Yob 23 - Ebaibul

Aboŋokinet a Yob: Eŋuruŋura ayoŋ nooi

¹ Toboŋok nai Yob tema,

² “Akoloŋit na daŋ, eriŋa ayoŋ eŋuruŋura, anerae eriŋa Akuj ekesigwori ayoŋ nooi alocan kaŋ.

³ Okoe kerae ca oyeni neni aryamunia iŋes ka epite ŋolo adolio neni iboiyo iŋes,

⁴ kalimok ayoŋ iŋes ŋakiro ŋuna alimunitor ayoŋ atemar nyiyookino ŋuna itiyae iŋes kelelebu ayoŋ anakituk kaŋ ŋakiro ŋuna etepegitor iŋes.

⁵ Nabo daŋ, kayenu ayoŋ ŋuna akaboŋokini iŋes ayoŋ, kapedo ayoŋ akiwuap ŋuna akalimokini iŋes ayoŋ.

⁶ Epedori mono iŋes anapedor keŋ a ŋina apolon nooi ebura ka ayoŋ a? Mam, nai amaikina ca iŋes topupok ŋakiro kaŋ.

⁷ Kerae opedori ayoŋ alosit neni eyai Akuj, kiira iŋes ŋakiro kaŋ, anerae mam ŋuna aronok etiyat ayoŋ, ido karuwor ayoŋ ekelounan ŋakiro a ŋican kaŋ ŋikaru ka ŋikaru aneni a ekatubon ŋakiro kaŋ.

⁸ “Ani kalot ayoŋ tari lowae ŋolo elomununuya akoloŋ, emam Akuj aina, kori ani kaboŋo ayoŋ lowae ŋolo edoiyonori akoloŋ, nyaryamuni ayoŋ Akuj;

⁹ ani kalot ayoŋ lowae ŋolo alo Kuju, nyaryamuni ayoŋ Akuj; ani kaboŋo lowae ŋolo alo Kwap, nyeŋolikini ayoŋ Akuj ayai nen.

¹⁰ Nai eyeni iŋes neni alosi ayoŋ, ani kekekatak iŋes ayoŋ, eryamuni iŋes atemar aliuna ayoŋ ikwa egolid ŋolo eliitae;

¹¹ ewuapit ayoŋ erot ŋolo ekedodikini iŋes ayoŋ; arubak ayoŋ ewuapit ŋuna keŋ, nyeŋero ayoŋ ŋakiro keŋ.

¹² Nyimyekina ayoŋ akiwuapit ŋuna ekecikit iŋes ayoŋ akiwuap, ericakinit ayoŋ alelakinit nooi ŋakiro ŋuna abu iŋes okolimok ayoŋ.

¹³ Nai adau iŋes atubun ŋuna itiyakini, ŋae nai epedori akiretakin iŋes? Ŋuna alimu iŋes atemar etiyakini, itiyakini.

¹⁴ Isiyookini iŋes ŋuna adau ayeun aŋuna kaŋ, eyakar iŋes ŋayeununiyeta ŋuna alalak ŋuna ikote ŋun.

¹⁵ Aŋun, akabulit ayoŋ nooi akiŋolikin iŋes; ani atamuni ayoŋ ŋun, emaranikini akuwan kaŋ daadaŋ aŋuna ka Akuj.

¹⁶ Adau Akuj akitililimiyor etau kaŋ; eketubul ayoŋ Akuj ŋina etiron,

¹⁷ kerae ca opedori ayoŋ aŋopiyar anakiryonut, kerae topedori akiryonut ŋinakiryonon cuc arapuwar ayoŋ!