Yob 20 - Ebaibul

Erwor a Sopar ŋolo a ŋiarei: Ŋini itiyae aronis eryamuni akisicanet ŋina itemokino toryamu

¹ Toboŋok nai Sopar Enaamasait tema,

² “Topupok, acamit ayoŋ aboŋokin ŋakiro kon, aŋuna ka acamit a ŋina eyai lotau kaŋ.

³ Eira ayoŋ ŋakiro kon, ido erae ŋiyany aneni kaŋ, akaboŋoki ayoŋ etau ŋuna nyayeni ayoŋ.

⁴ Nyiyeni iyoŋ ŋakiro nu ŋinapei koloŋ ameun anakoloŋit a ŋina ewuakinia Akuj ituŋanan ŋini esyaunan nakwap,

⁵ atemar erae alakara a ŋulu aronok ŋina euruwuana ka atemar erae alelyanu a ŋulu nyekerito Akuj adio cici a?

⁶ Tari kewoyata ikes todolo tari kidiama lodouwon ŋulu ewato,

⁷ etwakete ikes toŋopiyasi lopite ŋolo eŋopiyaryata ŋacin kec; ido etemarete ŋulu sek eŋolikinito ikes, ‘Ai eyakasi ikes?’

⁸ Epuripuriyar ŋituŋa ŋulu aronok lopite ŋolo epuripuryarotor ŋakiro ŋuna irujae ituŋanan, nyetamun jik; eŋopiyarete ikes lopite ŋolo eŋipirya etorube ŋolo atakani anakiruja.

⁹ Nyiŋolikinete nabo ŋituŋa daadaŋ ikes ŋulu sek eboiyoto ikes, nyeyakaun nabo ikes nakiboisyo kec.

¹⁰ Iwarete ŋidwe kec ajokis aneni a ŋikulyak; inyakakinete ŋidwe kec ŋiboro a ŋikulyak neni a ŋikulyak.

¹¹ Eperete anapuwa ŋawat kec ŋunakoloŋ asorokaka.

¹² “Tari kebob aneni kec akirworo aronis, tari kimunonito ikes aronis anakituka kec,

¹³ pa kecamito alemar aronis anakituka kec, kebobokinit akiwuakinit ŋun nakitukwa kec,

¹⁴ kikote neni daŋ, ani edoli akimuj kec ŋin nakookyes kec, ibelukwae akook, kilocokin anakook a ituŋanan kikwaanikin ka ibore ŋini adwaran ŋin ikiyari.

¹⁵ Edemete ŋikaronok ŋiboro alotuŋa, ilikete ikes ŋiboro ŋul lopite ŋolo ilikio ituŋanan akimuj, nai itelekunio ikes ebari ŋol, itelekuni Akuj ikes ebari ŋol anakookyes kec.

¹⁶ Erae ibore ŋini ilikete ikes akisorit a akipom, akisorit ŋina ka akipom ŋin, iŋes eari ikes.

¹⁷ Nyeyenete ikes epite ŋolo eryamuniata ŋarereŋisyo ŋuna ka abaru, nyeryamunete ikes ŋarereŋisyo ŋuna ka abaru a ŋina abobon ikwa ao ka elabo, a ŋina eleleunit ikwa ŋakipi ŋuna eleleete anaŋolol.

¹⁸ Ijaaryo aneni kec ibore daadaŋ ŋini apotu ikes toryamut aloticisyo kec, ijaaryo ikes eriŋa nyisyakina akisitiya, nyeryamunete ikes alelyanu anibore a ŋini apotu toryamut anakicuruta kec;

¹⁹ anerae apotu ikes kisicana ka toesikis ŋikulyak, apotu ikes kikamasi ŋakais ŋuna pa adukito.

²⁰ “Pa ayenete ikes akiboi ekililiŋat pa imujito, anaroroko kec, amam ibore apedori abucar aneni kec.

²¹ Emam ibore apiyanununeete ikes kedaut akimuj, aŋun, nyerubakini abaru kec eyai.

²² Eryamunete ikes ŋican ŋulu itemokino ikes toryamut, ebuni neni kec aryenyeo daadaŋ ŋina a ŋican.

²³ Iakuuni Akuj neni kec ŋiman ŋulu ka anyunyura keŋ, ido tobuku neni kec ŋakisicaneta ŋuna adedeŋak.

²⁴ Eemete ikes aŋuna ka akilany akwara, egumyo ikes a ekaleŋeleŋet a ŋolo erae eburonis itiyaunitere,

²⁵ egumyo ikes kirop ekaleŋeleŋet ŋol anawat kec, topeleiyo neni erae ekileŋ a ekaleŋeleŋet anapidia kec; eyakaun neni kec ŋakitukuryaneta,

²⁶ Eyai akiryonut ŋinakiryonon cuc aŋuna kec; enomiyari ikes akim ŋina nyerae ituŋanan inokakini, enyamuwari akim ŋin ibore daadaŋ ŋini idoŋit nakais kec.

²⁷ Isileereunete ŋisubuna ŋulu alokidiama ŋasecisya a ŋikaronok; isitakinete ŋisubuna ŋulu alokwap ŋikaronok.

²⁸ Itoŋopiyario ŋiboro ŋulu eya nakais kec, eŋopiyarete ŋul akoloŋit ŋina ebunio Akuj ananyunyura keŋ akitub ŋakiro.

²⁹ Erae ŋun ŋuna eryamunete ŋikaronok aneni ka Akuj, erae ŋun aryamunet ŋina etubunit Akuj aŋuna kec.”