Yob 35 - Ebaibul

Kitoronia Eliu akituruworo bon ŋini iyookino

¹ Torubak Eliu irworo tema,

² “Yob itami iyoŋ atemar iyookino ŋuna irworo iyoŋ a? Ibala iyoŋ, ‘Eyookino ayoŋ alokiŋaren Akuj.’

³ Ani kiŋita iyoŋ bon ebe, ‘Inyoni aryamuni ayoŋ? Kerae alipite ajokia ayoŋ kasecit, kori pa kasecit?’

⁴ Akaboŋokini ayoŋ iyoŋ, iyoŋ kaapei ka ŋikonei kon.

⁵ Kireo kidiama, ido totamatama ŋuna a ŋisubuna a ŋulu ite iyoŋ kiŋolik epite ŋolo eyakatar ŋidouwon ŋulu eyakasi kidiama kon.

⁶ Ani kisecit iyoŋ, alipite isiyookinitor iyoŋ aremokino Akuj? Ani kitalalae iyoŋ abilibil ŋikisila, itoodiunit nen atemar isicanit iyoŋ Akuj a?

⁷ Ani kirae iyoŋ ŋolo iyookino, nyo iinanakini iyoŋ Akuj? Kori nyo eryamununui Akuj aneni kon?

⁸ Iteryamunit aronis kon ŋituŋa ŋuluce ŋican lopite ŋolo iryamunitor iyoŋ ka iteryamuni akiyookino kon ŋituŋa ŋuluce akitiya ŋuna iyookino.

⁹ “Aŋuna etalalata ŋituŋa akisicanit ŋuluce, iŋitasi ikes akiŋarakino toiunere ikes anapedor a ŋikadedeŋak.

¹⁰ Nai mam ŋini ebala, ‘Ai mono eyai Akuj akasuban kaŋ, Akuj ŋina ikiinanakini agogoŋu nakwaare,

¹¹ Akuj ŋina itatami ŋituŋa akilo ŋityaŋ, ŋina eturuwo ŋituŋa ŋulu eosok akilo ŋikyeny?’

¹² Igworokinete ŋituŋa Akuj, nai nyeboŋonokini Akuj akigworo kec, erae ŋun aŋuna ka akituro a ŋituŋa a ŋulu itiyaete aronis.

¹³ Kire, nyiiranari Akuj akigworo ŋina emam apolou, mam tari nyemitakini Akuj ŋina etiron tari akiirar akigworo ŋin.

¹⁴ Etya nai ai Yob epite ŋolo nyiirarya Akuj ŋakiro kon erae kirworo iyoŋ ebe, ‘Nyete ayoŋ Akuj, eyakasi ŋakiro kaŋ kiŋaren keŋ ka edarit ayoŋ iŋes eketuruwo ayoŋ ŋolo eyookino.’

¹⁵ Ibala daŋ iyoŋ ebe, ‘Nyisicani Akuj ŋituŋa anaŋoit keŋ, ka nyemisit iŋes nooi ŋakiro ŋuna ebilibiliyata ŋituŋa ŋikisila.’

¹⁶ Irworo iyoŋ Yob ŋakiro ŋuna erae koŋin, italalat iyoŋ ŋakiro ŋuna nyerae ŋuna ka aosou.”