Yob 31 - Ebaibul

¹ “Adau ayoŋ akikoŋ atemar nyeŋolikini idiobore okonira, alipite nai apedorya ayoŋ akiŋolikin apese ŋina nyiryamakina ke ekile?

² Aliropit nai aryamuni ayoŋ aneni ka Akuj a ŋina alokidiama? Anibore eruwor ŋini kaŋ aneni ka Akuj a ŋina etiron a ŋina iboi alokidiama?

³ Nyeryamununeete mono ŋituŋa ŋulu nyiyookino ŋican a? Nyeryamununeete mono ŋituŋa ŋulu itiyaete aronis akisicanio a?

⁴ Nyite mono Akuj ŋakiro daadaŋ ŋuna etiyae ayoŋ a? Nyimarit mono Akuj ŋikilames kaŋ daadaŋ a?

⁵ “Ani kalosit anakiyar a na pa eyookino, ani keburuburakinit ayoŋ akitiya ŋuna ka amodiyo.

⁶ Emaikina Akuj okotubok ayoŋ a ŋakiro kaŋ iyookinit ka emaikina Akuj toyenu atemar emam ŋuna eketoroniyaritere ayoŋ.

⁷ “Ani kaoliyorit ayoŋ alorot a ŋolo iyookino ka kewuapit ayoŋ alotau kaŋ ŋuna eŋolikini, ido kidoŋit emacar ka aronis a ŋina etiyat ayoŋ nakan kaŋ;

⁸ emaikina nai ayoŋ oek ŋikinyom, ido tolem ice tonyam; emaikina ibore ŋini erupuni aŋuna kaŋ torutoroe.

⁹ “Ani kilopiyarit aberu etau kaŋ ka ani kadapit ayoŋ aberu a ekidunyet kaŋ alokek keŋ acamit akirat,

¹⁰ emaikina aberu kaŋ toruwor akeryen a ituŋanan a ice ka emaikina ŋikilyok ŋice toloma iŋes.

¹¹ Ani kerae etiyate ayoŋ ŋun, kerae adyakaret ŋina aaran, kerae adyakaret ŋina ikisicanere alotooma ŋikisila;

¹² Kikwaanikin ŋun ka akim ŋina ikinomiyari toloma nakibois a ŋikatwak kikwaanikin ŋun ka akim ŋina enyamuwari ibore kaŋ daadaŋ.

¹³ Ani kaŋerit ayoŋ adyekitoi a ŋipi kaŋ, kori a ŋapi kaŋ apaki ŋina aponiata yaut neni kaŋ ŋakiro ŋuna etakadakinitor ayoŋ ikes.

¹⁴ Anu nai etiyae ayoŋ apaki ŋina akanyunyurikinor ayoŋ Akuj? Anu aboŋokini ayoŋ apaki ŋina iŋitar Akuj ŋakiro?

¹⁵ Meere Akuj ŋina akasubuni ayoŋ anakook iŋes pei asubuni ŋiketiyak ka ŋaketiyak kaŋ daŋ a? Meere mono Akuj apei ikiyeuni isua anakookyes a?

¹⁶ “Ani kemikit ayoŋ ŋikulyak ibore ŋini eitanito, kori kesigworit apuserut,

¹⁷ kori kanyamit akimuj kaŋ bon, pa kimujito ŋikokyok akimuj kaŋ adyekarit ayoŋ;

¹⁸ (anerae ŋinapei anasoroko kaŋ abu ayoŋ etan ŋikokyok ikwa papa ikitani, ŋinapei eriŋa ayoŋ adit, eŋarakinit ayoŋ ŋapuseru.)

¹⁹ ani kemyekinit ayoŋ idiotuŋanan etwani aŋuna amamukatar ŋilowi, kori ituŋanan ŋini a ŋican ŋini amamukar ibore ŋini imukoror,

²⁰ ituŋanan ŋini pa abu okogat ayoŋ ŋuna ajokak, ani kemyekinit ayoŋ ituŋanan ŋimukoro a ŋilowi a ŋulu itiyaunitae a ŋajul a ŋamesekin kaŋ;

²¹ ani kesicanit ayoŋ ikoki, anerae ayeni atemar eyakasi loikiiko ŋulu ikiriit ka ayoŋ;

²² emaikina eseket kaŋ nenidapal tolemar aloseket kaŋ ka emaikina akan kaŋ tobilar anakiryamet ka eseket.

²³ Nai etopoloorit ayoŋ ayeni atemar ketiya ŋun ekesicani Akuj ayoŋ; ido pa kapedorit ayoŋ akitijiore ailiil keŋ.

²⁴ “Ani kewuakinit ayoŋ akigeno kaŋ logolid, kori kanyarit egolid ŋolo elitae ejok ibore ŋini ekinyomit ayoŋ,

²⁵ ani kalelyakinit ayoŋ aŋuna a ebari kaŋ a ŋolo alalan, kori aŋuna abunio oryamunia ebari ŋolo alalan,

²⁶ Ani keŋolikinit ayoŋ akoloŋ ecai, kori elap iyosi eyakar akibuses

²⁷ ido ewuak etau kaŋ losubuna ŋul erae ŋulu ekeuryarito ayoŋ ka ani kakutakinit ayoŋ ŋakan kaŋ etopoloorit ikes,

²⁸ erae ŋun daŋ asecit ŋina emaikina ŋikatubok ekesicaniata ayoŋ, anerae itoodiunito ŋun atemar abu ayoŋ oŋer Akuj ŋina eyai kidiama.

²⁹ “Nyelelyana ayoŋ aŋuna ka akinyasuno a ŋituŋa a ŋulu akaremokino ayoŋ, kori nyelakara ayoŋ aŋuna abunio aronis todoik ikes.

³⁰ (Nyecamakina ayoŋ akituk kaŋ elimuni ŋuna ka asecit alotooma akicen ikes tomunyaros)

³¹ Irworosi ŋituŋa a ekal kaŋ ebe, ‘Ŋae mono pa emujit akimuj a Yob kimwono?’

³² Nyimyekina ayoŋ igelaanot eperi lorot a etaun ejaununui ayoŋ ŋikalotok kai kaŋ.

³³ Nyimunono ayoŋ asecit kaŋ lopite ŋolo itiyaata ŋituŋa ŋuluce, nyiwua ayoŋ asecit kaŋ alotau kaŋ,

³⁴ anerae akerit ayoŋ atemar nyekerworotor ŋituŋa ka abu ayoŋ okerite atemar nyakajamuwasi ŋituŋa kaŋ; aŋun, abu ayoŋ eliliŋ otakin cek, ido abu nyaloma kiŋa akai kaŋ.

³⁵ “Okoe, kerae ca oyakar ayoŋ ipei ŋini iirari ŋakiro kaŋ! (Erae nu ŋakiro ŋuna alimu ayoŋ etogogoŋit, emaikina Akuj ŋina etiron okoboŋok ayoŋ.) Okoe kerae ca kigiritetei ŋakiro ŋuna ekesiitakinitor ayoŋ emoit kaŋ.

³⁶ kire jik, kanap ayoŋ ŋakiro ŋun aloseket kaŋ; kewuaak ayoŋ nakou kaŋ onap esibit ebokot;

³⁷ keteyenik ayoŋ ŋini iirari ŋakiro kaŋ daadaŋ ŋuna ka akiyar kaŋ, kawo ayoŋ aloŋaren keŋ ikwa ekarikon.

³⁸ “Ani kademarit ayoŋ ituŋanan amana ŋina etae ayoŋ, ani kademunit ayoŋ amana ŋin aneni a ŋikulepek.

³⁹ Ani kanyamit ayoŋ ŋikinyom a amana a ŋin pa atacit; emyek ŋikulepek toar akoro;

⁴⁰ emaikina toruput ŋikukwa alomanikor a ŋin akilo ŋaganoi, emaikina toruput ŋinya alomanikor a ŋol akilo ŋikinyom ŋulu ikwaan ka erau.” Adaun ŋakiro a Yob.