Yob 22 - Ebaibul

Erwor ka Elipas: Epol nooi aronis a Yob

¹ Kirworik nai nabo Elipas Etemanait tema,

² “Yob, itami iyoŋ atemar epedori ituŋanan aruwor ŋini ejok aneni ka Akuj a? Epedori tari ŋini eos nooi ainakin Akuj idiobore a?

³ Eyai mono ibore italakarit Akuj erae kirae iyoŋ ituŋanan ŋini iyookino a? Kori nyo eryamuni Akuj aneni kon erae kiboi iyoŋ irae ituŋanan ŋini emam ŋuna ikitoroniyaritere?

⁴ Itami iyoŋ atemar ikisicanit iyoŋ Akuj aŋuna ka akiyookino ka ikitubokinit iŋes iyoŋ aŋuna ka akiyookino kon a?

⁵ Mam jik! Ikisicani iyoŋ Akuj, anerae elalak ŋasecisya kon nooi ka emam akisalet a ŋasecisya kon.

⁶ Isecit iyoŋ aŋuna ani kiinak ŋikaitotoi kon ŋisiliŋa kideniyosi, ibu todema ikes ŋiboro kec aŋuna pa apedoritotor ikes atacakin iyoŋ ŋidenio kec, ibu daŋ tolema ŋilowi kec daadaŋ ka ikimyek ikes elerete.

⁷ Ibu iyoŋ nyiinak ŋulu aupit ŋakipi tomata, ibu iyoŋ todema ŋulu anyamit akoro akimuj.

⁸ Erae mono akwap ŋina a ŋituŋa a ŋulu agogoŋok bon a? erae mono iŋes ŋina a ŋulu emaikina kiboiyoto alotooma keŋ a?

⁹ Idau iyoŋ akiritar ŋapuseru eororete ŋakan, idau iyoŋ akimyekin akiŋarakin ŋikokyok.

¹⁰ Aŋun, ayakaun ŋatyokisyo nakiyar kon, ido ikiyalaasi iyoŋ ŋican ŋulu ka atipei,

¹¹ kori erwonu akwap aneni kon nyiyeni neni itemari, ikibwaliyasi iyoŋ ŋican ikwa akalele a ŋakipi.

¹² “Yob, nyiboi mono Akuj alokidiama nooi a? kiŋolik ŋikacer ŋulu eyakasi kidiama nooi, erounit Akuj ikes,

¹³ ido ibala iyoŋ, ‘Anukiro eyeni Akuj? Epedori mono iŋes akiŋolikin ŋuna itiyao ayaye akirwonut, ido itotubok a?

¹⁴ Nyepedori iŋes akiŋolikin akwap, anerae iteriboorito iŋes ŋidouwon ŋulukiryonok cuc, apaki ŋina elosyo iŋes eyai kidiama ariwo ŋina alokidiama.’

¹⁵ Irubakini mono iyoŋ iwuapit ŋuna etiyaete ŋituŋa ŋulukoloŋ ŋulu etiyaete ŋuna aronok a?

¹⁶ Aponi ikes tomunyarae eriŋa nyedolo apaki kec ŋina etwakyata, abu akalele kitoŋopiya akisyakinet kec.

¹⁷ Apotu ikes temasi neni ka Akuj, ‘Kimyekinae isua make. Anukiro mono epedori Akuj ŋina etiron akitiya aŋuna kosi?’

¹⁸ Toris bo Akuj kilelebik nakais kec ŋiboro ŋulu alalak, nai nyikiryama ayoŋ ka ŋuna eyeete ŋikaronok.

¹⁹ Iteete ŋulu iyookino ŋuna itiyae Akuj, ido elakara ikes; ekyenasi ŋulu emam aronis itiyato ejamuwarito ŋulu itiyaete aronis,

²⁰ ebasi, ‘Kire jik, adau Akuj amunyar ŋimoe kosi ka anyamuwa akim abaru ŋina emyekinito ikes.’

²¹ “Yob, tocamunos ka Akuj ka kisila ka iŋes; kitiya iyoŋ ŋun, ebuni ajokis neni kon.

²² Kiira ŋakitatameta ka Akuj, kiricak ŋakiro keŋ alotau kon.

²³ Ani kiboŋu iyoŋ neni ka Akuj a ŋina etiron, ani kilema iyoŋ amamukau akiyookino alore kon,

²⁴ ani kitusub iyoŋ egolid apuwa koŋin ka kitusub egolid ŋolo ka Opir ŋamoru ŋuna eya lotau ka ayonae,

²⁵ ido toruwor Akuj ŋina etiron iŋes erae egolid kon ka esilipa kon ŋolo epol egyelit,

²⁶ iryamuni nai iyoŋ alakara aneni ka Akuj a ŋina etiron, ido iyarikini iyoŋ neni ka Akuj.

²⁷ Ipedori iyoŋ akilip neni keŋ ka iirari iŋes akilip kon, ido isiyookini iyoŋ ŋakikoŋieta kon.

²⁸ Itamakini iyoŋ atemar kerae etiya nu, ka isiyookinio ŋun aŋuna kon, ido ileereuni epite ŋolo emaikina iyoŋ kitiyaa ŋun.

²⁹ Elemanari Akuj akituro a ŋulu iturosi, ido eiununui ŋulu itiditeuna bon.

³⁰ Elakuni Akuj tari ŋulu eyakatar ekaile ŋolo ka asecit; ebucunosi ikes aŋuna nyitiyator iyoŋ ŋuna aronok.”