Yob 7 - Ebaibul

Tolimu Yob atemar nyedaun ŋican keŋ

¹ “Nyegogoŋ mono ŋiticisyo ŋulu itiyaete ŋituŋa anakwap a? Nyetyoko mono ŋirwa ka nyikwaan ka ŋulu a eketiyan a ŋolo etacio a ŋinakoloŋit a?

² Nyikwaan mono ikes ka epito ŋolo iitanit akieŋun alotolim a? Nyikwaan mono ikes ka eketiyan ŋolo iitanit eropit keŋ ŋolo adaunia iŋes akitiyaa akoloŋit ŋin a?

³ Aŋun, akainakin ayoŋ ŋilapyo ŋulu araakar ekoŋinait, ido akatubokin ayoŋ ŋakuwarisya ŋuna ka akiyaloloŋ.

⁴ Ani aperi ayoŋ eŋitanar bon abala, ‘Ori mono anyounio ayoŋ?’ Nai erubanakini akuwar eoya ka ebelibelo ayoŋ apaki ŋin daadaŋ tari ŋina iwalarya.

⁵ Abutasi ŋikur ka elos akuwan kaŋ, etibabanakin amuny a akuwan kaŋ, ido togeu nabo abelebela.

⁶ Elunyanarosi ŋirwa a akiyar kaŋ atipei akilo tari akicuta a ŋamotokae alorukude, ido edaunun ŋinakoloŋit emam akigeno ayakar ayoŋ.

⁷ “Okoe Akuj, totamunite atemar erae akiyar kaŋ ekuwuam koŋin, nyeŋolikini nabo ayoŋ ajokis.

⁸ Ŋini ekete ayoŋ tokona, nyekeŋolikini ayoŋ nabo, ani eriŋa iyoŋ ikiwarit ayoŋ Akuj, ikiryamuni ayoŋ kadaun.

⁹ Lopite ŋolo ielielaaror edou, ido toŋopiya, eŋopiyanarete ŋulu eloseneneete nakibois a ŋikatwak nyetakanut nabo jik;

¹⁰ nyeboŋununeetee nabo nakais kec, nyerubakinio etamunitae ikes anakiboisyo kec.

¹¹ “Aŋun, nyeliliŋi ayoŋ jik, erwori ayoŋ ŋakiro anaryeba a ŋina a etau kaŋ, arubakini ayoŋ eŋuruŋura anaŋoit a ŋina ka akiyar kaŋ.

¹² Arae mono ayoŋ anam, kori epiu ikiyokitor iyoŋ ayoŋ a?

¹³ Ani atemari ayoŋ ebe, ‘Itidipokini ajotkaŋ aryeba kaŋ, elemari ekitaada kaŋ aryeba kaŋ,’

¹⁴ togeu iyoŋ akitukuryan ayoŋ a ŋakirujaeta ka akitubul ayoŋ a ŋakitoodyanakineta,

¹⁵ ikotere nai ayoŋ oseu atemar kerae olema akiyar kaŋ omyedakin ka otwana akilo ayakau alokuwane a lo.

¹⁶ Aluŋ ayoŋ akiyar kaŋ, nyeriŋa ayoŋ acamit arubakin ayari. Akuj, kimyekinae ayoŋ bon, anerae ekwaanikin ŋirwa kaŋ ka ekieŋanu.

¹⁷ Okoe Akuj, ata ŋae mono ŋituŋa itopoloorit iyoŋ ikes? Ata ŋae mono ikes iwuakinit iyoŋ lotau kon?

¹⁸ Ata ŋae ikes ilosenene iyoŋ neni kec a ŋinataparacu? Ata ŋae ikes ikatanakini iyoŋ ikes a ŋinapaki?

¹⁹ Nyipedori mono iyoŋ akiŋoliyar iwace tojoŋo akitere ayoŋ tari apaki ŋina euruwuana a? Nyipedori mono iyoŋ akimyekin ayoŋ bon akitodol ŋina elikorya ŋakimul kaŋ a?

²⁰ Ani kasec ayoŋ, eyai aronis etiya ayoŋ neni kon iyoŋ Akuj ŋina irae ekeyokon a ŋituŋa a? Kaanukiro ikilosikinio iyoŋ ayoŋ? Kaanukiro aruworor ayoŋ aneni kon atyonis kon?

²¹ Kaanukiro nyikisyonio iyoŋ ayoŋ aŋuna abilya ŋikisila, ido tolema asecit kaŋ? Alotooma apaki ŋina euruwuana, alomari ayoŋ nalup, ikiwari iyoŋ ayoŋ, nai nyarubakini arae ituŋanan.”