Yob 6 - Ebaibul

Toboŋok Yob ŋakiro ka Elipas

¹ Toboŋok nai Yob tema,

² “Okoe, kerae ca kipimeneneetei ŋican ŋulu eketeryamunitae ayoŋ, kerae ca kipimeneneetei akiyaloloŋ kaŋ!

³ Alotooma apaki na, keryamun epotyok akilo asinyon ŋina ka anam, aŋun, adau ayoŋ alimun ŋakiro kaŋ ekirikira,

⁴ Eketeryamu Akuj ayoŋ aryeba ikwa ituŋanan ŋini egumitae a ŋikaleŋeleŋe, ido elelebun nakiyar kaŋ akisorit ŋina aaran, eketubul ayoŋ Akuj aŋuna a ŋican a ŋulu alalak a ŋulu ekeyakik iŋes ayoŋ.

⁵ Erwo mono esigirya esibit igworo kedau akinyam ŋinya a? Kori iruko mono emoŋ esibit enyamit akoro kedau adaka a?

⁶ Epedoryo mono akinyam akimuj ŋina apiyanun emam acumbi a? Kori eyai mono abobou eyai lotaŋarobobo a abeiye a?

⁷ Nyekeburit ayoŋ akimuj ŋamuja ŋuna ikote nen, ikwaan ikes ka ŋamuja ŋuna eketiilito ayoŋ.

⁸ “Okoe, kerae ca opedori akiŋit ŋuna acamit, ido toboŋok Akuj ŋuna acamit ayoŋ;

⁹ kerae ca tojok aneni ka Akuj akiar ayoŋ, kakaar ayoŋ, kimyek apedor keŋ bu okoar ayoŋ.

¹⁰ Ani kerae kitiya Akuj ŋun, keruwor ŋun alakar aneni kaŋ ka ayakau alelyanu nooi tari kayakar aryeba ŋina apipilan nooi; anerae nyeŋero ayoŋ ŋakiro ŋuna ka a Akuj a ŋina asegan,

¹¹ Ani gogoŋu mono ayakar ayoŋ arubakinitor edaŋidaŋi? Anu mono etakanunete neni kaŋ ekaku, arubakinitor ayoŋ atitinyikinit?

¹² Ikwaan mono agogoŋu kaŋ ka ŋina a ŋamoru a? Kori ikwaan mono akuwan kaŋ ka asuwat ŋina enyaritae eburonis a?

¹³ Ŋuna a kire, mam ayoŋ epite ŋolo eŋarakinor, alemar aneni kaŋ epite edio ŋolo eŋarakinor.

¹⁴ “Eitanit ayoŋ arimao aneni a ŋikonei kaŋ tari kaesikinit ayoŋ Akuj, kori mam.

¹⁵ Aruwor ŋirukitos kaŋ ŋulu nyikinyoma ikwa ayonae ŋina emam ŋakipi, ikwa ŋayona ŋuna ani emam akiru eokito deu,

¹⁶ ŋuna erapuwanarete ŋakipi, ŋuna erapuwanari ekuno.

¹⁷ Nai ani emwanuni akoloŋ, toŋopiyasi ŋakipi, ani emwanuni toŋopiyasi ŋakipi aneni sek aya.

¹⁸ Tojoŋoto ŋikametok ŋikaala akiwuapit ŋayona ŋun, toloto kidiama naloŋisat totwaka a nen.

¹⁹ Iwarete ŋikametok ŋikaala ŋulu alo Tema ŋakipi, iitanete ŋikalotok ŋulu alo Seba ŋakipi.

²⁰ Eyakaun ŋikarune neni kec aŋuna sek anupitotor atemar eya ŋakipi nen, nai ani epote ikes nen kitiilyata ŋayona eokito.

²¹ Ikwaanikinosi tokona iyes ŋikonei kaŋ ka ŋayonae ŋun aneni kaŋ, iteete tokona iyes ŋican kaŋ, ido amin ekabule neni kus.

²² A ŋikonei kaŋ, ekeŋisit mono ayoŋ iyes ebe, ‘Inakinae ayoŋ ainakinet adio a?’ Kori ‘Inakisi ituŋanan idio alobari kus akaluŋuluŋut a ŋuna kaŋ a?’

²³ Kori, ‘Toiunae ayoŋ anapedor a ŋolo ekesicanit ayoŋ erono a?’ Kori ‘Tolakunae ayoŋ anapedor a ŋolo akatiŋit ayoŋ erono a’?

²⁴ “Kitatamae ayoŋ, ido eliliŋi ayoŋ cek; kiteyenikinae ayoŋ epite ŋolo kabunio odyekarya.

²⁵ Kire ikisirworiunete ŋakiro ŋuna iyookino, nai nyo mono itoodiunito ŋakiro kus ŋuna ikisirworyata iyes ayoŋ?

²⁶ Itamete iyes atemar isiyookinete ŋuna erworo ayoŋ torae bo ŋakiro a ituŋanan a ŋini eyai locan ekuwuam koŋin a?

²⁷ Ipedorete iyes tari akilamilam aŋuna ka atedor ŋini eŋatari ikoki, ipedorete tari akirworiun egyelit ŋolo igyelareta ekone.

²⁸ “Nai tokona, tolakaros ikitete ayoŋ, anerae nyapedori ayoŋ akirworo alyokonu alokiŋaren kus.

²⁹ Totamatamata nabo, ekelipit ayoŋ iyes, nyicamakis ŋuna nyiyookino kitiyakin. Totamatamata tokona, eriŋa akiyookino kaŋ ikoni nenipei sek.

³⁰ Eyai mono alyokonu nakiro ŋuna erworo ayoŋ a? Itamete iyes atemar nyakanomorito ayoŋ ŋican lu a?”