Yob 5 - Ebaibul

Torubak Elipas irworo neni a Yob

¹ “Tonyaraanar tokona, eyai kire idio ŋini ikiboŋokini iyoŋ a? Ali alokidiŋ ŋimalaikan iŋitakini iyoŋ abunore akiŋarakin iyoŋ?

² Kire jik, eari alilit ebaŋ ka eari arakao ŋini emam ŋuna eyeni.

³ Eŋolik ayoŋ ŋibaŋaanotin iata ebari kec, nai abu ayoŋ pa eyenete ikes ecen akibois kec.

⁴ Nyeryamunete ŋidwe kec neni eiunotor iteryamunio ikes ŋican alopuke ka mam ituŋanan elakuni ikes.

⁵ Irikarete ŋulu enyamit akoro akimuj ŋina itaunito ŋulu iteryamunitae ŋican, elemarete ŋulu enyamit akoro ŋul tari ŋikinyom ŋulu eyakasi kidiŋ ŋikukwa, erakaaketa ŋirorokanotin aŋuna ka abaru a ŋulu iteryamunitae ŋican.

⁶ Nyelomununi akiyaloloŋ alokwap, kori nyerupununeete ŋican analup,

⁷ nai ŋinapei idounere ituŋanan elomari locan, lopite ŋolo eporyoto ŋikatyenyityeny a akim kidiama.

⁸ “Ani kerae torae ayoŋ, kewar Akuj, ido olimok ŋakiro kaŋ.

⁹ Itiyae Akuj ŋakiro ŋuna ka aumokin ŋuna nyepedoryo iwon ayenun, itiyae iŋes ŋuna ka aumokin ŋuna nyimarunun.

¹⁰ Eyaununui iŋes akiru nakwap ka iwuanakini ŋakipi lomanikorin;

¹¹ itopoloonori iŋes ŋulu itiditeuna bon, einanakini alelyanu neni a ŋulu igworosi.

¹² Emunaanari Akuj ŋuna eyeete ŋirakaanotin, ikotere nyeryamut ibore idio.

¹³ ikamununui Akuj ŋikaosok anaosou kec, itasalununui Akuj atipei ŋuna eyeete ŋulu irworosi itojokasi.

¹⁴ Iryono akwap aneni kec tari naparan, imudumudosi ikes tari alokidiŋ apaaran esibit akuwar.

¹⁵ Nai eiuni Akuj ŋulu eyakatar akiitanit aneni a ŋiryenyaanotin ka anapedor a ŋina a ŋulu adedeŋak.

¹⁶ Aŋun, eyakatar ŋikulyak akigeno ka egoloro ŋuna nyiyookino aneni kec.

¹⁷ “Erereŋ ituŋanan ŋini aesiki asecit, anerae abu Akuj tolimok iŋes, aŋun, nyiŋer akisicanet ŋina ikisicania iyoŋ Akuj.

¹⁸ Ikiwani Akuj, nai iŋes pei ikimadi, ikidai Akuj, nai iŋes pei itiiyori neni ewanan.

¹⁹ Ikilakuni Akuj anatyokisyo a ŋakanikapei; ani edoli ŋina a ŋakanikaarei emam awana iryamuni.

²⁰ Ikilakuni Akuj anatwanare a ŋina ke eron, ikilakuni Akuj alojie a ŋolo earare.

²¹ Ipakari Akuj aneni kon ŋituŋa ŋulu irworosi ŋuna aronok, nyikeri ŋican apaki ŋina edolunioto.

²² Anapakio a ŋuna a ŋican ka akoro irubakini ilakara, nyikeri tari ŋityaŋ ŋulu adedeŋak ŋulu ka ariet.

²³ Emamukaun ŋamoru alomanikorin a ŋulu itae, iboiyete emam ŋace ka ŋityaŋ ŋulu ka ariet.

²⁴ Aŋun, iboi emam ŋace aloeema kon, iisi ŋamesekin kon, ido iryamuni eyakasi daadaŋ.

²⁵ Iyenuni atemar elalaketa ŋiletok kon ka elalaketa ŋidwe kon lopite ŋolo elalaketa ŋinya anakwap.

²⁶ Itwani kimojoŋ nooi, lopite ŋolo eyaunere nalos ŋikinyom ŋulu etemokin aŋuna ka akiram.

²⁷ Kiira, adaun isua aripirip ŋakiro ŋun ka erae ŋuna a kire. Kiira, ido toyenu aŋuna kon.”