Yob 27 - Ebaibul

Torubak Yob eyakar akiyookino keŋ

¹ Kiyatak Yob erwor keŋ tema,

² “Ikwapei eyarya Akuj, ŋina alema akiyookino ŋina emaikina eyai neni kaŋ, ikwapei eyarya Akuj ŋina etiron, ŋina akainaki ayoŋ akiyaloloŋ anakiyar kaŋ,

³ ani ca keriŋa ayoŋ ayari eeŋa, keriŋa ekieŋanu ka Akuj itorunit lokumes kaŋ,

⁴ nyalimuni ayoŋ anakituk kaŋ alyokonu ka mam amodiyo alimuni ayoŋ a aŋajep kaŋ.

⁵ Nyikiryama ca jik ayoŋ ka alimun atemar irworosi iyes ŋuna iyookino; nyaŋeri ayoŋ ŋuna ka akiyookino kaŋ tari natwanare kaŋ.

⁶ Arubakini ayoŋ emiidikina nakiyookino kaŋ, nyemyekini jik ayoŋ akiyookino kaŋ elosi aneni kaŋ; emam ŋakiro anakiyar kaŋ ŋuna itakadakinito etau kaŋ.

⁷ “Elipi kikwaanikin ŋimoe kaŋ ka ŋikaronok, elipi kikwaanikin ŋulu akaremokino ayoŋ ka ŋulu nyiyookino;

⁸ anerae nyo erae akigeno a ŋulu nyiwuapito ŋuna ka Akuj apaki ŋina elemarya Akuj ikes, apaki ŋina elemarya Akuj akiyar kec?

⁹ Iirari mono Akuj akigworo kec apaki ŋina edolokinioto ŋican ikes a?

¹⁰ Eryamunete mono ikes alakara aneni ka Akuj a ŋina etiron a? Epedorete mono ikes anyarare Akuj ŋapakio daadaŋ a?

¹¹ Acamit ayoŋ akitatam iyes ŋakiro ŋuna ka apedor ka Akuj, atemar ŋuna eyakar Akuj, nyeliliŋiyari ayoŋ.

¹² Iŋolikis iyes daadaŋ ŋakiro ŋun; kaanukiro nai iruworotor iyes daadaŋ ŋulu irworosi ŋakiro ŋuna emam apolou?

¹³ “Erae nu ŋuna eryamunete ŋikaronok aneni ka Akuj, erae nu ŋuna eryamunete aneni ka Akuj a ŋina etiron ŋulu isicanito ŋuluce.

¹⁴ Ani kepitut ŋidwe kec, epitunito aŋuna ka aaro a ekileŋ; emamukaunotor ŋiletok kec akimuj ŋina itemokino ikes imujete.

¹⁵ Eari edeke ŋipiya kec, nyiololoete ŋapuseru kec aŋuna ka atwanare kec.

¹⁶ Tari kidyasete ŋikaronok esilipa ŋolo etya apuwa ka kidyasete ŋilowi ŋulu etya ŋalup,

¹⁷ epedorete ikes akidyat, nai ŋulu iyookino enapete ŋilowi ŋul ka ekorarete ŋulu itiyaete ŋuna iyookino esilipa ŋol.

¹⁸ Edukete ŋikaronok ŋakais ŋuna caryo ŋuna ikwaan ka enyaa ŋolo ka asimokok, kori etogo koŋin ŋolo iboiyo eketen emanikor a epiini.

¹⁹ Eloseneneete ikes akiper eyakatar ebari, nai ani ekyenyunete ikes toryamut ebari daadaŋ kelemar.

²⁰ Ikamununui ekabule ikes lopite ŋolo iyesunor akalele, ani nakwaare kitoŋopiyasi ŋiryenyaanotin ŋikaronok daadaŋ.

²¹ Ilepuni alokwap ekuwuam ŋolo ekutuni alo Kide ŋikaronok, kiwok kitoŋopiya; iwokori ekuwuam ŋol ikes anakiboisyo kec.

²² Eremun ekuwuam ŋol neni kec emam akimyekin; eemete ikes anagogoŋu a ekuwuam a ŋol eŋirikinito nooi akerit.

²³ Eremun ekuwuam ŋol neni kec ecela ikwa ituŋanan ŋini iyayat ŋulu aronok, ijukari ekuwuam ŋol ikes anakiboisyo kec ecela nooi erwo ikwa ekapiriicit.