Yob 11 - Ebaibul

Kirwor Sopar atemar erae asecit a Yob ŋina emaikina kisicanere iŋes

¹ Togeu nai Sopar Enaamasait erwor tema,

² “Emaikina mono ituŋanan kirwor ŋakiro ŋuna elalak emam aboŋokinet ka emaikina mono ituŋanan ŋini italalat ŋakiro kituruworoe ŋini iyookino a?

³ Yob, emaikina mono ŋakiro kon ŋuna irworo iyoŋ anakituro ikisililiŋa isua ka ani kikyenar iyoŋ ŋuluce, emam mono ituŋanan ikisirumi iyoŋ ŋileec a?

⁴ Anerae ibala iyoŋ, ‘Erae ŋipitesyo kaŋ ŋulu ajokak nooi, mam ŋuna aronok ŋuna etiyat ayoŋ alokiŋaren Akuj.’

⁵ Nai kerae ca okoe topedori Akuj alimun ŋadi tokona, kirworik neni kon,

⁶ kerae ca itolimok iŋes iyoŋ ŋakiro ŋuna imunono ŋuna ka aosou! Anerae elalak ŋakiro ŋuna eya naosou, toyenu nai atemar ikisican iyoŋ Akuj iwadio, akilo neni emaikina ikisicanere iyoŋ aŋuna ka asecit kon.

⁷ “Ipedori mono iyoŋ aripirip ŋakiro ka Akuj ŋuna ipiyorito ŋituŋa daadaŋ a? Ipedori iyoŋ ayenun ŋakiro a ŋina etiron ŋuna nyepedorit aosou a ituŋanan akidol a?

⁸ Epol aosou ka Akuj iloit tari aoyau alokwap tari kidiama, nyo nai ipedori iyoŋ akitiyakin? Epol aosou ka Akuj iloit tari acukulul a akibois a ŋikatwak, nyo ipedori iyoŋ ayenun?

⁹ Epol aosou ka Akuj, nyeriyan tari ka aoyau ka akwap, elal akilo tari neni elalaa anam.

¹⁰ Ani ketema Akuj akikamun iyoŋ, ikiwuak iyoŋ lojera, ido tonyarau ŋituŋa toyakaun neni ikitubokinere iyoŋ, ŋae epedori akiretakin iŋes?

¹¹ Eyeni Akuj ŋituŋa ŋulu ecaryooko, ani iŋolikini Akuj ituŋanan itiyae ŋuna ka asecit, nyirici mono iŋes ŋun a?

¹² Nai eyenuni ituŋanan ŋini ebaŋaana ŋakiro iŋolikini asigirya euruuni ituŋanan.

¹³ “Ani kitiya iyoŋ alotau kon ŋuna iyookino, ipedori akikyaar ŋakan kon neni eyai Akuj.

¹⁴ Ani kitiyat iyoŋ a ŋakan asecit, kikoŋo asecit ŋin, ido nyicamak aronis itiyao aloeema kon.

¹⁵ Kire jik, ipedori nai iyoŋ ayakau pa ikirumito ŋileec, iruwor iyoŋ ituŋanan ŋini iuna, ido nyikuryaniar.

¹⁶ Ikimuryakinete iyoŋ ŋican kon, lopite ŋolo nyetamunia ituŋanan ŋakipi ŋuna apotu tobukoros.

¹⁷ Ejokyar nooi akiyar kon akilo neni ileereo ibore daadaŋ kidiŋ apaaran ecai akoloŋ, ikwaanikin anyipinyip ŋina sek a akiyar kon ka apaki ŋina iwalarya akwap.

¹⁸ Iyakaunor nai iyoŋ akikinyoma anakiyar kon, anerae iryamuni akigeno; ikiyokiyo iyoŋ ka iwuakini iyoŋ akieŋun kon neni iboiyo iuna.

¹⁹ Iperi iyoŋ emam ibore ikitukuryani; epote ŋikalalak akiŋita akiŋarakino aneni kon.

²⁰ Nai nyeyenunete ŋulu aronok ŋakiro ŋuna itiyasi neni kec; eŋopikini ikes epite ŋolo eiunotor, ido eruwor akigeno kec atemar kerae ca totwakae.”