Yob 41 - Ebaibul

¹ “Ipedori mono iyoŋ akiriun etyaŋ ŋolo enyaritae Lepiasan a ŋikodoce a ŋulu iriyere ŋikolya a? Kori a eniar kwap aŋajep keŋ a auno a?

² Ipedori mono iyoŋ akirupakin auno lokume keŋ a? Kori akirepakin ekodocet loŋitinyo keŋ a?

³ Ebuni mono iŋes akilipa iyoŋ akimyekin iŋes a? Kori ikimaimai mono iŋes iyoŋ a?

⁴ Iwuakinete mono iyoŋ ka iŋes acamunet ikotere iŋes eruwor eketiyan kon ŋikaru ka ŋikaru a?

⁵ Ipedori iyoŋ akitobolya iŋes ikwa ikenyit a? Kori ipedori iyoŋ akiwuakin iŋes nauno aŋuna a ŋidwe kon a ŋulupesur a?

⁶ Epedorete mono ŋikecurutak akiŋita egyelit keŋ a? Epedorete mono ikes akorakin iŋes neni a ŋimucurus a?

⁷ Ipedori iyoŋ akicumucum ejamu keŋ a ŋisipeta a? Kori ipedori iyoŋ akicum akou keŋ a akwara a?

⁸ Totap ceni iyoŋ iŋes a ŋakan kon, ijikinosi iyes ejie ŋolo nyikimuryakini iyoŋ nyitamakini nabo iyoŋ akitijikin iŋes jik.

⁹ Ituŋanan daadaŋ ŋini itijikini Lepiasan, emam akigeno atemar ilouni. Pa mono abu tari ŋakujo tobul iŋolikinete iŋes a?

¹⁰ Mam ituŋanan eyakar adedeŋu ŋina ebenyunia Lepiasan. Ŋae epedori akiwo alokiŋaren keŋ?

¹¹ Ŋae epedori akitijikin Lepiasan, ido toyar? Ŋae alotooma akwap daadaŋ ŋini epedori akitijikin iŋes?

¹² “Nyeliliŋiyari ayoŋ ŋakiro a ŋakejen a Lepiasan, kori ŋuna ka agogoŋu keŋ a ŋina etiron, kori ŋuna ka aburis a akuwan keŋ.

¹³ Ŋae epedori ayeŋar amuny a akuwan keŋ? Ŋae epedori akicum amuny keŋ ka ekileŋ, kori ka akwara toloma tooma?

¹⁴ Ŋae epedori ajakar ŋiŋitiny keŋ? Ani kiŋolik ituŋanan ŋikyal keŋ, ebuli ituŋanan.

¹⁵ Idokokino kau keŋ ŋilaino a ŋakabebekwa ŋuna erapito amuny keŋ, ido eenikina iwapei ka egogoŋ esibit amoru.

¹⁶ Idunyudunyasi ŋakabebekwa ŋun nyepedori tari ekuwuam alomar anakidiŋon kec.

¹⁷ Eenenakina ikes diyete ŋinace inaminamakina kaapei nyipedori atyakar apei aneni a ŋinace.

¹⁸ Ani ikaresiyori iŋes kimilyau akica, ecayete ŋakonyen keŋ esibit akoloŋ elomuni taparacu.

¹⁹ Elomununuyete anakituk keŋ ŋakimilyaeta a akim, elomununuyete anakituk keŋ ŋikatyenyityeny.

²⁰ Elomununui apuru alokumes keŋ lopite ŋolo elomunia apuru anamoti a ŋina ekulae, kori ikwa apuru ŋina icunyakinere ŋatunyeny.

²¹ Inokakini akiyeŋa keŋ akim anatotol, elomununui arira anakituk keŋ.

²² “Egogoŋ emosiriŋ keŋ, ikitubuli iŋes iŋolikini.

²³ Idokok iwapei akiriŋ keŋ, eenikina iwapei nyetyakatyaka.

²⁴ Egogoŋ eliŋa keŋ ikoni amoru, egogoŋ ikoni amoru ŋinakiryeet.

²⁵ Ani enyouni iŋes, emini akuryanu neni a ŋiketirok, ani kenyunyuruun iŋes, eemete ŋiketirok.

²⁶ Emam ekileŋ ewani iŋes tari kicum, nyepedori tari akwara, kori emutu, kori isipet.

²⁷ Aneni keŋ ikwaan asuwat ka anyait ka ikwaan eburonis ka akitoe ŋina ebosit.

²⁸ Nyepedori iŋes akiem aŋuna a ekaleŋeleŋet ekutari iŋes ikwa ŋamilo amoru a ŋina ka adoe.

²⁹ Ikwaan aneni keŋ ŋabiroi ka ŋamilo, ekyenar iŋes eruye a ŋisipeta.

³⁰ Eitaaka ŋakabebekwa alokwap akook keŋ ikote ŋataboka; ani kitor iŋes neni eputuk, iledari ibore daadaŋ lopite ŋolo epedorya aramet amunaar ŋikinyom.

³¹ Iguronokini iŋes ŋakipi a anam elosi tokulaut lopite ŋolo ekulaata ŋakipi anamoti, iguronokini iŋes anam lopite ŋolo igurere ekitoe inyalio.

³² Eesyanakini iŋes aneni itori ibore ŋini akwaŋan ikwa ecelit, epedori ituŋanan atamakin atemar ekwaŋ kwap anam.

³³ Emam ibore anakwap ŋini ikwaanatar iŋes, erae iŋes esubuna ŋolo emam ibore ekuryanitor.

³⁴ Ite iŋes ibore daadaŋ ŋini eyai tari kidiama nooi; erae iŋes erwosit a ibore a daadaŋ a ŋini ituro aŋuna ka adedeŋu keŋ.”