Yob 37 - Ebaibul

¹ “Einanakinete ŋakiro ŋun daŋ etau kaŋ amaranikin ka edoununui aneni eyai.

² Topupokisi epite ŋolo egiror akiru anapedor ka Akuj, topupokisi akikilya ŋina ebunit aneni ka Akuj.

³ Iyakununui Akuj akimilya totiyaun alokidiama, ido toyakaun agiro nakwap ameun alowae ke epei tari lowae ŋoloce.

⁴ Ani elunyar akimilyaunet, togirok nai akiru anapedor ka Akuj, egirokine ŋolo ailiilon, ido nyitojoŋoe Akuj akimilya apaki ŋina epupere agiro keŋ.

⁵ Ani elimuni Akuj ŋakiro, itiyanakin ŋakiro ŋuna ka aumokin, itiyaenene Akuj ŋakiro ŋuna nyikipedori iwon ayenun.

⁶ Epedori Akuj alimun ebe, ‘Ekuno totiyaar kwap kilim’; elimokini iŋes ŋakako todoto nakwap, ido epedori alimokin akiru ŋina alalan akilim.

⁷ Apaki ŋin, itojoŋoe iŋes ŋituŋa akitiya kiboikinos nakais, ikotere toyenut ŋituŋa daadaŋ ŋuna itiyae Akuj.

⁸ Ŋibaren daŋ tolomasi nanokin kec ka ŋityaŋ tolomasi naduyon kec.

⁹ ebuneeneekuwuam ŋolo ipiripiri ekusi aneni sek eyai ka ebuneeneakaterot alokuwuam.

¹⁰ Itililimi ekuwuam ŋolo ka Akuj ŋakipi toruworos ŋakako, ido togogoŋioto ŋakipi ananamyo kikokis asuwat.

¹¹ Ilelebyanakini Akuj ŋakipi lodouwon ŋulu aburok, kielut ŋidouwon akimilya,

¹² irimete ŋidouwon alokidiama anacamit a ŋina ka Akuj, kisiyookis ŋuna ecamit Akuj akitiya nakwap daadaŋ ŋina iboiyoto ŋisubuna keŋ.

¹³ Itiyae Akuj ŋun erae akisicanet, kori aŋuna ka akitoodikin ŋituŋa ŋuna itiyae iŋes.

¹⁴ “Okoe Yob, kiira nu, torubak ililiŋi, ido totamatama ŋuna ka aumokin ŋuna etiya Akuj.

¹⁵ Iyeni iyoŋ epite ŋolo elimunio Akuj akiciket keŋ inak akimilyaunet tocau alodowon keŋ a?

¹⁶ Iyeni iyoŋ ikwa iyooliyotor ŋidouwon alokidiama a? Iyeni iyoŋ ŋiticisyo ŋulu ka aumokin ŋulu a ŋina iyookino aosou keŋ a?

¹⁷ Okoe iyoŋ ŋolo emwaka ŋilowi pe, apaki ŋina ekutuniata ŋikuwamin alo Kwap.

¹⁸ Ipedori iyoŋ apetakin ŋidouwon kidiama lopite ŋolo itiyaa Akuj a? ipedori iyoŋ akitogogoŋ ikes ikwa eburonis ŋolo ikirouni a?

¹⁹ Kitatamae isua ŋakiro ŋuna elimokinio Akuj, nyikipedori isua atubun ŋuna elimunio, anerae emam ŋuna eyenio isua.

²⁰ Emaikina mono kiŋitae Akuj atemar acamit ayoŋ akirworikin a? Eyai mono ituŋanan ŋinapei abu totamak atemar kerae oŋopiya a?

²¹ Kiira tokona, mam ituŋanan epedori akitere akica apaki ŋina ecaya nooi alokidiama apaki ŋina ekutaritor ekuwuam ŋidouwon.

²² Ebunit Akuj alo Kuju, emilimili ikwa egolid, eyai nawaetin ka Akuj ailiil ŋina ikitubuli.

²³ Erae Akuj ŋina etiron, nyepedoryo iwon aapikin iŋes, epol apedor keŋ ka akiyookino keŋ, ido anakiyookino a ituŋanan a ŋina apolon, nyisicani Akuj iŋes.

²⁴ Aŋun, ŋituŋa kitopoloosi Akuj, nyemitakinit Akuj ituŋanan ŋini etami atemar aos iŋes.”