Yob 30 - Ebaibul

¹ “Nai tokona, akakyanatar ayoŋ ŋikilyok ŋulu edisyak, ŋulu nyerae anyamet kaŋ. Arae atapapa kec ŋicaryo pa apedorito tari akiyok ŋamesekin kaŋ kaapei ka ŋiŋwokwo kaŋ.

² Arae akainyo kaŋ agogoŋu ŋina a ŋakan kec? Adaun agogoŋu kec daadaŋ.

³ Anayakau nakiitanit ka nakoro, apotu ŋituŋa ŋul toboka ŋataagor analoŋisat tonyama.

⁴ Apotu torutununut ŋikito a ariet ka ŋakwii tonyama erae akimuj. Apotu ikes tonyama tari ŋataagor a ŋikito ŋuna apyanak

⁵ Aponi ikes kiritarae alotuŋa a ŋuluce, apotu ŋituŋa kiyayata ikes esibit erae ŋikokolak.

⁶ Apotu ikes toruwor ŋulu aperete nacuuro ka nayona, apotu ikes toruwor ŋulu eboiyete anaduyon ka anatabab.

⁷ Apotu ikes toumeno anamoni; apotu ikes tocunanakin iwapei eperete alokwap ŋikito ŋulu cicik.

⁸ Arae ikes ŋijamaanotin, ŋituŋa ŋulu pa ayenio ŋirorwa kec, apotu ŋituŋa kiritasi ikes nariet.

⁹ “Tokona, akaeotor ayoŋ ŋituŋa ŋul akakyenatar; aruwor ayoŋ ŋolo ekerworotor ikes.

¹⁰ Akajamuwarito ikes ayoŋ, nyecamito arukit ka ayoŋ; nyitimenene ikes akimwaanar ayoŋ ekeŋolikinete.

¹¹ Aŋuna alemarya Akuj agogoŋu kaŋ ka aŋuna adaunia akisican ayoŋ, itiyaete ikes neni kaŋ ŋuna ecamito.

¹² Esutunit aruruma a ŋituŋa na akitijikin ayoŋ, akalosikinito ikes ayoŋ ecamito akiar.

¹³ Agolokin ikes lorotin kaŋ, itopoloorito ikes akiteryamun ayoŋ ŋican; mam ituŋanan iretakini ikes nyitiyata ŋun.

¹⁴ Eelun ikes aneni esibit itorunito neni eorori nooi; akaemakin ikes ayoŋ emotuno nooi.

¹⁵ Akabul ayoŋ nooi, alemasi ikes apolou ŋina sek ayakar ayoŋ, aŋopiya ebari kaŋ lopite ŋolo eŋopiyarya edou.

¹⁶ “Emam tokona ayoŋ acamit ŋina ka akiyar; eketinaasi ayoŋ ŋican ŋulu a ŋirwa a lu.

¹⁷ Akaryebete ayoŋ ŋakoyo kaŋ nakwaare, erubakinit aryeba ŋina eketeryamunit ŋican eyai neni kaŋ akuwar kya.

¹⁸ Akatiŋ ayoŋ aryeba amunaiya amuny akuwan kaŋ, ekepitakin aryeba ayoŋ ikwa esatiŋolo edidiŋ alodokole.

¹⁹ Akacakaki iŋes ayoŋ locoto, ekesikwaanik iŋes ayoŋ ka ŋalup ta ekuron.

²⁰ Egworo ayoŋ neni kon Akuj, ido emam iyoŋ aboŋokin akigworo kaŋ, awoi ayoŋ alokiŋaren kon, ido ikite iyoŋ ayoŋ pa icamit akiŋarakin.

²¹ Akuj, ikitiŋ iyoŋ ayoŋ ikiryenyanikinit, ikisican iyoŋ ayoŋ ka apedor kon a ŋina agogoŋon.

²² Ikipyeta iyoŋ ayoŋ, ikimyek ayoŋ ekewoki ekuwuam, ekebelukwaete ŋican ayoŋ lopite ŋolo ibelukwaa ekuwuam ŋolo agogoŋon ibore.

²³ Ayeni ayoŋ atemar ikiyait iyoŋ ayoŋ natwanare, neni eloseneneete ŋituŋa ŋulu tokona eyarete daadaŋ.

²⁴ Kire, emam ituŋanan eremokino ŋulu eyakatar akiitanit, ani apaki ŋina eyakatar ikes locan, ikalounete aŋuna ka akiŋarakino.

²⁵ Pa mono abu ayoŋ egwor aŋuna a ŋulu apotu toyakaun locan a? pa mono abu ayoŋ eyaloloŋ alotau kaŋ aŋuna a ŋikulyak a?

²⁶ Nai ani apaki ŋina ewarya ayoŋ ŋuna ajokak, abu aronis bu; ani edaruni ayoŋ alakara bu neni kaŋ, apotu ŋican potu neni kaŋ.

²⁷ “Iŋodyasi ŋinerin kaŋ ŋulu alotooma kaŋ, emam nyinapanakin kililiŋa cek; ekesiryamito ayoŋ ŋirwa ŋulu a ŋican.

²⁸ Erimit ayoŋ pa ayeni ŋuna itiyakin neni kaŋ, ido emam ŋini ekesirworiuni, ani awoi ayoŋ aneni ecunanakin ŋituŋa, egoronokini ikes ekegarakis ayoŋ.

²⁹ Aruwor ayoŋ lokaato a ŋikweei ka erukitos a ŋikaleeso.

³⁰ Eryoniar amuny a akuwan kaŋ, edalaciyanar bon, emwakununeete ŋakoyo kaŋ pe.

³¹ Aruwor agita kaŋ ŋina aeor ŋieosyo ŋulu egworor, aruwor apilu kaŋ ŋina erwo lopite ŋolo ekusere igworoi.