Yob 36 - Ebaibul

Kitopoloo Eliu ajokis ŋina ka Akuj

¹ Torubak Eliu irworo tema,

² “Kidaŋidaŋak apaki ŋina euruwuana ipupi ŋakiro kaŋ, ekesileerekini ayoŋ iyoŋ, anerae eriŋa ayoŋ ayakar ŋakiro ŋace akirwor aŋuna ka Akuj.

³ Alimuni ayoŋ aosou ace ŋina ayaunit a iwace aneni alwanan, ido etoodiuni akiyookino ŋina a akasubunan kaŋ.

⁴ Kire, meere ŋakiro kaŋ alyokonu; iyakasi iyoŋ ka Akuj ŋina iyookino aosou keŋ.

⁵ “Kire jik, erae Akuj ŋina etiron ka nyejamuwarit ituŋanan idio; erae agogoŋu keŋ ŋina ka ayenut ŋina etiron.

⁶ Nyimyekini iŋes ŋituŋa ŋulu itiyaete aronis torubakis eyarete, nai einanakini neni a ŋulu isicanitae akiyookino kec.

⁷ Nyejoŋoenene Akuj akitere ŋulu iyookino, nai ŋirwosi ŋulu ipukato, iturubakini ipukato jik, ido itopoloorete ŋituŋa ikes.

⁸ Ani nai keroci ŋituŋa ŋulu iyookino a ŋiriko, torocae a ŋaunoi erae ŋulu isicanitae,

⁹ elimokini Akuj ikes ŋuna itiyato ka ŋikisila ŋulu ebilito, elimokini Akuj ikes atemar erae ŋipitesyo kec ŋulu ka akituro.

¹⁰ Eŋaari Akuj ŋaki kec kiirasi ŋakiro ŋuna itatamyo, ido tolimok ikes atemar toboŋut anasecit.

¹¹ Ani kiirasi, ido kitiyanakis Akuj, irikakinete ikes ŋirwa ŋulu ka akiyar kec erae ŋulu eyakatar ebari, irikakinete ŋikaru ŋulu ka akiyar kec erae ŋulu elakara.

¹² Nai ani pa kiirasi, emunyaryo ikes a ekileŋ, etwakete ikes emamukatar aosou.

¹³ “Erubakinete ŋulu nyikinyomito Akuj alotai kec eyakatar aŋoit, nyigworonokinete ikes Akuj kiŋarak ikes apaki ŋina itukya Akuj ikes.

¹⁴ Etwakete ikes eriŋa esorokoka, todaun akiyar kec erae ŋina a ŋileec.

¹⁵ Elakununui Akuj ŋulu isicanitae, itiyae iŋes ŋun apaki ŋina isicanitere ikes, einakini ikes kiirasi ŋakiro apaki ŋina isicanitere.

¹⁶ Abu daŋ Akuj ikilemu iyoŋ anakiyaloloŋ kon, ikiyau nakibois ŋina aloloman ŋina ka aiwara, ido ikiinak iyoŋ akimuj ŋina alalan ka ŋina ajokan nooi;

¹⁷ “Nai ibu iyoŋ totum nooi anakimyaanakin akisican ŋulu aronok ikikamunito iyoŋ ŋakiro ŋuna pa itubio ŋakiro ka ŋuna pa iraakar ŋolo iyookino.

¹⁸ Toceite, nyikiinak anyunyura iyoŋ alomar nadakanu, ido nyicamak alalau ŋina a ŋakaluŋuluŋui ikitooliyori iyoŋ aneni ka Akuj.

¹⁹ Epedori mono akigworo kon akiŋarakin iyoŋ tokona anakiyaloloŋ, kori epedori agogoŋu kon daadaŋ a?

²⁰ Nyigat atemar kerae towar akwap, todaun ŋinituŋanan anakibois keŋ.

²¹ Totenite! Nyiboŋo akitiya aronis; anerae ikikatakin iyoŋ anakisican.

²² Kiira, itopolooritae Akuj anapedor keŋ; ŋae erae eketataman keŋ?

²³ Ŋae itamanakini iŋes ŋuna emaikina kiwuap, kori ŋae epedori alimun ebe, ‘Itiya iyoŋ ŋuna nyiyookino’?

²⁴ Totamunite akitopoloorit ŋiticisyo ŋulu ka Akuj ŋiticisyo ŋulu adaut ŋituŋa akipuro eosi.

²⁵ Eŋolikis ŋituŋa daadaŋ ŋiticisyo ŋulu etiya Akuj, eŋolikis ŋituŋa daadaŋ ŋiticisyo ŋul aneni alwanan.

²⁶ Kire jik, erae Akuj ŋina epol nooi, ido nyikiyeni iwon iŋes, emam ŋini epedori akimarun ŋikaru ŋulu ka Akuj.

²⁷ Akuj iŋes ikyaanari ŋakipi kidiama, iŋes ecunanakini ŋakipi, ido toli kituruwo ŋakilimes a akiru

²⁸ ŋuna edounete alokidiama, ido kilima neni a ŋituŋa erae akiru ŋina alalan nooi.

²⁹ Eyai mono ituŋanan eyeni epite ŋolo epetarotor ŋidouwon ka epite ŋolo egirotor ŋidouwon ŋulu epetakinit Akuj a?

³⁰ Kiira, inwakuni akimilyaunet akibois daadaŋ ŋina eyai iŋes, ido torapuwa ŋanamyo toyakaun akiryonut nen.

³¹ Epite ŋol iŋes iyokiyo Akuj ŋituŋa, einanakini Akuj ikes akimuj ŋina alalan.

³² Ecunanakini iŋes akimilya nakan keŋ, ido kiyoo neni ecamit iŋes amunaar.

³³ Irworo akireta a agirokinet aŋuna ka Akuj; itoodiunito ŋun atemar elilit Akuj eremokino asecit.