Yob 15 - Ebaibul

Erwor ka Elipas ŋolo a ŋiarei ka ajamuwar a Yob ŋakiro ŋuna ke edin

¹ Toboŋok nai Elipas Etemanait Yob tema,

² “Yob, emaikina mono ŋituŋa ŋulu aosok ŋulu ikote iyoŋ akirworo ŋakiro ŋuna caryo ka akilelebikin nawat ŋakiro ŋuna amwanak pe ŋuna ikote ekuwuam ŋolo ekutununui alo Kide a?

³ Emaikina mono ikes alomar lopegeta a ŋakiro aŋuna nyikiŋarakinete, kori lopegeta a ŋakiro a ŋuna emam ajokis iryamuni a?

⁴ Nai itiditeu iyoŋ aneni kon akitopoloorit Akuj, ido ikitukuruwo iyoŋ nen akilip neni ka Akuj;

⁵ anerae aronis kon iŋes ikiinak iyoŋ akirworo lopite ŋolo irworor iyoŋ; idau iyoŋ aseun akirworo lopite ŋolo irworotor ŋimodiyanotin.

⁶ Ŋakiro kon a elope ikes ikitubokinete iyoŋ, meere ayoŋ; ŋakiro kon a elope ikes elimorito ŋuna ikimanitere iyoŋ.

⁷ “Yob, iyoŋ mono ikidounio ekiŋaren eriŋa ŋituŋa daadaŋ a? Iyoŋ mono isyauni nakwap eriŋa nyesubuna ŋimoru a?

⁸ Eya mono ŋakiro ipupok iyoŋ anatukot a ŋina eyea Akuj ŋakiro a? Neni kon mono bon irirakinit iyoŋ aosou a?

⁹ Anukiro iyeni iyoŋ ŋuna nyeyenio isua? Anukiro iyeni iyoŋ ŋuna nyileerete aneni kosi?

¹⁰ Ikiriit isua ka ŋulu alomut ŋakorwo anakyes kaapei ka ŋulu emojoŋito, ŋulu emojoŋito akilo tari papa kon.

¹¹ Ecaryooko mono aneni kon ŋakiro ŋuna ecamitor Akuj akisirworiun iyoŋ a? Kori akirot ŋina ikimaimayere iyoŋ a?

¹² Kaanukiro icamitor iyoŋ ŋuna eya lotau kon ikicakasi iyoŋ? Kaanukiro ikiteo iyoŋ isua itoodiunit aŋoit kon,

¹³ ido iremokin iyoŋ alotau kon Akuj ka imyekinit ŋakiro ŋuna itoroniaritor Akuj itorunito nakituk kon?

¹⁴ Alipite mono eruworotor ŋituŋa ŋulu emam asecit? Kori alipite mono epedoryata ŋituŋa ŋulu erae ŋituŋa pei euruunito aruwor ŋulu iyookino?

¹⁵ Nyikinyomit Akuj tari ŋimalaikan keŋ, nyesegak alokiŋaren Akuj tari ŋisubuna ŋulu eya kidiama,

¹⁶ Etya nai ai amamukau asegis aneni a ŋini esiilyana ka ŋini itiyae atuna, a ŋini iturakinit ŋasecisya nakuwan keŋ lopite ŋolo emasere ŋakipi jik.

¹⁷ “Topupok ŋakiro kaŋ, eketoodikini ayoŋ iyoŋ; ŋakiro ŋuna eŋolik ayoŋ, akalimokini iyoŋ.

¹⁸ Ŋakiro ŋuna adau ayoŋ akiirar aneni a ŋikaosok a ŋulu aosok ka ŋuna apotu atapapaa kec nyimunono,

¹⁹ ŋakiro a ŋulu arae neni kec aponi inakinae akwap, ŋakiro a ŋulu amam igelaanot abu kitor neni kec.

²⁰ Iteryamunitae ituŋanan ŋini aronon ŋican ŋulu eryebar ŋirwa daadaŋ ŋulu ka akiyar keŋ, eryamunit iŋes ŋican ŋikaru daadaŋ ŋulu imarakinitae iŋes aŋuna ka aryenyeo keŋ.

²¹ Epupete ŋiryenyaanotin ŋitoilon ŋulu einakinete ikes ekabule; apaki ŋina eyakatar ikes nalakara, ebuni ekenyasan amunaar alakara kec.

²² Emamukatar ikes akigeno atemar ikiiun anatwanare, ido idarito ikes aaro a ekileŋ.

²³ Irimito ikes neni alwanan iwarito akimuj ebasi, ‘Ai mono daŋ ikiryamunia akimuj?’ Eyenete ikes atemar aapuu akoloŋit ŋina iridakiniata;

²⁴ itubulete ŋican ka akiyaloloŋ ikes; ilounete ŋican ka akiyaloloŋ ikes, lopite ŋolo ilounere erwosit ŋolo sek etemokino aŋuna ke ejie.

²⁵ Itiyakinosi ŋun neni kec, anerae apotu ikes kiniŋiniŋo ŋakan kec eremokino Akuj, ido apotu kitiyata esibito ŋikelounak Akuj ŋina etiron;

²⁶ apotu tokera itoodiunito akisyaanu kec eremokino Akuj, eyakatar ŋaupala ŋunabutur ka iturosi.

²⁷ Aŋuna aponiata ikes totuma torap atumes ŋakonyen ka toruwor ŋulu atumak anacirin,

²⁸ iboiyorete ikes lotaunio ŋulu aruwor ŋireŋoroto, iboiyorete ikes nakais ŋuna nyemaikina ituŋanan idio ituruwori ŋina keŋ, nakais ŋuna imyekinitae toukor toruwor neni etukotor ŋamoru;

²⁹ nyebarete ŋituŋa ŋul ka nyerubakini ebari kec eyai, kori emam ibore kec idio erubakini eyai nakwap.

³⁰ Nyebucarosi ŋituŋa ŋul anatwanare; ikwaanikin ikes ka ŋatalijei a ekitoe ŋuna itiiniyari akim; ikwaanikin ikes ka ŋatur ŋuna eraraari ekuwuam alokitoe.

³¹ Nyemaikina ikes kiwuakis akigeno kec loboro ŋulu edaunosi, tomodikinos akiyar kec make; anerae eruwor amamukau idiobore iŋes eruwor eropit kec.

³² Einakinio ikes ŋun daadaŋ eriŋa nyeokiyoro ikwa ekitoe, eriŋa nyeokiyoro ikwa ŋaten a ekitoe a ŋolo aono ŋuna nyelibunete nabo jik.

³³ Ikwaanikin ikes ka ekitoe a epiini ŋolo eraraun ŋaraito keŋ eriŋa nyekoko, ikwaanikin ikes ka Olipa ŋolo eraraun ŋatur keŋ kwap.

³⁴ Erae atukot a ŋituŋa a ŋulu nyikinyomito Akuj ŋina ikwaan ka ibore ŋini ekolupana, enomiyari akim ŋakais kec ŋuna apotu ikes toduko a ŋakaluŋuluŋui.

³⁵ Erae ŋul ŋituŋa ŋulu eyeete ŋican aŋuna a ŋuluce, ido kitiyata aronis ka itemonokinete ikes amodiyo lotai kec.”