Yob 28 - Ebaibul

Neni eryamunere aosou

¹ “Kire eyai neni ebokununeere esilipa ka eyai neni eliununuyere egolid.

² Ebokununuyo ŋasuwa alokwap ka eliununuyo ŋasuwa ŋuna nyaŋayek anamoru a ŋuna inyalal ka ŋasuwa.

³ Ani elomarete ŋulu ebokete ŋasuwa ŋun tooma napanya ŋuna ebokyata ikes ŋasuwa etiŋito ikes ŋitaae ŋulukinwaket akwap, ebokete ikes akwap todoiyosi tooma jik, ikotere ebokunete ŋamoru ŋuna inyalal ka ŋasuwa alotooma akiryonut;

⁴ Ebokete ikes ŋapanya ŋuna aoyak alotooma ŋalup, aneni emam ituŋanan iboiyo; emam ŋikalotok alorotin eyenete atemar eya ikes tooma ŋalup, iyooliyonor ikes nen a ŋaunoi a ŋuna inenotor ebokete ŋamoru, irimito a nen aneni elwana alotuŋa.

⁵ Erupununeete ŋikinyom alokidiama ŋalup, nai alotooma ŋalup ŋunapei ŋun, enomi akim ibore daadaŋ kinyalak.

⁶ Namoru ŋuna pei eya kwap iŋes eryamunere ŋuna enyaritae Sapire ka nalup ŋuna eya kwap iŋes eryamunere egolid.

⁷ “Nyeyenete ŋikyeny ŋulu anyamak ibore erot ŋolo elosere neni ebokere ŋasuwa, nyepedori tari atarukot akiŋolikin erot ŋol.

⁸ Nyemeanakinete ŋityaŋ ŋulu adedeŋak erot ŋol, eŋatuny daŋ nyemekina erot ŋol.

⁹ “Ebwaŋabwaŋaete a ŋakan kec ŋikabokak ŋul ŋamoru ŋuna agogoŋok, ielielaanarete ikes ŋimoru ameun alokwap tari kidiama.

¹⁰ Iwuanakinete ikes ŋakitelesyo ŋuna emeto natabab; etenito ikes akiŋolikin ibore ŋini epol egyelit.

¹¹ Eryamununeete ikes neni egeununiata ŋaŋololin alel, isileereununeete ikes ŋiboro ŋulu sek nyiteo.

¹² “Nai, ai mono eryamunere aosou? Ai mono eyai akibois ŋina eyenunere ŋakiro?

¹³ Nyeyenete ŋituŋa erot ŋolo elosi neni eyai aosou, nyepedoryo aryamun aosou anakwap a na a ŋina eya ŋituŋa.

¹⁴ Ebala akibois ŋina alokwap ŋakipi, ‘Emam aosou aneni kaŋ,’ ebala anam, ‘Nyikirukit ayoŋ ka aosou.’

¹⁵ Nyepedoryo agyelun aosou a egolid, nyepedoryo akipimun esilipa aŋuna ka agyelunia aosou,

¹⁶ Nyepedoryo akitiriyan aosou ka egolid ŋolo ka Opir, kori akitiriyan ka ŋamoru ŋuna epol egyelit ŋuna enyaritae Oniks kori Sapire.

¹⁷ Nyeriyanikin aosou ka egolid, kori ŋamoru ŋuna itiyaununeere agilas, nyepedoryo akilokony aosou a ŋinapen a ŋulu itiyaunitae a egolid a ŋolo ajokan nooi.

¹⁸ Nyepedoryo akisikwaan aosou ka ŋamoru ŋuna elemyo alokwap anam, kori ŋamoru ŋuna aliiliwak ŋuna enyaritae Kristal, anerae epol nooi egyelit ka aosou akilo tari ŋinapito ŋulu epol egyelit.

¹⁹ Nyeriyanikin aosou ka amoru ŋina ka Esiopia ŋina epol egyelit ŋina enyaritae Karisolite, kori nyepedoryo akitiriyan aosou ka egolid ŋolo eliitae ejok.

²⁰ “Ai nai ebunitor aosou? Ai mono eyai akibois ŋina eyenunere ŋakiro?

²¹ Iwuaitae aosou nyiŋolikis ŋulu eyarete daadaŋ, iwuaitae nyiŋolikis tari ŋikyeny ŋulu epiiryaka eyakasi kidiama.

²² Irworosi ŋulu eyakasi nakibois ŋina ka akinyasuno ka ŋina a ŋikatwak ebe, ‘Adaun isua akiirar ŋuna ka aosou a ŋaki kosi.’

²³ “Akuj bon eyeni erot ŋolo eteni naosou, eyeni iŋes akibois ŋina ka aosou;

²⁴ anerae ite Akuj ŋiwaetin ŋulu ka akwap daadaŋ, ite iŋes ibore daadaŋ ŋini eyai kwap kidiama.

²⁵ Ani ŋina atubunio Akuj ainakin ekuwuam agogoŋu keŋ ŋina ekusya ka ŋina ewuakinia etyae a ŋakipi lodouwon,

²⁶ ŋina atubunio Akuj neni emaikina akiru kilim ka erot ŋolo emaikina kiwuap akiru ŋina alalan ŋina etepi tokusi;

²⁷ apaki ŋin nai, iŋes eŋolikinia Akuj ajokis ŋina ka aosou; abu yau aosou toyakaun ka abu kikatak ajokis ŋina ka aosou, ido kimyek toyakaun.

²⁸ Tema nai Akuj neni a ŋituŋa, ‘Kire jik, akitopoloorit Ekapolon, iŋes erae aosou; akimyekin akitiya aronis, iŋes erae ayenun ŋakiro.’ ”