Yob 2 - Ebaibul

Akitemyet a Yob ŋina a ŋaarei

¹ Akoloŋit apei tocunakinos ŋisubuna ŋulu anakuj kiŋaren Ekapolon, abu Satan daŋ bu neni acunakina ikes akitoodiun kiŋaren Ekapolon.

² Kiŋit Ekapolon Satan tema, “Ai ibunio iyoŋ?” Toboŋok Satan tema, “Abuni ayoŋ anakirimit akwap, atubonor ayoŋ ŋiwaetin ka akwap daadaŋ.”

³ Kiŋit Ekapolon Satan tema, “Anu itami iyoŋ aŋuna a eketiyan kaŋ a Yob? Mam ituŋanan anakwap ikwaanatar Yob, erae iŋes ituŋanan ŋini emam ŋuna itoroniyaritere ka erae iŋes ŋolo iyookino, ekile ŋolo itopoloorit Akuj, ŋolo eŋerit ŋuna aronok. Erubakinit iŋes iyookino, tari daŋ kicamit iyoŋ ayoŋ oremokin iŋes ka omunaiya iŋes emam ŋuna aronok ŋuna itiyat iŋes neni kaŋ.”

⁴ Toboŋok nai Satan Ekapolon tema, “Mati kibula ituŋanan ŋaokot! Epedorete ŋituŋa akijal ibore daadaŋ ŋini eyakatar aŋuna ka aiunia akiyar kec.

⁵ Nai kisican ceni iyoŋ ŋakoyo ka akuwan keŋ, ikiceni iŋes iyoŋ.”

⁶ Tolimok Ekapolon Satan tema, “Iyookino eyai iŋes napedor kon, nai nyiar iŋes.”

⁷ Abu nai Satan torotok alokiŋaren Ekapolon, kitiya ŋuna ka asiilyo neni a Yob kitolomu ŋajemei anakuwan a daadaŋ, ŋinapei anenidapal a ŋakejen tari kidiama akou.

⁸ Abu Yob tolemu itabok tokoyo akuwan keŋ ka abu tolomak akiboi aneni amudyo ekuron.

⁹ Abu nai aberu keŋ tema neni keŋ, “Eriŋa iyoŋ irubakinit irae ŋolo iyookino a? Kicen Akuj totwana iyoŋ.”

¹⁰ Nai abu Yob tema neni ka aberu keŋ, “Irworo iyoŋ abaŋao lopite ŋolo irworor aberu daadaŋ ŋina ebaŋaana. Epedoryo mono iwon aryamunun ŋuna ajokak aneni ka Akuj, ido nyeryamununuyo ŋuna aronok a?” Anakisicanet a ŋin, abu Yob nyesec alorwor keŋ.

Ŋikonei a Yob ŋiuni

¹¹ Ani iirarete ŋikonei a Yob ŋiuni ŋakiro daadaŋ ŋuna apotu kitiyakin neni a Yob, abu ŋinituŋanan kec torotok alore keŋ, arae ŋirorwa kec Elipas ŋolo alo Teman, Bilidad ŋolo alo Su ka Sopar ŋolo alo Naamas. Apotu ikes kiryamun kaapei toloto akimaima ka akisirworiun Yob.

¹² Ani iŋolikinete ikes iŋes eriŋa elwana, apotu ikes nyeyan Yob, apotu ikes tocelut nooi, kigworo ecelasi, tocilicileta ŋikaasoi kec, ido kiela apuwa kidiama, min nakyes kec.

¹³ Kiboiyoto ŋikonei a Yob kaapei ka Yob alokwap a nen ŋapaarasya ŋakanikaarei ka ŋakuwarisya ŋakanikaarei, mam ipei daŋ alokidiŋ kec abu tolimu adiokirot, anerae apotu kiŋolikis ŋican a Yob epolok nooi.