Yob 18 - Ebaibul

Kirworik Bilidad: Isicani Akuj ŋikaronok

¹ Toboŋok Bilidad ŋolo abunit alo Su Yob tema,

² “Yob, apaki mono ŋina etya ai iyai iyoŋ iwarit ŋakiro ŋunalimuno? Totamatamak mono iyoŋ, ido nai kirworikinae isua.

³ Kaanukiro ikiyaitor iyoŋ isua ikwa ŋaatuk? Kaanukiro ikitabaŋaanitor iyoŋ isua alokiŋaren kon?

⁴ Yob iwanawana iyoŋ akuwan kon aŋuna ka aŋoit kon, imyekinio mono akwap aŋuna kon, kori emaikina mono toritaarae ŋimoru aneni sek eya a?

⁵ “Kire jik, eduŋe akiyar a ŋikaronok a daadaŋ, ikwaanikin ikes ka akim ŋina eduŋe.

⁶ Ikwaanikin ikes ka ŋakais ŋuna emam akica ŋuna etuduŋei akica, ikwaanikin ikes ka ituŋanan ŋini alema akica ŋina sek ecai alokidiama keŋ.

⁷ Auruwaketa ŋikilames kec nyeriŋa eoyak, enyasut ikes ŋakiro ŋunapei sek eyeete akitiya,

⁸ anerae ekamut ŋipitesyo ŋulu ka akiyar kec ikes elosete ikes akimasakin nakipany.

⁹ Ekamu atawuatat ŋatotiny kec; eketa auno ikes.

¹⁰ Elokakinitae auno kwap pa etakani aŋuna kec, elokakinitae atawuatat lorot aŋuna kec.

¹¹ Eyakasi ŋiboorei ŋulu etukuryanak ikes lowaetin kec daadaŋ, itekerete ŋiboorei ŋul ikes nyetapanakin ŋatotiny kwap.

¹² Alema akoro agogoŋu kec, nyepedorito ikes akiretakin ŋican aneni kec.

¹³ Enyasu edeke ŋamunyin a ŋawat kec. Erika edeke ŋakan ka ŋakejen kec.

¹⁴ Eelielaar ikes anakais a ŋuna sek ekinyomito, ayaun ikes neni a erwosit a ŋiketubulok.

¹⁵ Emam ibore idoŋit nakais kec; ecunyakin neni sek iboiyoto ikes a ibore a ŋini erirae nooi a ŋini enyaritae Sulupa.

¹⁶ Ekwaanikin ikes ka ekitoe ŋolo ebosete ŋataagor, ido toiniyasi ŋaten.

¹⁷ Nyeriŋa nabo etamunitae ikes anakwap, nyeriŋa elimitoe ŋirorwa kec alorotin a etaun.

¹⁸ Adaun akimasar ikes anakica tooma nakiryonut adaun akiritar ikes anakwap.

¹⁹ Emam ikes ŋiletok, kori ŋipapae a ŋituŋa kec, mam ituŋanan idoŋit neni sek eboiyoto ikes.

²⁰ Aumokis ŋituŋa ŋulu iboiyete alowae a ŋolo alo To aŋuna ka amunyaro a ŋituŋa a ŋul, ekamu ekabule ŋolo ka amunyaro a ŋituŋa a ŋul ŋituŋa ŋulu iboiyete alowae a ŋolo alo Kide.

²¹ Kire jik, ŋakiro ŋuna ikote ŋun itiyakinosi nakiboisyo a ŋulu nyiwuapito ŋuna ka Akuj, ŋakiro ŋuna ikote ŋun itiyakinosi nakibois a ŋulu nyeyenete Akuj.”