Yob 29 - Ebaibul

Kirikak Yob ŋakiro ŋuna etepegia ŋikonei keŋ

¹ Togeik nabo Yob erwor tema,

² “Okoe kerae ca oyakaununor ayoŋ akiyar ŋina a ŋirwa a ŋulukoloŋ, ŋina ikoni ŋina a ŋirwa a ŋulu ekeyokiyo Akuj ayoŋ;

³ apaki ŋina eketerereŋitor ayoŋ Akuj, apaki ŋina alosyo ayoŋ eketoodikinit iŋes ayoŋ neni etori anakiryonut;

⁴ apaki ŋina ayenunia ayoŋ ŋuna emaikina etiya, apaki ŋina ayakar akoneo ka Akuj lotuŋa a ekal kaŋ.

⁵ Apaki ŋin, ikirukit ayoŋ ka Akuj ŋina etiron, ido ekerimokinito ayoŋ ŋidwe kaŋ ikiboi kaapei,

⁶ Apaki ŋin, abarit ayoŋ nooi, eleilei ŋakile ŋuna alalak ŋuna a ŋakinei ka ŋuna a ŋaatuk kaŋ; acuununui ayoŋ akimyet ŋina a ŋikito ka Olipa ŋina alalan anataaba.

⁷ Apaki ŋin, alosenene ayoŋ lokokwa a ŋikasikou ŋolo eboiyonokin lopuke ŋolo ke etaun, ido ayakar ayoŋ akibois kaŋ ŋina eboiyonokin analapatu a ŋina ke etaun.

⁸ Akatyeanakinete ayoŋ ŋisorok adoluni nakibois ŋin ka anyoununeete ŋikasikou abuni ayoŋ nen, towua eketopoloorito ayoŋ.

⁹ Ajoŋoeneneete ŋikapolok a apukan akirworo abuni ayoŋ nen, ido totakinos cek,

¹⁰ tari ŋirwosi, ataanakin cek ayai ayoŋ nen, pa erworyanakini ituŋanan idio.

¹¹ “Ŋituŋa daadaŋ ŋulu iirarete ŋakiro kaŋ, aminasi atemar ejokak ŋakiro kaŋ, ŋituŋa daadaŋ ŋulu ekeŋolikinete ayoŋ, alakanar aŋuna kaŋ;

¹² anerae eŋaranakini ayoŋ ŋulu a ŋican ŋulu ekegworonokinete ayoŋ, eŋaranakini ayoŋ ŋikokyok ŋulu amam ituŋanan apedori akiŋarakin.

¹³ Ŋituŋa daadaŋ ŋulu a ŋipapan, apotu okogatakis ayoŋ ŋarereŋisyo, ido abu ayoŋ oinak ŋapuseru alelyan alotai kec eosi.

¹⁴ Abu ayoŋ etiya ŋuna iyookino neni a ŋituŋa ka arae ŋun ŋuna apolok aneni kaŋ lopite ŋolo inapitor elou, abu akiyookino kaŋ kikwaanikin ka anapit ekaaso ka akopiya, ŋinapen ŋulu ka apolou.

¹⁵ Abu ayoŋ oruwor ŋakonyen aneni a ŋimudukanotin ka abu oruwor ŋakejen aneni a ŋikaŋwalak.

¹⁶ Abu ayoŋ oruwor papa a ŋulu ayakatar akiitanit, awuanakini ayoŋ ŋituŋa ŋulugelae aloikiikoe.

¹⁷ Eloununu ayoŋ agogoŋu a ŋulu pa eyookino oiu anakan kec ŋituŋa ŋulu acamito ikes akisican.

¹⁸ “Abu ayoŋ olimu alotau kaŋ otema, ‘Atwani ayoŋ arae ŋolo eketopolooritae ekaku a ŋirwa a ŋulu alalak nooi.’

¹⁹ Ayari ayoŋ apaki ŋin asibit ekitoe ŋolo edupakinitae diyete akalele a ŋakipi ŋolo itapalalete ŋakopi ŋaten keŋ nakwaare.

²⁰ Arae apolou kaŋ ŋina akitetyana aneni kaŋ a ŋinapaki ka atenito ŋikaleŋeleŋe anakan kaŋ a ŋinapaki.

²¹ “Apupete ŋituŋa ŋakiro ŋuna alimuni ayoŋ apuponokinete ililiŋete cek ŋakiro ŋuna alimokini ayoŋ ikes,

²² pa apeganakinete ŋituŋa ŋakiro kaŋ kadau ayoŋ akirwor, eiranarete ikes ŋakiro kaŋ erae ŋuna ajokak nooi,

²³ ekedareneneete ŋituŋa ayoŋ lopite ŋolo idaritere akiru; apotu ikes toŋaama iburit alimun ŋakiro lopite ŋolo iburitotor akwap ŋakipi iceere.

²⁴ Amina ayoŋ amaisyan aneni kec apaki ŋina nyekekinyomitotor ikes ayoŋ abu ayoŋ etogogoŋ ikes aŋuna a ereet kaŋ a ŋolo ayai amaisyan.

²⁵ Abu ayoŋ oseu akiwuap ŋuna kec ka abu eboi aneni kec arae erwosit, abu eboi asibit erwosit aneni a ŋasigarya keŋ, abu eboi asibit ituŋanan ŋini isirworiunui ŋulu igworosi.