Yob 38 - Ebaibul

Toboŋok Ekapolon Yob

¹ Toboŋok nai Ekapolon Yob, kirworik etoil a Ekapolon alokuwuam a ŋolo epiripiri tema,

² Ŋae mono ŋol, ŋolo nyisileeret ŋakiro ŋuna eyeunitae akitiya erae ŋolo emamukar aosou?

³ Towo tokona itenit ikwa ekile, ekeŋisi ayoŋ iyoŋ ŋakiro, ido emaikina ikilimok ayoŋ ŋuna ekeŋisi.

⁴ “Ai iyai iyoŋ apaki ŋina asubunia ayoŋ akwap? Tolimokinae ayoŋ erae kiyakar iyoŋ ayenut.

⁵ Ŋae ewuakini alalau a akwap? Kire jik, iyeni iyoŋ a? kori ŋae epimi etyae keŋ?

⁶ Kidiama nyo iwuakinitae ŋawoeta ŋuna ka akwap? Kori ŋae adupakini amoru ŋina ka akisyakinet a akwap?

⁷ Ani eriŋa ataparacu a akoloŋit ŋina etiyaere ŋun, apotu ŋikacer ŋulu ka ataparacu toeo kaapei ka apotu ŋimalaikan daadaŋ tocelut ka alelyanu.

⁸ Kori ŋae agolokini ŋakipi ŋuna ka anam iwapei, apaki ŋina epiiyaunia anam ŋakipi anakook keŋ nakwap,

⁹ apaki ŋina arapuwarya ayoŋ anam a ŋidouwon, emuko iŋes ka akiryonut,

¹⁰ ido olimu neni emaikina anam kisalak ka ogolonok nawaetin keŋ a ŋiboro a ŋulu agogoŋok nooi,

¹¹ otema neni keŋ, ‘Iyakaun iyoŋ nege bon nyidoli iwace, nepei ne bon emaikina akimorokok a ŋakipi kon kisalakis.’

¹² “Yob, ŋinapei ikidounere iyoŋ, ilimokinit mono iyoŋ akwap kiwala akoloŋit adio a? Ilimokinit mono iyoŋ akica toyakaun neni emaikina toyakaun,

¹³ ikotere eyakaun akica nakiboisyo ka akwap daadaŋ, ido toŋopa ŋulu itiyaete aronis aŋuna ka akica a?

¹⁴ Iloconokin akwap lopite ŋolo iloconokinere ecoto ŋolo emunatae, ido kipurae ikwa elou.

¹⁵ Elemaritae akica aneni a ŋulu aronok, ebilibilaaritae ŋakan kec ŋuna etenito akiar.

¹⁶ “Ilomarit mono iyoŋ loitan ŋulu a anam, kori ilosit mono iyoŋ akieŋun alokwap aneni ecukul a?

¹⁷ Eyai ituŋanan ikidodik iyoŋ ŋipukei ŋulu elomarere nakibois a ŋikatwak a? Kori iŋolikinit iyoŋ akibois ŋina ka akiryonut cuc a?

¹⁸ Iyeni iyoŋ alakara ŋina ka akwap a? Toboŋokinoe ayoŋ erae kiyeni iyoŋ.

¹⁹ “Ai eyai erot ŋolo elosi neni iboiyo akica ka ai eyai akibois ŋina ka akiryonut,

²⁰ ikotere iyoŋ iyai akiryonut nakibois keŋ ka ikotere iyoŋ itenikinit akiryonut lorot ŋolo elosi lore keŋ?

²¹ Kire jik, iyeni iyoŋ, anerae ikidounitoe iyoŋ apaki ŋin ka elalak nooi ŋirwa ŋulu ka akiyar kon.

²² “Ilomarit mono iyoŋ neni iwuakinitae ekuno, kori iŋolikinit mono iyoŋ neni idyasitae ŋakako

²³ ŋuna eŋadat ayoŋ aŋuna ka apaki a ŋinakisicanet ka akoloŋit ŋina a ejie a?

²⁴ Nyaali erot ŋolo elosere neni eyaununeere akica, kori neni ielununor ekuwuam akwap daadaŋ alo Kide?

²⁵ “Ŋae abu kiwuak akitelosit a akalele a ŋakipi a ŋuna ka akiru; ka ŋae abu kiwuak erot ŋolo itori akimilya eriŋa nyegirokina,

²⁶ ikotere eyauni akiru nakibois ŋina emam ŋituŋa eya, naloŋisat neni emam ŋituŋa elomito,

²⁷ ido kiwuak ajokis nakwap ŋina emam ituŋanan eyai ka ŋina erae ereŋorot?

²⁸ “Eyakar akiru papa keŋ a? Kori ŋae auruuni ŋakopi?

²⁹ Nakook a ŋae aponiata ŋakako ka ŋae auruuni ekuno min kidiama?

³⁰ Idikete ŋakipi togogoŋioto kikwaanikinos ka amoru ka toruworos ŋakipi a ŋanamyo ŋakako bon alokidiama.

³¹ Ipedori iyoŋ acunakin iwapei ŋakanyer ŋuna alalak, kori alacakin etop ŋolo enyaritae Lobiler a?

³² Ipedori iyoŋ akiwuakin ŋikacer ŋulu alowae a ŋolo alo Kwap ŋulu enyaritae Akai ka Amosiŋ pena iwapei anapakio ke ekaru a? Kori ipedori iyoŋ akiten ŋitopon ŋulu alo Kuju ŋulu enyaritae Ŋiremotom, tolimok ikes neni itorete a?

³³ Iyeni iyoŋ epite ŋolo eyakatar ŋakiro ŋuna etubunitoe aŋuna alokidiama a? Ipedori iyoŋ akiwuakin ŋikisila kec ŋulu alokidiama toruwor ŋulu alokwap a?

³⁴ “Ipedori iyoŋ alimokin ŋidouwon ŋakiro ŋuna emaikina ikes kitiyata a? Ikotere ikibwaliyasi iyoŋ ŋakipi a?

³⁵ Ipedori iyoŋ alimokin ŋakimilyaeta toyakaun, ikotere toboŋut temasi neni kon, ‘Eyakae isua ne a’?

³⁶ Ŋae ainakini aosou lonerin ŋulu alotooma akuwan, kori ŋae ainakini ayenut natameta?

³⁷ Ŋae eyakar aosou ŋina epedorya akimar ŋidouwon, kori ŋae epedori abukun ŋakipi alodowon

³⁸ apaki ŋina etukonoror apuwa alokwap, ido totukonokin ŋakapoŋor?

³⁹ “Ipedori iyoŋ aarakin eŋatuny akimuj keŋ, kori ainakin itaok a eŋatuny akimuj ŋina isimwoni iŋes,

⁴⁰ apaki ŋina eperyoto ikes anaduyon kec, kori apaki ŋina eperyoto ikes idarito ibore ŋini enyamete a?

⁴¹ Ŋae itani ŋikurukwa apaki ŋina igworokinitotor ŋicwi kec Akuj, ido kirimosi ŋikurukwa aŋuna icanatar akimuj?