.

⁸ Kigworo inapito ŋiguniyae, ikwa igworor apese ekile keŋ ŋolo ariŋa iitari iŋes.

⁹ Alemar ŋainakineta ŋuna a ŋikinyom ka ŋuna a ŋimaten alo Kai ke Ekapolon. Igworosi ŋisacaradotin, ŋulu erae ŋiketiyak ŋulu ke Ekapolon.

¹⁰ Enyasun ŋimanikorin, aoko ŋalup deu; Enyasun ŋikinyom, aoko ŋaraito a epiini deu, adaun akimyet.

¹¹ Kiyaloloŋo, iyes ŋiketak, kiwololoto, iyes ŋiketak ŋikito ke epiini; kiyaloloŋo aŋuna a ŋaganoi ka ŋikinyom ŋulu ikote erau anerae erikar ŋikinyom alomanikorin.

¹² Ainiyasi ŋikito ke epiini, ageeneun ŋiboboryo. Aoko ŋikito ŋulu ikwaan ka ŋikacikiciki ŋulu enyaritae Pomegrate ka aoko ŋidukan ka ŋaraito ŋuna enyaritae aples, aoko ŋikito ŋulu ke emanikor daadaŋ. Kire jik, apuripuryaar alelyanu a ŋituŋa,

Anyaritoi ŋina ka akiki ka akilip

¹³ Tonapa ŋiguniyae, iyes ŋisacaradotin, ido kgiworo; kiwololoto, iyes ŋulu itiyaete Namuroet. Potu, tonapa ŋiguniyae akuwar kya, iyes ŋulu irae ŋiketiyak ŋulu ka Akuj; anerae alemar alo Kai ka Akuj kus ŋainakineta ŋuna a ŋikinyom ka ŋimaten.

¹⁴ Tolimutu akoloŋit ŋina asegan, ŋina iredakiniata akiron; Tonyarautu atukot ŋina italeuno. Tonyarautu ŋikasikou ka ŋituŋa daadaŋ ŋulu iboiyete anakwap kus ipotu Kai ke Ekapolon Akuj kus, kikaloikisi Ekapolon.

¹⁵ Okoe etya ŋican ka akoloŋit a ŋin ai! Anerae aapuu akoloŋit ŋina ke Ekapolon; ebuni akoloŋit ŋin ikwaan ka ŋina ikimunaarya ŋolo Etiron.

¹⁶ Nyirikara mono akimuj yok ikite iwon a? Nyelemara mono alelyan ka alakara alo Kai ka Akuj yok a?

¹⁷ Atwakiyasi ŋikinyom alokwap ŋakapoŋor a ŋalup, anyamunosi ŋakais ŋuna sek idyasyo akimuj; anyamunosi ŋidulae, anerae atwakiyasi ŋikinyom.

¹⁸ Kiirasi epite ŋolo erwotor ŋibaren! Irimito ŋisipanin a ŋaatuk, anerae emam ŋinya edakasi; tari ŋisipanin a ŋamesekin, eryamunito ŋican.

¹⁹ Egworo ayoŋ neni kon, okoe Ekapolon anerae anomiya akim ŋinya anadakar, ka anomiya arira ŋikito daadaŋ alomanikor.

²⁰ Tari ŋityaŋ ŋulu ka ariet, ikigworonokinete iyoŋ; anerae aoko ŋayona ŋuna sek eya ŋakipi, ido anomiya akim ŋinya anadakar.