Yob 21 - Ebaibul

Toboŋok Yob atemar emam ŋapakio ŋuna alalak nyisicaneneo ŋikaronok

¹ Toboŋok nai Yob tema,

² “Kiirasi ejok ŋakiro ŋuna alosi ayoŋ alimokin iyes, ŋakiro ŋun nai ipedoreta iyes akisirworiunia ayoŋ.

³ Kidaŋidaŋakisi erworik ayoŋ daŋ; ani nai kadau ayoŋ akirwor, ipedorete arubakin irworosi ikijamuwarito ayoŋ.

⁴ Ani eruwor ayoŋ, erae mono ŋituŋa esiburae ayoŋ a? Kaanukiro nyaruworor ayoŋ ŋolo apedori atitinyikin?

⁵ Kiŋolikinae ayoŋ, nyikibuli mono iyes ikiŋolikinete ayoŋ, ido tobuna ŋakitukwa kus a?

⁶ Ani etamakini ayoŋ epite ŋolo eyakar akuwan kaŋ, akakadakini ayoŋ, ido inyasun akuwan kaŋ daadaŋ tomaranik aŋuna ke ekabule.

⁷ Kaanukiro erubakinitotor ŋikaronok eyarete iatatar ŋikaru ŋulu ka apolou kec ka eruwonorotor ikes ŋulu etirok anapedor?

⁸ Epoloete ŋidwe kec emam ŋace iteete ikes, epoloete ŋiletok kec emam ŋace iteete ikes.

⁹ Eiuna ikes ka ŋiboro kec anakais kec emam ibore itukuryani, emam akisicanet ŋina ka Akuj eyai neni kec.

¹⁰ iyatasi ŋimoŋin kec, nyejoŋoeneneete akiyata, euriyete ŋaatuk kec, nyiyecununeete.

¹¹ Icurosi ŋidwe a ŋikaronok lopite ŋolo icurotor ŋamesekin; ido idoŋaete ŋidwe a ŋikaronok anawaetin a ŋikauruunak kec.

¹² eosi ŋidwe kec eramete ŋiburin ka ŋagitae, elelyanete epupete aŋuna epupyoto apilu erwo.

¹³ Iboiyete ŋirwa ŋulu ka akiyar kec erae ŋulu elakara, ido totiyaaros tooma nakibois a ŋikatwak emam ŋican aryamunito.

¹⁴ Elimokinete ŋikaronok Akuj ebe, ‘Kimyekinae isua make, nyikicamit isua ayenun ŋuna icamit iyoŋ kiwuapae isua.

¹⁵ Ŋae mono Akuj ŋina etiron, ŋina emaikina isua kitiyanakinae? Nyo ikiryamuni isua anakilip neni keŋ?’

¹⁶ Etamete ŋikaronok atemar erae aŋuna ka agogoŋu kec a ŋikulepek iŋes epedoritotor ikes aryamun ebari kec, nai nyacamunit ayoŋ epite ŋolo etamyata ikes.

¹⁷ “Ŋarwa ŋayai eduŋeneneo akiyar a ŋikaronok? Ŋarwa ŋayai eponianiata ŋican neni kec? Ŋarwa ŋayai einanakinia Akuj ikes anaŋoit keŋ aryebo?

¹⁸ Ŋarwa ŋayai eryamunitotor ikes ŋican lopite ielielya ekuwuam ŋanya? Kori lopite ŋolo ekutarya ekuwuam ŋolo ekusi nooi ŋamilo?

¹⁹ Ibasi iyes, ‘Idyasi Akuj ŋasecisya a ŋikaronok aŋuna a ŋidwe kec.’ Emaikina ŋikaronok kisicanae aŋuna ka aronis kec, ikotere eyenunete ikes atemar esecito.

²⁰ Emaikina ikes kiŋolikis a ŋakonyen kec amunyaro kec, emaikina ikes kiira anyunyura ŋina ka Akuj a ŋina etiron;

²¹ anerae emam ŋuna emisito ikes aŋuna a ŋidwe kec ekaku kec erae kituuruwuan Akuj ŋirwa ŋulu ka akiyar kec,

²² Eyai mono ituŋanan epedori akitatam Akuj toosyor toyeni ŋinituŋanan atemar erae Akuj etubonokini tari ŋisubuna ŋulu anakuj a?

²³ Etwakeneneete ŋituŋa eyakatar abaru ŋina alalan, erae ŋulu iboiyete elakara ka eiuna,

²⁴ erae ŋulu egogoŋ; ŋulu ileleba asumet nakoyo;

²⁵ etwakeneneete ŋice eyakatar ŋican ŋulu apipilak anakiyar kec, emam alakara apotu toryamut anakiyar kec a daadaŋ.

²⁶ ani etwakete ikes daadaŋ, enukakinio nalup, ido ebutarete ŋikur ikes daadaŋ kirikasi.

²⁷ “Okoe, ayeni ayoŋ ŋuna itamete iyes, ayeni ayoŋ ŋuna aronok ŋuna iyeete iyes akitiya neni kaŋ.

²⁸ Iŋitasi iyes ibasi, ‘Ai eyai akai a ekepukan? Ai eyai eema ŋolo iboiyo ituŋanan ŋini aronon?’

²⁹ Nyiŋituna iyes ŋakiro aneni a ŋituŋa a ŋulu alosete alorotin a? Nyicamunito iyes ŋakiro ŋuna apotu ikes itolimokis iyes

³⁰ atemar imyenakinio ŋikaronok tari akoloŋit ŋina eponiata ŋican ka elakununuyo ŋikaronok akoloŋit ŋina ka anyunyura a?

³¹ Mam ituŋanan itoroni ŋikaronok aŋuna ka aronis a ŋina itiyaete ikes, emam ituŋanan isicani ikes aŋuna ka aronis a ŋina itiyaete ikes.

³² Ani edakaryo ikes akinuk; elalak ŋituŋa ŋulu elosete neni enukio ikes.

³³ Ebobokinit ŋalup ŋuna a ŋakadipaalae acakanakin ŋikaronok neni kec; etupanarete ŋituŋa daadaŋ ŋikaronok eayo akinuk ka nyimarunun ŋituŋa ŋulu iŋarenikinete ikes eayo akinuk.

³⁴ alipite nai ipedoryata iyes akisirworiun ayoŋ a ŋakiro kus a ŋuna emam apolou? Mam ibore iyookino anakiro a ŋuna ikilimokis iyes ayoŋ.”